OBADIAH 1 - KHYINGEI PU'TLOU Bible (BSI)

Obadiah'yei Kar'ankmu, Heirou Edom'ya Tanti Pirou

¹ Awari Obadiahni kanre-kandangni kar'anbi mukur tlou: Pu DUNPUni Edomei ngamrou atoubine shunlei. “Kane Umpurei paokhat yunkril mayekurla; heitoubi paocha thimi khatkhi Lim dei rapbei hangra yenmalhetdurla; ‘Kanthouwalo! Heitoubi kani aidoura raal youlakase!’

² ‘Thilak, neiyari Keine Lim dei rapbei hangra namsundabine mandiyerrou, heitoubi naya thuithini marhotyerrou.’

³ Ngamri neiyei ukningrei tangchakur heiwani neiya minammurla; thlungkhan kallera yulbi klei thimirap nani, heirou lhungdou chounara paalbi klei thimirap nanikhi, mimiyei solungra ningchabine, ‘Huni kayari taangsundachangrouwo?’ toubine yunlei.

⁴ Nangni neitamtom malaangnak choune kanthum'bangbinekhi, heirou nangni sorwa rapbei hangra neiyei rabu shulbinekhi, bi heirouwei Keine neiyari tangsundarou,” toubi Umpune shunlei.

⁵ “Mucha thimi rapne nanungei wabine, masanung naicheem nambaibine yaiyei pamcha putchei rapya robongyen khrokloukur nimakka? Heirou darkha hei lamu thimi rapnekhi nanungei wabine, yane hei lamuyeinung yai urchangei'mkhei lalouheibi, heitolchatom horkhoupikur nimakka? Heinaksi kheenrouri nanungei kounak lah'knaei shakrung hoirouwa?

⁶ Esau'ya kounakei thuithini marhotdurbi, heitoubi aiyei sina-lapa, lalthumrap nammakhi khrokthutloubi urloukur nimakka?

⁷ Nakou yakantlangril thimi rapne nayari minambi ramrui ri-wadongnara ilthutrouwa; heirou nale kyingni leimalkna palui-teinao rapnekhi nayari minambi, heitoubi naidoura holbaangbine yanimakni leiwurchiya; naiyei ukchakya chamaibi klei thimi rapnekhi naya mangyernanungei chang kambine leiyura; heirap heiri na hunekhi muchangmakrou.

⁸ Heiyei tlaini heirouri Edom'rei shingkhei thimi rapya, heirou Esauwei lhungdourei phabda mukhei thimi rapya Keine maangyermakrouko?” toubi Umpune shunlei.

⁹ “O Teman, neiyei lhouwa rapri chi-mathunwurbi lhawai larouwa, heitoubi dongnarari, Esau'yei ram lhungdourei thimi namyerwa heiri raalla tumni hatchirouwa.”

Edom'ya Tanti Pinungei Ngam

¹⁰ “Neiyei teinao Jacobei thimi rapbei doura nangni raal dabine hatdurpinei ngamni, neiyari rikrai phayerrouwa; heitoubi neiyakhi klui naimakne maangyerrouwa.

¹¹ Yeekna thimi rapne yaidoura raal dabine yaya raal manlouninung nari manak khatra tlatni kartleiwurbi heileikur; heirou miram-mithrillei thimi rapne yaiyei palshung nambaibine wachangbi, Jerusalemei lalthumrap, sina-lapaya khrokthutbi yaitam yerkhairillei'nungkhi, nari yeekna thimi rapyakhi duini khramtangni lunrilkur.

¹² Neiyei teinaowani likarsui theewurbi klah dawurni'nungri, nani yaidoura thibine hutkantumbi leiwurnung bomri thukmak; heitoubi Judah'yei chanao rapne deekbai thukninungkhi, nane thibi naimalung pilbomri thukmak; heirou yane klah-mrim dayeinungkhi nane thibine nai ukningra tangchanungei bomkhi thukmakrou.

¹³ Keiyei thimi rapne deekbai thukbine mangkur-taakkur tlainiroukhi nani yaiyei shumtrumra wachangbine heiwaya thibine mulleibom thukmak, heirou yane klah dawurbi leiyei kheenroukhi nane yaiyei putchei rapya naihutni palbine mulouheinung bomkhi thukmakrou.

¹⁴ Heirou yaihangrei trukyulbi himalei thimi rapya hatnanungei toubi nani lamsora omngakbine leinungei bomkhi thukmak; heirou yaiyei deekbai thuknarei maleithung putchei rapyakhi miyei hutra pilhakurnungei bomkhi thukmak.”

Umpu ne Limdei Rapyakhi Pichar Tourou

¹⁵ “Kouweiyo toulanungri, Umpuei tlaini heiwari Limdei rapnungeikhi yennakura: Neiyei toukur heinakrimni, neinungeikhi heisi toupieirou; heirou neiyei churkhounei klah-man hei heiwari neilu doura yenkallengthurou.

¹⁶ Kouweiyo toulanungri, nane Keiyei Khying Lhungdoura chamalip-maimalipbi leinei ngamrou, naya karhillei klei Lim deirap nammanikhi kalleng-kalleng chamalip-maimalipbine leiwurchiya. Yaitamni chamalip-maimalipbine heisi yendumlhakrouwa; heitoubi yayari tekkhi muphamakni maangurchirouwa.

¹⁷ Heiya Zion'yei Lhungdourari Ralthutpina bom hoirou, heitoubi bi heiwari Khyingei bom hoirou; heitoubi Jacobei yu-cha rapne yaiyei ramya kalthungthurou.

¹⁸ Heirou Jacobei bommairi meibom hoirouwa, heitoubi Josephbei bommairi meithlan lamthutrouwa; heitoubi Esau'yei bommairi sapul kunnakni kaangtum'rouwa; heirouri Esauwei thimi rapri khatchatomkhi maleithungmarou,” toubi Umpune shunthutkhoulei.

¹⁹ Heitoubi kulrel lhangrei touri Negev'rei thimi rapne Esau'wei lhungdou ramya kalthungbi yul darouwa; heitoubi Philistine touri Shephela phaikarei thimi rapne Ephraimei phailou raple heirou Samaria'yei phailou rapya kalthungrouwa; heitoubi Benjamin'yei chanao rapne Gilead ramya kalthungbine yuldarouwa.

²⁰ Halah'ra raal manloukur Israellei raallui rapne Canaania'yei ram Phoenicia'le, khalu lhangrane Zarephath kaphane ram kalthungrouwa; heitoubi Seraphad touri Sardis'ra raal manloubi leikur Jerusalemei thimi rapne khate lhangei Negebei khukarthil rapya kalthungbi yul darouwa.

²¹ Lhukthutpi pu rapne touri raal mane thimi rapne Zion Lhungdoura kakabi, Esau'wei touri Edomei doura raal maniwurbi paalrouwa; heitoubi Krungbom heiwari Umpuei hoirouwa.