Mataafa Otoowwa a lammatta 1 - Mataafa Qulqulloota

Akka Selemooni ookuma qinsade

¹ Selemooni inna Taawwiti ka mankisteetaadi kokkonnayshe; Waaqa Poqallaadi ka isha olli caade ka nama kutta a kurraadi dakaanno isha kode.

² Nuqusase Selemooni ka Isira'eeleta pisa'e ka shaalaqadda'e ka motoloqadda'e ka taanynyada'e ka saarra piita' piisa isho mattiyya a toolla Isira'eeliti' haasawade.

³ Tukkanase a Waaqa a orxaytase a Waaqa Muuse koommaytoppa' kode, qoota porase a sakatatta kunkunnaata Kepa'ooni qara co malla, Selemooni isho samayta piisa ka ollin eeyyepa aanen.

⁴ Seturanne Taawwiti Qiiriyaatiyaarimiiyyi taapotase a Waaqa' qeede ka tukkanase a Yursaalami kara ishi' daape ka ishi harmishe karopa kalshe.

⁵ Ma xoori Paasili'eeli oopa Huuri innasene a Uuri porase a kalisoota a sipla oppa kode, Kepa'ooniiyyi tukkana a Waaqa tura ca; Selemooni isho xorase a samayta ka eeyyepa sakatatta aanen.

⁶ Selemooni ka fuula Waaqa tura'e, porase a kalisoota sipla oppa kodame ka tukkana Waaqa tura co turopadela fayyade ka qara' kalisoota kupannitto'e, horeeta kuma takka qale.

⁷ Halkeesse oppaayyeew Waaqa ka Selemooni tura' akkaade ka ishi' kide, “Akkan ke' daasho'e, wa' faanitta piisa ana kaassado.”

⁸ Selemooni ka Waaqa' kide, “aappinno Taawwiti'i paxaarumta kutta' koote ka pakkaadi oppa ana nuqusumisse;

⁹ Waaqqo Poqallaayyo; qoota samayse lekuma hinkaajjeta paho qara ana nuqusumisse malla, kippeese a' aappinno Taawwiti' daasse kokkonnayshe

¹⁰ ka akkan samayse mukissa ettansho'e, ookuma ka upna ana' daashe; a taakkati samayse' xaayti asse kutta ayno mukissa ettansha?”

¹¹ Waaqa ka Selemooni' kide, “Qoota teyanta ka qapna ka ulfeena isho akka nyaapaayti piramo taaki akka para a dera kallaatto issi'i a' qinsannin malla ka samayse xayyo an qara ke nuqusumshe mukissa'e ookuma isho upna qinsatte ka turanneew sede karittoppa qapto malla,

¹² anti ookuma isho upna in ke' daasha ka teyanta ka qapna isho ulfeena a nuqussa ke turan kallaade in teynin a ke kammaayye xa'e kuli takkan nefo ka in qapnaannini ke' daasha.”

Selemooni akka nama kutta kodde

¹³ Selemooni ka Kepa'ooniiyyi kunkunnaatase a sakatatta a qaraayye tukkana Waaqa cooyye xa'e ka Yursaalamipa kale ka Isira'eeli qara' nuqusume.

¹⁴ Selemooni ka sarakelladda isho fartada ollopa pootade ka sarakella kuma ka dippa afuri ka farta kuma kudanka lakki qapa ka ishootta qeede ka katamadda sarakella isho katamasene a Yursaalami a isha' kara kala kara' xaaye.

¹⁵ Nuqusase Selemooni ka Yursaalami kara'e, akka warqeeta ka dakara pirreeta a horoora mina koopto' kode ka akka qora talta irrowwa a Yihuta kelandesa a leya mina lekaadane' kode.

¹⁶ Selemooni ka piita Kipsi isho a Qeweetitiiyyi fartada here; a piita Qeweetiiyyi herina kan nakkaatewwasene a nuqusa.

¹⁷ Ka piita Kipsitiiyyi sarkella takkan dakara pirreeta sheqileeta dippa lehin piddini ka farta takka dakara pirreeta sheqileeta dippa ka kunda kenin piddini ka turaayye tarpinniiw ka nuqussa a Hittaata isho a Sooriyaati' kanni.