Ester 9 - Biblia Maya

Ti' le judíobo' j bin utzil ti'ob

¹ U kiinil trece ti' u winalil doce, cu kaaba'intic Adare', le kiin jedza'an ca'ach u ti'al u dzo'ocbesa'al u t'aan ajawe', leti' xan le kiin cu pa'ata'al tumen u aj p'eeco'ob le judíob u ti'al u t'onquita'alo'ob; ba'ale' ma' j úuch beyo' tumen leti'obe' t'onquinta'abo'ob tumen le judíobo'.

² Ti' tuláacal u táabal caajo'ob ajaw Asueroe', le judíobo' tu much'ajuba'ob tu noj caajilo'ob tu'ux caja'ano'ob, u ti'al u bino'ob tu yóokol le máaxo'ob tu tuucultajo'ob u beetico'ob kaas ti'obo'. Mix máac tu yóoltaj ba'atel yéetelo'ob, tumen jun p'éel nojoch sajbe'en j taal tu yóokol tuláacal u caajnáalilo'ob le lu'umo'.

³ tuláacal u nojochilo'ob le táabal caajo'obo', u méektáano'ob múuch' caajo'ob, yéetel táabal caajo'ob, yéetel le u nuuquilo'ob le méektáano'obo', tu dzajuba'ob tu tzéel le judíobo' tu yo'olal u sajaquilo'ob ti' Mardoqueo.

⁴ tumen leti'e' jun túul u nojochil jalach naj, yéetel u péectzile' dzo'oc ca'ach u ki'itpajal ichil tuláacal le táabal caajo'obo', je'el bix u bin u máan kiine' bey u bin u nojochtal u páajtalil.

⁵ Yéetel u yej máascabe' le judíobo' tu láaj xu'ulsajo'ob u aj p'eeco'obo', ca tu beetajo'ob ti'ob je'el ba'ax tu yóoltajo'obe'.

⁶ Chéen tu tuulum caajil Susae' tu quíimsajo'ob quinientos xiibo'ob;

⁷ tu quiimsajo'ob xan j Parsandata, j Dalfón, j Aspata,

⁸ j Porata, j Adalía, j Aridata,

⁹ j Parmasta, j Arisai, j Aridai yéetel j Vaizata,

¹⁰ lelo'oba' u diez paalal ca'ach j Amán u aj p'eec le judíobo'; ba'ale' ma' tu taalajo'ob mix ba'ali'.

¹¹ Láili' ti' le kiino', le ca tu yojéeltaj ajaw jay túul le j quimeno'ob yano'ob ca'ach tu tuulum caajil Susae',

¹² tu ya'alaj ti' x ajaw Ester: Le judíobo' dzo'oc u quiimsico'ob tu tuulumil caajil Susae quinientos j xiibo'ob, yéetel xan u diez paalal Amán. ¿Ba'ax u láak ba'alo'ob dzo'oc wal u beetico'ob tu láak u táabal caajilo'ob le ajawila'? ¡A'alten ba'ax u láak ca dzíiboltic ca in dzáa ti' teech!

¹³ X Estere' tu núucaj: Wa ma'alob u yu'ubic a tzicbe'enile' ca cha'abac ti' le judíob yaan Susae', u beetico'ob sáamal láili' le ba'ax tu beetajo'obo', je'el bix cu ya'alic le a'almaj t'aano', ca ch'uyquinta'aco'ob te tu cúuchil jich' caalo', u wíinclilo'ob u diez paalal Amán.

¹⁴ Ajawe' tu ya'alaj ca beeta'ac beyo'. Le a'almaj t'aano' ka'ayta'ab Susa, ca ch'uyquinta'ab u quimen wíinclil u diez paalal Amán.

¹⁵ Le judíob caja'ano'ob Susae' tu ca'a much'ajuba'ob tu kiinil catorce ti' u winalil Adar, ca tu quiimso'ob te'elo' u láak trescientos j xiibo'ob; ba'ale' ma' tu taalajo'ob mix ba'ali'.

^16-17 Le judíob caja'ano'ob ca'ach ti' le u láak táabal caajo'obo' much'lajo'ob xan tu kiinil trece láili' ti' le winalo' u ti'al u toquico'ob u cuxtalo'ob, yéetel u tzelico'ob u aj p'eeco'ob; tu quimsajo'ob setenta yéetel cinco mil, ba'ale' ma' tu taalajo'ob mix ba'ali'. Tu catorce kiinile' tu je'elsajuba'ob ca tu kiinbesajo'ob yéetel noj janalo'ob bey xan yéetel qui'imac óolal.

¹⁸ Le judíob u cajnáalilo'ob Susae' j much'laja'ob ca'ach tu kiinil trece éetel catorce, ca tu je'elsajuba'ob tu kiinil quince ca tu kiinbeso'ob xan yéetel noj janalo'ob yéetel qui'imac óolal.

¹⁹ Ba'ale' le judíob caja'ano'ob ti' caajo'ob yéetel ti' péet caajo'ob mina'an u tuulumilo'ob, tu kiinbeso'ob tu kiinil catorce ti' u winalil Adar yéetel qui'imac óolal, yéetel paaclam siibalo'ob.

U kiinbesajil Purim

²⁰ Mardoqueoe' tu dzíibtaj le ba'axo'ob j úucho', ca tu túuxtaj ju'un ti' tuláacal le judíob cajano'ob ca'ach tu táabal caajilo'ob u ajawil Asuero, ti' le máaxo'ob yano'ob náacho' bey xan ti' le yano'ob naadzo'.

²¹ Ca tu ya'alic ti'ob, ti' ja'aben ja'abe' ca u ka'ajbeso'ob u kiinilo'ob catorce yéetel quince tu winalil Adar

²² tu yo'olal tu tzelajo'ob ti' kiino'ob u aj p'eeco'obe', tu yo'olal xan ti' le winalo' le óotzil óolalo'ob bey le yaayaj awato'obo', suunajo'ob qui' óolalil yéetel u yawatilo'ob qui'imac óolalo'ob. Le kiino'ob túuna' u najmal u kiinbesa'al yéetel noj janalo'ob yéetel qui'imac óolal yéetel paaclam siibalo'ob, yéetel ca dza'abac yaatzil ti' le óotzilo'obo'.

²³ Le judíobo' suucchaj u beetico'ob le ba'alo'oba', je'el bix le u láak ba'alo'ob dzíibta'ab tumen Mardoqueoe'.

²⁴ Amán ca'ache', u aj p'eec tuláacal le judíobo', tu tuucul yaj ca'ach u xu'ulsico'ob ca tu beeta buulil, u ti'al u quíimsico'ob yéetel u xu'ulsico'ob;

²⁵ ba'ale' le ca j bin Ester tu táan ajawe', ajawe' tu ya'alaj ca dzíibta'ac tuláacal le kaas tu tuucultaj u beetic Amán ti' le judíobo', lúubuc yóokol le ti'. Bey úuchic u ji'ich'il u caal Amán yéetel u paalalo'.

²⁶ Tu yo'olal lelo', le kiino'oba' tu kaab'aintajo'ob Purim, le t'aana' ti' taal, ya'ab pur. Bey túuno', je'el bix le ju'un tu dzíibtaj Mardoqueo, yéetel tu yo'olal ba'axo'ob tu yilajo'ob yéetel le ba'alo'ob j úuch ti'obo',

²⁷ le judíobo' tu jedzcuntajo'ob le kiinbesajilo'oba', u ti'alo'ob, yéetel u ti'al u paalal, u ti'al xan tuláacal le tu sutkesa'aba'ob judíoil: ca u kiinbeso'ob tulácaal ja'abo'ob, bic p'áatac ma' u beetico'ob ti' le kiino'obo', jach je'el bix xan nu'ucbesa'anil ti'obe';

²⁸ le kiino'oba' j ka'ajsa'abo'ob kiinbesa'abo'ob xan, mantadz tumen taatatzilo'ob, bey tumen u ch'i'ibalo'ob, u ti'al ca u kiinbeso'ob ichil u cajtalil u yotochnáalo'ob, u táabal caajilo'ob bey xan ti' le noj caajo'obo', u ti'al ma' u tu'ubul mix bikiin ichil le judíobo', mix ichil u paalal.

²⁹ X ajaw Ester, u ch'upul paal Abihail, yéetel Mardoqueo le judío, yéetel u páajtalile' tu dzíibtajo'ob u láak ju'un u ti'al u jéedzico'ob le yáaxo', tu yo'olal u kiinbesajil le Purimo',

³⁰ ca tu túuxtajo'ob ti' tuláacal le judíob yano'ob ti' le ciento veintisiete u táabal caajilo'ob tu ajawil Asueroo', yéetel ma'alob t'aano'ob,

³¹ Tu'ux cu ya'alico'ob ca kiinbesa'ac u kiinbesajil Purin tu kiinil, jach je'el bix tu ya'aljilaco'ob Mardoqueo yéetel x Ajaw Ester u ti'al leti'ob yéetel u paalal, ca xan tu nupo'ob dze'edzec tzolbe'en t'aano'ob u ti'al ca su'ukinnaco'ob yéetel okom óolal.

³² Ti' u ya'almaj t'aan Estere' tu jedzcunt le tzolbe'en t'aano'ob u ti'al u beeta'al u kiinbesajil Purim. Tuláacal dzíibta'ab ti' jun wáal ju'un.