Daniel 12 - Biblia Maya

U dzooc kiino'ob

¹ Ti' le súutuco' bíin chíicpajac Miguel, nojoch ángelil ca'an, le máax canantic yéetel cu toquic a caajale'. Lela' jun p'éel u súutuquil yaayam, jun súutuc mix bikin úuchuc ca'ach u láak beyo' líikbal chúunic le múuch' caajo'obo'. Le quéen kuchuc le súutuco', bíin to'ococ tuláacal le a wéet caajalo'ob máaxo'ob dzíibta'an u kaaba'ob ti' le dzíibil ju'uno'.

² Ya'abcach ti' le cu wenelo'ob ti' le mucnalo' bíin ajaco'ob: jun jaatze' u ti'al u j cuxtalo'ob ti' ja'abo'ob mina'an u xuul, u láako'obe' u ti'al subtzilil yéetel noj sajaquil mina'an u xuul.

³ Le aj ojelo'obo' bíin léembalnaco'ob, je'el bix léenbal le ca'ano'; le máaxo'ob cu ca'anbesico'ob ba'ax tu beel ti' ya'abcach máaco'obe' ¡bíin léembalnaco'ob je'el bix le eeko'ob ma'atech u tu'upulo'obo'!

⁴ Ba'ale' teche' Daniel mucult le ba'alo'oba' yéetel dzáalkabt le ju'una' tac tu dzooc kiin. Ya'ab máaco'ob bíin u máanaco'ob tuláacal tu'ux táan u caxantico'ob u ya'abcuntico'ob u kaj óolalo'ob.

⁵ Teen Daniele', tin wilaj u láak ca'a túul máaco'ob wa'alacbalo'ob, tu jujun tzéel le áalcab ja'o'.

⁶ Jun túule' tu káat chi'itaj ti' le máac u búuquintmaj lino nooko', le máax ti' yaan ca'ach yóokol u ja'il le áalcab ja'o': ¿Ba'ax kiin bíin xu'uluc le ba'alo'ob jach jela'antaco'oba'?

⁷ Le máac u búuquintmaj lino u nooko' tu líikesaj u kabo'ob tu tojil ca'an, ca tu jalach t'antaj tu kaaba' cuxa'an Ku, ca tu ya'alaj: Ichil óox ca'a tac táancoch u máalal ja'abo'obe', le quéen xu'uluc u pa'abal u muuk u caajal Kue', bíin xu'uluc túun tuláacal le ba'alo'oba'.

⁸ Tene' tin wu'uyaj ba'ax tu ya'alaj ba'ale' ma' tin na'ataj mix ba'ali'. Ca túun tin káat chi'itaj: Yuumtzil, ¿ba'ax bíin úuchuc le quéen dzo'ococ tuláacal le ba'alo'oba'?

⁹ Le ti'e' tu núucaj: xíimbalnen Daniel, tumen le ba'alo'oba' u najmal a ta'acbesico'ob tac quéen kuchuc u súutuquil.

¹⁰ Ya'abcach bíin u mukyajto'ob le yaayaj ba'alo'ob a'ala'ano'obo', bíin p'áataco'ob utz yanilo'ob yéetel utzil chuca'ano'ob. Le j loolob máaco'obo' bíin u beeto'ob ya'ab meyaj loobo'ob, ma' tu páajtal u na'atico'ob ba'axo'ob cu yúuchul, ba'ale' le aj ojéelajo'obo' bíin u láaj ch'a'a nu'ucto'ob.

¹¹ Mil doscientos noventa kiino'ob bíin máanaco'ob, líikbal ti' le súutuc quéen a'ala'ac ma' u ku'ubul le sáamsamal quíimsbil ba'alche' yéetel quéen dza'abac le p'ecbe'en manba'alcunaj tu kulnaj Yuumtzil.

¹² Qui' u yóol le máax cu pa'ataj yéetel ocsaj óolal tac quéen máanac le mil trecientos treinta yéetel cinco kiino'ob.

¹³ Ba'ale' teche' Daniel, xíimbalnen tac ta xuul yéetel je'elsajbáa, tu xuul le kiino'obo' ca líikil u ti'al a kamic a bo'olal.