Filemón 1 - Biblia Maya

Pabloe' cu dzíib ti' Fílemon

¹ Teen Pablo, máax kala'anen tu yo'olal Cristo Jesuse' quin dzíibtic le ju'una' jun múuch' yéetel sucu'un Timoteo ti' teech, Filemón, c yaabilaj yéetel c éet meyaj,

² bey xan ti' le Iglesia cu much'icubáa ta wotocho' je'el bix xan ti' c quiic Apia yéetel ti' Arquipo máax cu láakintico'on ti' le ba'atelo'.

³ Kame'ex u siibal utzil yéetel u jéedzel óolal Ku c Taata yéetel Yuumtzil Jésucristo.

U yaacunaj yéetel u yocsaj óolal Filemón

⁴ Mantadz quin dzáic nib óolal ti' Ku, le quéen in ka'ajsech ti' in payalchi'ob,

⁵ tumen dzo'oc u kuchul ti' teen u péectzil le yaacunaj yéetel le ocsaj óolal yaan ti' teech u ti'al Yuumtzil Jesuso' bey xan u ti'al tuláacal le máaxo'ob u ti'alo'ob Kuo'.

⁶ Quin káatic ti' Kue' le máaxo'ob dzo'oc u yocsaj óolo'ob tu yo'olal a wocsaj óolale' ca kuchuc u na'ato'ob ma'alob tuláacal le qui'iqui' t'aano'ob yaan to'on tu yo'olal Cristo Jesuso'.

⁷ Tumen jach qui'imac in wóol yéetel lika'an in wóol tu yo'olal a yaacunaj, tumen ta wo'olale', sucu'un, dzo'oc u qui'imaccunta'al u yóol u pucsi'ikal le j ocsaj óolo'obo'.

Pabloe' cu káat óolal tu yo'olal Onesimo

⁸ Tu yo'olal lela', quex tumen bey jun túulen u apóstol Cristo yaan teen u páajtalil in wa'alic teech ba'ax unaj a beetique',

⁹ quin táanilcuntic in káat óolal ti' teech tu yo'olal yaacunaj. Teen, Pablo, nuxiben yéetel beora' kala'anen tu yo'olal Cristo Jesuse',

¹⁰ quin káat óolal tu yo'olal in paal Onésimo, máax síij ti' ocsaj óolal way tu'ux kala'anena'.

¹¹ Ti' le kiino'ob dzo'oc u máano'obo', Onésimoe' j kuch béeytal a ti'al teche' jun túul palitzil mixba'al u biilal, ba'ale' beora' yaan u biilal je'el bix ti' teche' bey xan ti' teen.

¹² Quin túuxtic teech tu ca'a téen; kam túun bey je'el bix in pucsi'ikale'.

¹³ Je'el in wóoltic ca'ach ca p'áatac way tin wéetele' u ti'al u meyajtiquen ta lugar ca'aliquil kala'anen tu yo'olal le ma'alob péectzilo'.

¹⁴ Ba'ale' ma' in káat in beet mixba'al wa ma' utz ta t'ani', u ti'al beyo' le meyaj utz ca beetic teno' ma' a beetic chéen tumen táan u tza'abal techi' ba'ale' ca a beet tu juunal a wóolal.

¹⁵ Onésimoe' tu p'atajech wale' dze'edzec kiino'ob u ti'al ca a kam beora' u ti'al láaj kiino'ob,

¹⁶ ma' bey jun túul palitzile', u káat u ya'ale', je'el bix jun túul sucu'un yaabila'ane'. Tene' jach in yaabiltmaj, ba'ale' teche; unaj a yaabiltic asab, ma' chéen je'el bix jun túul máaque' ba'ale' bey xan je'el bix jun túul sucu'un ti' u yocsaj óolal Yuumtzile'.

¹⁷ Bey túuno' wa ca tucultic tene' in wéet óolaleche', kam leti' je'el bix, a kamiquen teno'.

¹⁸ Wa yaan wa ba'ax kaas u beetmaj teche', wa yaan ba'ax u p'axmaj teche', tzáa ti' teen.

¹⁹ Teen Pabloe' tin kabil quin dzíibtic lela' teen quéen in bo'ot teech; quex tumen je'el u páajtal in beetic a ka'ajsique' teche' a p'axmaj teen a cuxtal xan.

²⁰ Bey, sucu'un, beet teen le meyaj utza' je'el bix jun túul j ocsaj óol Yuumtzile'; qui'imaccunt u yóol in pucsi'ikal ti' Cristo'.

²¹ Quin dzíib teche' tumen jach in wojel ca wu'uyic t'aan yéetel in wojel yaan a beetic u masil ti' le quin káatic techa'.

²² Bey xan nu'uct tu'ux in kuchul; tumen quin pa'atic tu yo'olal a payalchi'exe', Kue' yaan u dzáic te'ex ca xi'iquen in wilech.

Tziquil t'aano'ob yéetel u dzoc qui'iqui'it'aan

²³ Cu túuxtic tziquil t'aano'ob Epafras, máax kala'an tin wéetel tu yo'olal Cristo Jesús,

²⁴ bey xan Marcos, Aristarco, Demas yéetel Lucas, máaxo'ob táan u yáantiqueno'ob ti' le meyajo'.

²⁵ U siibal utzil Yuumtzil Jésucristo ca yanac ta wéetele'ex. Amén.