Mataafa a Nuqussa a paayyota 1 - Mataafa Qulqulloota

Akka Taawwiti kere

¹ Nuqusase Taawwiti ete kereeyye, parraadi ka ollin sekaadeneeyye, kade punu qeppada isha qaropa pootaneeyye, isha foolli in kitto.

² Semmalla orxayaadi ka ishi kidine nuquso ino enenta xayyoolayteeta a issin kitto ke faano ikka ke nuqusa poqallaanno kapa caato ka ke qara tooyto ka ke quda mukto ka ke foolisso.

³ Ka piita Isira'eeli pisa oppaayye, xarjaallitteeta enenta pora faden ka Sunaamitteetase Apisa kidammitto teyen ka nuqusa ishin de'en.

⁴ Enentase nefo akatan xarjaallitteeta ka nuqusase kapa caanni ka qara tooyni. Ma xoori nuqusa isheetta oli in mukne ka iskatteeta'en kodanne.

Atooniyaasi nuqusa kodda'e heenna qapa

⁵ Atoniyasise a “Hakiti” Xaayte “Nuqusan kodda” Kide ka xa'e ka sarakelladda ka fartada isho nama kunda keni a isha turandesa hiro harmisade.

⁶ Umma aappaaysho Maane asse kooni in kiine ka isha in peeqne; Atooniyaasi nefo kussitta Aapeseloomi ka akatan xarjaallitta.

⁷ Atooniyaasi Iyyo'api inna Seruyya isho qeesittase Apyataari olli oorsade. Ishootta ka isha quda kodden.

⁸ Ma xoori eqeesittase Saadoqi ka Pannayyaasi inna Yotahi ka xuumampaytase Naataani ka Saami ka Ree'i isho tooytampayta Taawwiti Atooniyaasi quda in koddine.

⁹ Atooniyaasi ka Aynirokeli kapaayye shila Sooheeliti kapa'e, xormada ka mirkowwa meere isho kaharra lekaya kalisoota qale. A hellaa nuqusa piisa isho orra Yihuta a tika nuqusa kara saarummo piisa hale.

¹⁰ Ma xoori poroose oppopa xuumampaytase Naataani taaki Pannaaya taaki orra tika nuqusa tooytino taaki innaasso Selemooni in haleene.

Akka Selemooni nuqusa kodde

¹¹ Sekkammaayye Naataani ka Persapehi ayya opa Selemooni kapopa aane ka ishetta kide, “A poqallaanno Taawwiti in upnin maliiyyi akka Atooniyaasi inna Hakiti nuqusa kodde hela a dakayne?

¹² Amma atta akkima issi ka innaatti Selemoonin pahato ana ke dehaamo.

¹³ Taawwiti kapopa aane ka ishi kide, “Nuquso atana i''ana kiite, ‘Innayti Selemooni pakkaayyoppa sufaaniyyo qara nuqusuma.’ Ka ana xaxatte ka kuli atta Atooniyaasi nuqusa kodde?

¹⁴ Anti nefo oto atti nqusa kapopa kullito ka eyye haaswatta oppa kittaneeyye eennowwen ke kamma desa kulla ka wa atti isha lelte akka dukaata kodden fayya qara kokkonnaysha.”

¹⁵ Persapehi ka alleetase a kela nuqusase kere co Sunaamitteetase a enenta Apisa ka eeyye isha qara tooynitto kelopa isha hasawsiissa kullite.

¹⁶ Ka xata kiite ka nuqusaseti kaareeta oorisse. Nuqusase ka isheetta kaassade ka kide maana faani?

¹⁷ Isheetta ka ishi kite, “Poqallaayyo atti ke ana orxayteetaayti kide, innaatti Selemooni pakkiyyoppa nuqusuma ka sufaaniyyo qara kuti'a ka Waaqa Poqallaatti tura ana xaxatte.

¹⁸ Amma xoori Atooniyaase nuqusume; nuqusa poqallaayyo umma atti sede a upto.

¹⁹ Isha xormada ka mirkowwa meere ka kaharra lekaya kalisoota' qale ka oppopa hellaa nuqusa piisa ka qeesittase Apyataari isho saara a xelaayti a oranna Iyyo'api kuli hale ma xoori orxaytaayti Selemooni in haleene.

²⁰ Amma nefo poqallaayyo nuquso ke kammaayye, ayno akkima sufaanaayti a poqallaayyo a nuqusa qara kuti'o akka lelto'e ilda Isira'eeli piisa kepaaw tooyanni.

²¹ Poqallaayyo oton sede ammaaw oli kela a oorinniniiyyi ka xata tootaayye, ana isho innaayyo Selemooni akka dapampaya mina'en dikamma.

²² A ishetta nuqusa haasawatta qara kittooyye, xuumampaytase Naataani ka desa kaye.

²³ Ikka nuqusa lelen ka kidene, xuumampaytase Naataani arepa de'e. Nataani ka nuqusa kapopa kulle ka fuulaadi piitan kaye ka ishi kaareeta oorshe.

²⁴ Ka nuqusa kide, “Poqallaayyo nuquso, hela ana kammaayye Atooniyaasi pakkiyyo oppa nuqusuma ka sufaaniyyo qara kuti'a ikiite?

²⁵ Ha isha awwe opaxata lekkade ka xormada ka mirkowwa a meere ka kaharra lekaya kalisoota qale. Ka hellaa nuqusa piisa ka Iyyo'api saarase a oranna ka qeesittase Apyataari hale. Ishootta amma isha olliiyyi damta ka ikkayta qara caan ka kiini, ‘Atooniyaasi a para kuma nuqusumo.’

²⁶ Ma xoori ana orxaytaayti ka qeesittase Satooqi ka Pannayyaasi inna Yodaahe isho orxaytaayti Selemooni in haleene.

²⁷ Hela kuli poqallaayyo nuquso, sede ke asse kode ka a ino orxayaatti a lellin mali akka Atoniyaasi ke kammaayye sufaaneta poqallaanno qara kuti'o kode.”

²⁸ Nuqusase Taawwiti ka kide, “Persaapehi ana hala.” Isheetta ka nuqusa turopa deete ka fuulaadi tura qa'atte.

²⁹ Nuqusase ka xaxade ka kide, “Waaqase rakkoota piisa kela anan pahennen xaxanni.

³⁰ Akkiman maxxa Poqalla a Waaqa Isira'eletin ke xaxade ka kide, ‘Dukaatanne Selemooni innaatti pakkiyyoppa nuqusuma ka sufaaniyyo qara kuti'a.’ Mina'e, dukaatannen awwe sede koda.”

³¹ Persaapehi ka fuulaadi piitan kayte ka ishi kaareeta oorisse ka kiite, “Poqallaayyo nuquso Taawwiti, a haka paraparati kallaado.”

³² Nuqusase Taawwiti ka kide, “Qeesittase Satooqi ka xuumampaytase Naataani isho Pannayyaasi inna Yoodaahe ana hala.” Ikka nuqusa turopa dehaaden.

³³ Nuqusase ka ishootta kide, “Orxayaayyo a poqallaassina isi quda qeeda ka innaayyo Selemooni qeeda ka kaanketiyyo qara kutiisha ka Kiyoonipa xatan lekkada.

³⁴ Qeesittase Satooqi isho xuumampaytase Naataani ka eeyye isha daaten ka Isira'eeli qara nuqusumshen ka kaasa dawen ka salishen ka kidene, “Selemooni a para kuma nuqusumo.”

³⁵ Ka kamma qata ka opeela xooya, ikka de'o ka sufaaniyyo qara kuti'oow ka pakkiyyoppa nuqusumo. Isira'eeli isho Yihuta qara'e akka mukissampayta koddo'e, ana isha shuumeey.”

³⁶ Pennayya inna Yoodaahe ka nuqusa kide, “Ameen! poqallaayyo nuqusa, Poqalla Waaqaayti kuli a sede dikkisho.

³⁷ akkima Waaqa ke poqallaayyo nuqusa olli caade mina'e, asseew Selemooni olli caado ka sufaanetaadi sufaaneta a nuqusa a Taawwiti a poqallaayyo qaran jaalsho.”

³⁸ Qeesittose Satooqi ka xuumampaytase Naataani isho Pannayyaase inna Yoodaahe ka Keletaata isho Feletaata ka xata lekkaden ka Selemooni qeeden ka kaanketa a nuqusase a Taawwiti qara kutiishen ka Kiyoonipan de'en.

³⁹ Qeesittase Satooqi ka tukkanase qulqullaawe kelaayye, kaasa sayteeta qeede ka Selemooni daate. Ka oori kaasa dawen samayta piisa ka nessa kuttan kide, “Selemooni a para kuma nuqusumo.”

⁴⁰ Orra piisa ka isha kamma qate ka kaasa dawni ka a kuttati xasoonni, piita ka kela lellehni.

⁴¹ Atooniyaasi isho xaykittase halaame ka isha olli co piisa ete damtaaysho dikkisannaaneeyye, ikka sede dakayen. Iyyo'api ete nessa kaasa dakayeeyye ikide, “Ini horayta maana'e katama kara xaani?”

⁴² A sede afaappa in dikkinniniiyyi, Yoonataani inna qeesittase a Apiyataari ka desa kaye. Atooniyaasi ka ishi kide, “Atti a nama fayya ka otoota fayyaatin deena a diissooy kulle.”

⁴³ Yoonataani ka ishi oorshe ka kide, “Ha assen poqallaanno nuqusase Taawwiti ha Selemooni nuqusumshe.

⁴⁴ Ha nuqusa, qeesittase Satooqi ka xuumampaytase Naataani ka Pannayyaase inna Yoodaahi ka Keletaata isho Feletaata Selemooni olli erke. Ishootta ka kaanketa nuqusa qara isha kutiishen.

⁴⁵ Qeesittase Satooqi isho xuumampaytase Naataani ka akka nuqusumo'e, kiyyo kara isha daaten. Ka xasan eeyye kara sooken. Katama ka olli horen nessoose a dakaynittan sede.

⁴⁶ Selemooni ka sufaaneta mankisteeta qara kuti'e.

⁴⁷ Saarra nuqusa ka de'en ka poqallaanno nuqusase Taawwiti xasooden ka kidene, A Waaqa kurra Selemooni a xaayti qaran qapto dakaytisho ka sufaanetaadi a xaayti qaran qapto jaalsho.” Nuqusase ka alkaadi qara'e kilpiippade ka Waaqa' sakatade.

⁴⁸ Ka kide, “Poqalla Waaqa Isira'eeli a awwe lehampayta a suufaanetiyyo qara kuti'o akkeetoppan ana kaye a kalataysamo.”

⁴⁹ Atooniaasi isho xaykittase a halaade piisa ka tammaqtan takka takka pase.

⁵⁰ Atooniaasi xoori Selemooni fuure ka aane ka kaassasene pora kalisoota qara ca quda qapade.

⁵¹ Ikka Selemooni lelan ka kidene “Atooniaasi ke fuure ka kaassasene pora kalisoota qara ca quda qapade ka kiini, akka koraatetan ana in ikannini'i, nuqusa Selemooni awwe a ana xaxado.

⁵² Selemooni ka kide, “Oton i'issi harmisheeyye, we isha quda in kayan. Ma oton neequmta isha qara akkadaayye, ito'a.”

⁵³ Nuqusa Selemooni ka orra erke ikka porase a kalisoota qara Atooniyaasi lekkishen. Ikka de'e ka nuqusa Selemooni tura pi'e ka kaareeta oorshe. Selemooni ka ishi kide, “Tikaaytipa kale.”