DANIEL 1 - KHYINGEI PU'TLOU Bible (BSI)

Israellei Kartlang Douwa Napung-phaliya Babylon Krungbomra Khalbaangkur

¹ Judah'yei Krung Jehoiakim'ne krung hoiyei kum-khyum tlungei kaallou Babylon'yei krung Nebuchadnezzar'ne Jerusalemra kabine Kholil heiwaya kuikoolkur.

² Heirou Umpune Judah'yei krung Jehoiakim'ya, Pucheemrei phuwan-shungyang thale kalhonne Nebuchadnezzar'yei hutra pilhakkur; heirou ane heirapya Shinar ramra yenheikur, heitoubi heirapya ani aiyei thraishangei lalkeira khoulhakkur.

³ Heirouri Krungne aiyei lhou'urpu rapbei upa Ashpenaz'ya shunbine Israellei chanapawa thayale Krungcha raple Krungei cheemmairei lhou'urpu thale kalhonne yenruilhakyerkur.

⁴ Yaihangra kartlanga sharungra chiremak shakrung lhangai, heirou roushing'rakhi manthirmak shingkhei, phabda, yrathimak, krak thimirap, heirou Krungei pichar bomra watlhou lammit kmu thimi rapya ungbine yenruilhakyerkur. Heitoubi Krungne yaya yanungei lailik miyekle heirou Chaldea rapbei tloukhi marnopinanungei chay pikur.

⁵ Heitoubi Krungne yanungei tlainiserrei chaanung-mainung Krungei madu chaak-an, heirou tulya khalthutbine thulpikur; heitoubi kum'khyumyei rilla yaya marnopibi, heirou kluiyei kumrouri yaya Krungei pongra unglhakbi watlhou touyernanungei khalthutkur.

⁶ Ya rapbei hangra Judah'yei chanapawarap Daniel, Hananiah, Mishael heirou Azariah kyao.

⁷ Heirouri watlhousil upawane ya rapbei min ran khatsol thulbangpikur. Daniel'ya ‘Belteshazzar,’ Hananiah'yani ‘Shadrach,’ Mishael'yani ‘Meshach,’ heirou Azariah'yari ‘Abed-Nego’ toubi min thulbangpikur.

⁸ Heiya Daniel'ri aitamei ukningra ningchabine ‘Krungei maduya khalthutkur chaak-anya chamaibi, heirou aiyei mongnarei khaithutkur tulya mongbine kei'mshaya touborhmakrou’ toubine mayungkur; heisitounei ane lhou'urpu upawanung shunbi ai'msha aitamne heinaksi chamaiput rapne touborhmakeise toubine shunchakur.

⁹ Asinungri Dunpune Daniel'ya Krungei wattouwa upa rapbei chaylampu upawaei mit'thrilnara malungshi'kna heirou kringkna pukyerwurla.

¹⁰ Heirouri chaylampu upawane Daniel'ya shun, “Keiri Pu Krungya chiwura, ane keiyari naiyei chamai'nungei chaak-an heirou mongnungei tulya shilthutbi thulpina'nungei khalthutbine silnakur. Heineri kounakpi nangne chamaimakne manthirwurbi neiyei lingthral rapya marnam phamakanungri, Krungne mulhaklanungri keiyei luri thleira damakrouwa?”

¹¹ Heiya Daniel, Hananiah, Mishael, heirou Azariah'yei doura thikulpipu khoini chaylampu upawane khalthutbi watyilkur napawanung Daniel'ne shun:

¹² “Kringpibi kaya tlaini chipni tomcha chaangh thipilak. Kaiyei chamainungei anna-lounale, mongnungei yuidingyatom marshikbine thulpilak.

¹³ Heitoubi nai maibongra urlhakbine kaiyei sharung-mairung rapya thipilak; heitoubi Krungei madune khalthutbi thulpikur chaak-an rapya chaa'kmai heirou mongnarei khaithutpikur tulya kmong kartlang douwa raple kaya thimarhilnapilak. Heitoubi neiyei shokrap kayari kousi muleiyo toubi martambi thipilak.”

¹⁴ Heisi tounarouri ane heiyei ngamrou yai kyunya ninglhakpibi, heitoubi tlaini chipni tomcha yaya chaangh thikur.

¹⁵ Heirou tlaini chipni tlungkur heirouri, thiyeinung Krungei maduya khaithutpikur chaak-anya chaa'kmai kartlang douwa rapyari ya rapne dui sharung lhangaini muwura.

¹⁶ Heitounei lhousilla pu heiwane yanungei khalthutkur chaak-an rapya yanungei thulpinarei dongura, heinung'tlimri anna-lounaya, heirou yuidingyatom yanungei thulpikur.

¹⁷ Heirou ya kartlang douwa napungphali rapyari, Dunpune yanungei lhoulam kantangya mulhakchangnei heirou lailik marnonara heilhaknei khyal-roushing pikhou; heirou Daniel'nungeiri kar'anmunei heirou rmong kmanya namma muchangnei khyalkhi pikur.

¹⁸ Heirouri Krungne yanungei kartinpikur tlaini hungtlungkur heirouri, lhou'urpu upa rapbei chaylampu heiwane Krung Nebuchadnezzar'yei maibongra yaya urthutpikur.

¹⁹ Heirou Krungne ya rapya murilbi thikur. Heirouri yaihangra Daniel, Hananiah, Mishael heirou Azariahnaksiri lhangai-shingkhei deiri hukhatkhi yaomakkur. Heisitoubi yaya Krungei pongra wattouwarap khoini khalbaangkur.

²⁰ Heirou lhoulam lammit kantangra, khyal-roushingei ngamroukhi Krungei martamkni, ngaithi'kni lammit kantangrou Krungkullei klei thuikhei thimirap, shingkhei thimirap nam'rouwei ya rapne sirukchip traiduikur.

²¹ Heisitoubi Daniel'ne Cyrus'yei Krung khoi lamkri kum phane leikhou.