Génesis 1 - Biblia Maya

Bix úuchic u beeta'al yóokolcaab

¹ Tu yáax chuune' Junab Kue' tu beetaj ca'ano'ob yéetel lu'um.

² Chéen ba'ale' le lu'umo' ma' nu'uca'an yanil ca'achi'; tuláacale' t'uubul ichil sen nojoch éekjoch'e'enil, ba'ale' u pixan Kue' ti' cu péec ca'ach pacacbal yanil tu yóokol le ja'o'.

³ Ca tu ya'alaj Ku: ¡Yanac sáasil! Ca j yanji sáasil.

⁴ Le ca tu yilaj Ku ma'alob le sáasilo', tu jun páaycuntaj ti' le éekjoch'e'enilo',

⁵ ca tu dzaj u kaaba'int le sáasilo' kiin, ca tu dzaj xan u kaaba'int le éekjoch'e'enilo' áakab. Bey máanic le u yáax jun kiino'.

⁶ Cu dzo'ocole' ca tu ya'alaj Ku: yanac jun p'éel nak ca'an u ti'al u jun páaycunt le ja'obo', u ti'al beyo' ca p'áataco'ob jujun páayil lelo'oba'. Bey úuchico'.

⁷ Kue' tu beetaj jun p'éel nak ca'an, lela' tu jun páaycuntaj le ja'obo': jun jaatze' j p'áat tu yáanal le ca'ano', u láake' j p'áat tu yóokol.

⁸ Le nak ca'ano' tu dzaj u kaaba'int ca'an. Bey máanic túun le u ca'a p'éel kiino'.

⁹ Ca tu ya'alaj Ku: Le ja' yaan tu yáanal le ca'ano' ca u much'quinticubáa ti' jun p'éelili' cúuchil, u ti'al ca chíicpajac le tiquino'. Bey úuchico'.

¹⁰ Kue' tu dzaj u kaaba'int le tiquino' lu'um, u múuch'ul le ja'o' tu dzaj u kaaba'int ka'anab. Le ca tu yilaj Ku tuláacal ma'alobe',

¹¹ ca tu ya'alaj Ku: Le lu'umo' u dzáa tuláacal u jejeláas paakalo'ob; xíiwo'ob ca u dza'ob neek, yéetel che'ob ca u dza'ob ich. Bey úuchico'.

¹² Le lu'umo' tu dzaj tuláacal jejeláas paakalo'ob, xíiwo'ob cu dzáico'ob neek yéetel che'ob cu dzáico'ob ich. Ca tu yilaj Ku tuláacal ma'alob.

¹³ Bey túun máanic le u yóox p'éel kiino'.

^14-15 Ca tu ya'alaj Ku: Ca yanac sáasilo'ob te tu nak ca'ano', u ti'al u sáasilcunto'ob le lu'umo' ca xan u jun páaycunto'ob le kiin ti' le áakabo', ca meyajnaco'ob u ti'al xan u ye'esico'ob le kiino'ob, le ja'abo'ob yéetel le kiinbesajilo'obo'. Bey úuchico'.

¹⁶ Kue' tu beetaj le ca'a p'éel sáasilo'obo': le nojocho' u ti'al u sáasilcunaj yéetel kiin, le chichano' u ti'al sáasilcunaj yéetel áakab. Tu beetaj xan le eeko'obo'.

¹⁷ Kue' tu dzaj le sáasilo'ob te tu nak ca'ano' u ti'al u sáasilcunto'ob le lu'umo',

¹⁸ bey yéetel kiin, bey yéetel áakab, u ti'al xan u jun páaycunt le sáasilo' ti' le éekjo'och'e'enilo', ca tu yilaj tuláacal ma'alob.

¹⁹ Bey túun máanic le u can p'éel kiino'.

²⁰ Cu dzo'ocole' ca tu ya'alaj Ku: Ca u dzáa le ja'o' tuláacal jejeláas ba'alche'ob, ca yanac xan ch'íich'o'ob ca xiknalnaco'ob yóokol le lu'umo'. Bey úuchico'.

²¹ Kue' tu beetaj u nucuch ba'alche'ilo'ob le ka'anabo', tuláacal le ba'alche'ob cu dzáic le ja'o' yéetel le cajacbalo'ob ichilo', bey xan tuláacal le ch'íich'o'obo'. Le ca tu yilaj Ku beyo' ma'alob,

²² tu qui'iqui' t'antaj le ba'alche'ob dzo'oc u beetico', yéetel le qui' t'aano'oba': Yanac ya'ab a mejenile'ex, chupe'ex xan le yóokolcaab yéetel ca yanac ya'abcach ch'íich'o'ob yóokolcaab.

²³ Bey túun máanic le u jo' p'éel kiino'.

²⁴ Ca tu ya'alaj Ku: U dzáa le lu'umo' tuláacal u jejeláasil alaktbil ba'alche'ob yéetel káaxil ba'alche'ob, bey xan le cu jíilticuba'ob j lu'umo'. Bey úuchico'.

²⁵ Kue' tu beetaj le ba'alche'obo', ca tu yilaj tuláacal ma'alob.

²⁶ Ca tu ya'alaj Ku: Bejela'e' co'ox beetic wíinic. Bíin béeyac je'el bixo'one', u ti'al u yantal páajtalil ti' tu yóokol cayo'ob, ch'íich'o'ob, alaktbil ba'alche'ob, káaxil ba'alche'ob, yéetel yóokol le cu jíilticuba'ob j lu'umo'.

²⁷ Kue' tu beetaj wíinic, tu beetaj je'el bix leti'e'; j xiib yéetel co'olel,

²⁸ ca tu dzaj ti'ob u qui'iqui' t'aan: Ca ya'abchajac a paalale'ex; chupe'ex le yóokolcaabo', méektáan te'ex xan, yanac a páajtalile'ex yóokol le cayo'obo', le ch'íich'o'obo' bey xan yóokol tuláacal le ba'alche'ob cu jíilticuba'obo'.

²⁹ Cu dzo'ocole' tu ya'alaj ti'ob: U'uye'ex, ti' te'ex quin dzáic tuláacal u paakalilo'ob lu'um cu dzáico'ob neek, bey xaan le cu dzáico'ob icho'. Tuláacal lelo' u ti'al a tzéenticaba'ex.

³⁰ Ba'ale' ti' u ba'alche'ilo'ob le káaxo', ti' le cu jíilticuba'ob yóokol lu'um bey xan ti' le ch'íich'o'obo', quin dzáic le xíiwo'ob u ti'al u tzéenticuba'ob. Bey úuchico'.

³¹ Kue' tu yilaj tuláacal ba'ax tu beetajo' sen ma'alob. Bey túun máanic le u wac p'éel kiino'.