Yihuta 1 - Mataafa Qulqulloota

¹ Erkana ana Yihuta, orxaytase a Yesuusi Kiristoosi ka inna a opa Yayqoopi kodde kapaayye, ishina halaame Waaqa Aappa ka ishin jaalade, Yesuusi Kiristoosi ka ishin tooyte piisa erkame.

² Diissata ka nakayta isho jaalala a ishina' koopen.

Kollissampaya a darta

³ Moottadaayye! Se turanne qoota dinase an oltura qapnooti desa ishina' taafeeta a kuttati in fade, amma xoori amanteetase a Waaqa samaytaadi takkan daashe ikka oppa' oora in qapnini desa akka a kuttati soottane'e dehaamose ishina' taafeeta'e irreeta ana qara ca.

⁴ Akkima ishootta qara' faratamto, orra a xattaaw ishootta qara' taafamte demo lohe ka ishin karopa kulle. Ishootta orra a Waaqa waaqumsanni in kinnin ka daassatase a Waaqinno wa ishin nyalaasso koda kammaaw caadaneeti' kodanno ka Yesuusi Kiristoosi isase a isha' patta mukissampaytinno ka Poqallaanno kodde marmanno.

⁵ Kadi punu turanneew sede piisa uptan nefooyye, Poqalla akkima samaytaadi piita Kipsi kara sookshe ka ishoottan pahade ka kuli kammaayye an amannini pashshe, matte ishina oorissan heena.

⁶ Akkimoose' mina'ew erkampattoowwasene ulfinaaysho'en tooytannini ka poraaysho a ukkumeeta alle' diishe matte oorsadaaw; haka kuyyaatase kutta a firteeta' kaynitto kara'e, Waaqa hida a paraparatinni akka tukkanta nan kiite kara' jarane kode.

⁷ Akkimoose mina'ew Sotoomi ka Kamoora isho katamadda ishootta kapandesa ca sharmuutta kodden ka ollin mukitta a uumatoppa in kinnin ollin muken. Ka semmalla orra apittase a parapara oppa' kupado'e pahana kodden.

⁸ Akkimoose mina'ew orrose olsaasso kamma pora anni ka dakintaaysho nyalinni umma ukkumampaya' ajajammi in caan ka a moonteeyye ulfeena qapa' kuli onni.

⁹ Mika'eeli saarase a erkampattoowwa mikka, ete pukka a Muuse qaraayye seetana oli shiisheneeyye, “Poqalla a ke fukko” Ishi' kide diisheey, afa otitta ishi in haasawanne.

¹⁰ Orrose' xoori wa matte in qapnini onni. A pinaana mattan dikatta in qapnini mina'e, kadi punu wa uumatan ishootta dakaannaatin wa upane caan nefooyye, ishinni patan.

¹¹ Qoota saanta Qaa'eli oppan aanen malla ka kaaja malla kiden ka kammadapayta Pele'aamippa' pi'en malla ka akka Qore tiyya' xa'e mina tiyya' xa'en ka piramen malla, oo ishootta kido!

¹² Orroose fuura mali nyala koono, oto sankulta takkumtaayshina oppopa deaneyye, kehayta ishina' koddini. Ishootta sikmaya issiiw sikinna. Ishootta oraara roopa in qapnin ka xayxaytan haadamma mina; ishootta eta a luukata palinitto nefooyye qoyra a qara luukkata kinnaanni in kinnin a hittinan shukkame ka lakkin to'e mina.

¹³ Ishootta puppeeta pakateeta a akata yaaqyaaqnitto mina ka kodaaysho a jeera kela rampaya puufanni; ishootta hiikka pora rarraataawna a tukkanta nan kiite haka paraparati ishootta asannitta' mina.

¹⁴ Henookise Attaami kamma xelta tappatta oppa delade, ete haasawannooyye ikide, “Tin Waaqa orra piisa qara' farata'e, erkampattowwaadi a qulqullaawe a dikoota in qapnini olli de'a.

¹⁵ Ka isasene Waaqa waaqaysanni in kinnini kodaaysho a neeqa a koden minan ishootta qatta'a. Waaqa dukaatanne juppoolayoosen isha fuurri in kinnini qara'e, waasene neeqa a isha qara' haasawadene piisa minan farata.”

¹⁶ Orroose, awta piisa qoojqoojni; umma we takkan nefo oppa' xasoonni in caan ka xajeeltaaysho a neeqa kammaaw anni; Afaasso isi peepanne immakaaden ka issi we akkatta malla orraaw pora peepni.

Kollissa isho dehaamta a tura desa daasame

¹⁷ Ishina' moottadaayyooyye! Xoori qaaleta a turan erkamampayasene a Poqallaanno a Yesuusi Kiristoosi haasawaden matte oorsada.

¹⁸ Ishootta i'ishina' kidene, “Sapana piraampiratiiyyi seesampaya a heenna Waaqa' kapa sekaade ka xajeelta a neeqa a mattaayshoti kammaaw anna'e de'a.”

¹⁹ Ishootta orra olkelan orra dapno ka xajeelta a so'a kammaaw anno ka Hapura Qulqulloota'en qapnin.

²⁰ Ishina' moottadaayyooyye xoori, we' piisa turanne amanteetase' xaayshin qulqullaawtenne isi kokkonnassa' japaada ka hupna Hapura Qulqullootatin qinsada.

²¹ Ka akka Poqallaanno Yesuusi Kiristoosi diissataadin caatta parapara oppan ishin kayo asattaanne, jaalala Waaqa kara isi tooyta.

²² Orra dikatta lakki qapo suraysada.

²³ Ka deemo apittoppa sooksha ka ishoottan paha. Ka deemo fuuran ishootta suraysada. Ma xoori japara a dakintase' xaaysho juppootan nyalte quda kaye kuli needdada.

Qinseeta kalata

²⁴ Isase akka a' piinini ishin kodo ka a qaja in qapniniiti ishin kodo ka xasan ulfeenaadi turopa ishin dehassa ettansho'e,

²⁵ Waaqase a isha patta dinshampaytinno kodde'e, Poqallaanno Yesuusi Kiristoosi qudanne, a xattati paayyatte ka amma ka haka paraparati kuli ulfeena ka kuttumta ka hupna isho ukkumeeta a isha' kodden. Ameen!