MARK 1 - KHYINGEI PU'TLOU Bible (BSI)

Yuiluppi John'ne Pao-laa Shunthutpi

¹ Dunpuei Chanapawa Jesu Christaei lhangai paolaa waiyouna.

² Isaiah Thimkhuini mayekhounakne waiyoulei, “Dunpune shunlei, ‘Thilak, Keine neiyei maibongra Keiyei paocha thimi khat naiyei lam latpinanungei yenmalhetlei.’

³ Hukhatne ramthingra ungraochane yunlei, ‘Puei lam loumanringlak; heirou Aiyei chananung lamlhun maryengyerlek!’ ”

⁴ Yui luppi John'ne ramthingra yui luppibi heirou tlou shunthutnungei hungthuklei. Ane yanung kyun, “Borh lhoutou donglaka heitoubi yui luplak, heirou Dunpune naiyei borhya kukpirou.”

⁵ John'yei tlou ningnungei Judea ramrei heirou Jerusalemra klei thimirap beimak chungne wathuk. Heirou yane borh tounarei ukning hungbine heirou John'ne yaya Jordan kungra yui luppikur.

⁶ John'ne Ut'khmullei kyek phiya upbine, an'unyei shintlakrui yeetbine, heirou ane khuiningle khaoya chamaikhou.

⁷ Ane thimi rapnung shun, “Keiyei hilla hungrou kyou thimi heiwari keiya duine tanglei. Keiri Aiyei khorkhangrui'hakma sutroukhi kei'mtik maklei.

⁸ Keine naya yuira luppilei, heirou Ane naya Lhawai Khyingni luppirou.”

Jesu'ya Yuiluppi Heirou Aya Malhim

⁹ Bei'leibi Jesu'ne Galilee'ra klei Nazareth ramrei hungbi John'ne Jordan kungra yui luppila.

¹⁰ Heirou Jesu'ne yuirei kathukle tallengne Ane Thangmun cheemkhar laatkur heirou Lhawai Khyingni mathru'nakne Aidoura kyong Ane loukmu.

¹¹ Heirouri Thangmunrei hou khatne yukpao, “Nangri Keiyei malungshi'kna Chanapawame, Neiya Keiri beimakne malung khrahwura.”

¹² Heirou tallengne Aya lhawaini ramthingra ruilouheila.

¹³ Heirouri tlaini somlini Satan'ne Aya malhimwurla. Bi heirou ramyaa rapkhi bil-klei, heirou Thangring rapne Aya trungpikur.

Jesu'ne Thangapha Napung phaliya Ungpi

¹⁴ John'ya kulrilra khoukur hillouri, Jesu'ne Galilee'ra hungbi Dunpuei Lhangai Pao-laa shunthutpikur.

¹⁵ Ane kyun, “Dunpuei Krungramri nakkura! Nane naiyei borhya lakurkhoubi Lhangai Pao-laaya uklumlak!”

¹⁶ Jesu'ne Galilee'yei Samadru ruira chayeinung Ane thangapha thimi napung-khni, Simonle ainaowa Andrew'ne ling khingbi louklei Ane wamukur.

¹⁷ Heirouri Jesu'ne yakhu teinaonung shun, “Keihilla chanthungalo, Keine naya thimi kman thangapha hoiyerou.”

¹⁸ Heirouri tallengne yane ling horkhouwurbi Aihilla chanthungura.

¹⁹ Heirou Ane beicha wabi Zebedee'yei chanapawarap James'le aiyei naowa John yakhuya wamuwurthu. Yane mali doura ombine ling thruibi louklei.

²⁰ Jesu'ne wamule tallengne yaya hei'ungkur; heirou yakhu teinaoni yai pawa Zebedeeya kneek thimi rapkou mali doura lakurkhoubi Jesuei hilla chanthungkur.

Hyingmak Lhawai Tung Thimi Khat

²¹ Jesu'ne Aiyei ruishik rapkou Caperna-um'ra hungkur, heirou thangei Mathrilna tlainirou Jesu'ne Pukhrumna Synagogue'ra wachangbi shunmatupi youkur.

²² Aiyei shunmatupiya mayekkur thimi nammane beimak ngakura, kouweiyo toulanungri Aiyei yunthut-yaithutkur heiwari ayillei Tloulamya marnopi thimi'yeinak nimakne krak-mantrangne tloulam rapya shunpilei.

²³ Heirou lhangaimak lhawai changbi klei napawane Pukhrumna Synagogue'ra wabi ungraochakur,

²⁴ “Nazareth'yei Jesu, nangni kaya koutourou kyouwo? Kaya maangyernungei Nang bi arou kleiko? Nangri huwo touri keine mulei- Nangri Dunpuei Khying Paocha thimime!”

²⁵ Jesu'ne aya tamlhakbi shunkur, “Mulleiya, airouwei thukkurlaka!”

²⁶ Heirou lhangaimak lhawai heine napawa heiya kanthingyerbi ungraochane wathukkur.

²⁷ Thimi nammane beimak ngakurbi yaitamne yunkril, “Awari kouwo? Ari rannei shunpi tlou nimako? A thimine lhangaimak lhawai rapbei doura mantrangei chaypi manilei, heitoubi yane Aiyei shunya chanthunglei.”

²⁸ Heirou Jesuei ngamrou Galilee'yei bi kantangrou karyouni beimak khrangne mayekura.

Jesu'ne thimi Kounakya Kna Raiyerpi

²⁹ Jesule Aiyei ruishik rapne Jamesle John kyaone Pukhrumna cheemya lakurkhoubi Simonle Andrewei cheem lhangra yengdang wakur.

³⁰ Simonyei Pipeeni kanchun nawurbi louklei, heirou Jesu'ne wathuktir tallengrou Anung loushunpikur.

³¹ Heirou Jesu'ne wabi aiyei hutra churbine taangkanthoupikur. Heirouri aiyei kanchun'kna heiri damkur, heitoubi ani yaya watlhou toupikur.

³² Tlaini heiyei rawainung kna thimi, heirou lhimpop thimi kounakya yane Jesu'nung heiurlhakpikur.

³³ Ram heiyei thimi namyerwa cheem heiyei yuntlangmaira kartilkur.

³⁴ Heirouri Jesu'ne lim-limyei kna thimi kounakya damyerpikur, heirou hyingmak lhimpop thimi kounakya hulthutpikur. Ane lhim rapya tekkhi yunyermak, kouweiyo toulanungri yane Aya huwo toubi kmu.

Jesu'ne Galilee'ra Pao-laa Shunthut

³⁵ Ningshun manma kinni kathukbongnung Jesu'ne kanthoubi cheemrei wathukkur. Ane wathukbi houdaina bi khatra shunchakur.

³⁶ Heirou Simon'le akou kalhonbi klei rapne wabi Aya raphakur,

³⁷ heirou yane muwurbi Anungei shun, “Thimi nammane Neiya thiphabi leilei.”

³⁸ Heirou Jesu'ne loumallang, “Kane akullei klei yultlai kantangra charou dalei. Keine yanungeikhi paolaa shunthutrou, heinung'tlim Keine kyong.”

³⁹ Asitoubi Ane Galilee'yei bi kantangra chabi Pukhrumna Synagoguera paolaa shunthutpi heirou lhimpop thimi rapkhi hulthutpikur.

Jesu'ne Kna Thimi Khatya Toudampi

⁴⁰ Raichi pat thimi khatne Jesu'nung hungbi khuklu kanthrunchabine buchakur, “Nangne kringpianungri, keiya touhyingpikur manime.”

⁴¹ Jesu'ne kringpibi Aiyei hutne aya palbine shun, “Keine yapiwurla, neiyei kna heiri hyinglakasu.”

⁴² Heirou tallengne napawa heiyei raichi pat heiri hyingura.

⁴³ Jesu'ne aya rekrek shunbi tallengne malhetkur,

⁴⁴ heitoubi anungei shunthungkur, “Louninglak, nangni thimi hukhatnungkhi yunpimak. Heiya nangni Suipi punung wabi mutpilaka, heirou neiyei raichipop kna heiri dammurame toubi munanungei Moses'yei shunkur heinakne makatlak.”

⁴⁵ Heirou ani chawurbi bi kantangrou paolaa heiya shunthutkur. Heitounei Jesu'ne ram heirou kandangni karwaicha yamakura. Heirou Ane thimi makna bira kanshangbi leiyeinung bi kantangrei thimi rapne Aiyei leinara wakur.