Filemón 1 - Mam of Todos Santos -- Guatemala Unicode

Jun kꞌolbebl tuꞌn apóstol Pablo te Filemón

¹ Inayena Pablo. Lu ken ntiiꞌnctz tuj tzeeꞌwa tuꞌn tlaj tyol Jesús. Bix lu Timoteo, jun ocslal wuya at wuya tuj tnom tzalu. Ma cub ntzꞌiꞌbena ja uꞌj lu te tey, Filemón. Kcaꞌbela tuya Timoteo ax kanema tiꞌja, bix kuya kiib tuj taakꞌen Jesús.

² Bix ma txiꞌ kkꞌoꞌna jun kꞌolbebl te Apia, jun ocslal kuya, bix te Arquipo, onl ke tuj taakꞌen Jesús, bixsen cye ocslal nchi chmet tjay.

³ Jaxit Kman Dios bix Kaaw Jesús, Scyꞌoꞌn tuꞌn Dios, tzaj tz̈itente cyxtalbilxin bix ttz̈yal cyibaja.

Jun tanema Filemón bix tocslabl tiꞌ Kaaw Jesús

⁴ Tzinx nxiꞌ nkꞌoꞌnwe chjonte te Dios tiꞌja oj n-ula tuj ncꞌuꞌj,

⁵ cuma o nbiya ka a tanema bix kꞌuklec tcꞌuꞌja tiꞌ Kaaw Jesús, bix cyiꞌ t-xjal Dios.

⁶ Bix nxiꞌ nkanen te Dios tiꞌja tuꞌn toc tjunena ti jilel jbaꞌn tuꞌna tiꞌ Jesús cyuya ocslal, cuma tey tocslabl juꞌx tisenj cye. Tej tuꞌn tel niyꞌ tiꞌj cykilj baꞌn ntzaj tkꞌoꞌn Dios cyej xjal n-oc cymojban cyiib tuya Jesús, njaw tz̈ꞌiyte oj toc kjuna jbaꞌn kaakꞌen najben te Jesús.

⁷ Nchin tzalajwe tzalu bix ma kewe ncꞌuꞌj, cuma o nbi tiiꞌn tanema cyiꞌ xjal, bix ti tten n-oc tnimsaꞌna cycꞌuꞌj ocslal matzewe.

Tej t-xiꞌ tcubsaꞌn Pablo twitz tiꞌj Onésimo jaj jun tkꞌopaj Filemón

⁸ Juꞌ tzunj, amale atet wajwalela tuꞌn Jesús tuꞌn ncawen tibaja ti pjel tey cuma inayenwe tyolelxin,

⁹ nejl cxeꞌl ncubsaꞌn nwitz tey tuꞌn at tanema. Inayen Pablo, jun tij, toctz tuj tzeeꞌ nuk tiꞌjcꞌa Jesús,

¹⁰ cxeꞌl ncubsaꞌn nwitz tey tiꞌ Onésimo, tkꞌopaja. Luxin at wuya tzalu. Jaxin tisen jun ncwal, cuma cyuꞌn nyola acꞌaj ma jaw itzꞌj tanemxin tiꞌ Dios, tiꞌj ma tzulxin kꞌolbel we tuj tzeeꞌ.

¹¹ Tej tyem o baj, Onésimo mintiiꞌxix ajbeꞌnaxin tey. Pero yaltzen jaꞌlewe, lu tzunxin najben we, bix nimxsen tajbelelxin tey.

¹² Ma tzꞌaj nsmaꞌnxin tuyey. Kꞌimxin tisecꞌax inayen otk chin pon.

¹³ Wajatlewe nuket ata wuya tzalu, bix wajatlewe ma tcyaj Onésimo wuya tzalu te t-xela, jacꞌa tzꞌajbenxin we tiꞌj lu ken ntiiꞌnctz tuj tzeeꞌwa nuk tuꞌncꞌa wocslabl tiꞌ Jesús.

¹⁴ Pero mintiiꞌwe baꞌn toc nbinche, cuma min-ala at tzalu tuꞌn tcuyan tey ja lu. Cuma ka ma tzꞌoc ncꞌojlaꞌnxin tzalu, nuk wuꞌnx, yaaꞌn tuꞌn tey tcꞌuꞌja.

¹⁵ Cuyamj ti jilel o baj cyjulu. E xiꞌ t-xooꞌna tkꞌopaja te cab kꞌij, tuꞌntzen tcamana tiꞌ jun ocslal tisen jun titzꞌena te junx maj.

¹⁶ Yaaꞌn nuk jun kꞌopajxin jaꞌlewe, sino mas tajbelelxin twitz jun kꞌopaj, tisen jun titzꞌena n-oc takꞌ tey. Wachexsewe twitzxin. Yaltzen tey, masx baꞌn toc takꞌxin tey, cuma cꞌajbelxin tey, bix tisen jun titzꞌena tuj ocslabl.

¹⁷ Juꞌ tzunj, ka kuya kiib tuj twitza, jaxse kꞌimxin tisenx inayen otk chin pon.

¹⁸ Katzen at o talkꞌa tiꞌja, ma at cꞌasben tey, kꞌoncꞌax tiꞌ nbiya.

¹⁹ Yaaꞌn nuk tenwe nyol tiꞌj tuꞌn nchjonte. Tuꞌntzen tcyaj nyol tuj chicꞌaj, inayen Pablo ncub ntzꞌiꞌben ja uꞌj lu tuya nkꞌab. Yaaꞌn jun secrevánt ncub tzꞌiꞌbente. Cuma e xiꞌ nkꞌumena tpocbal coꞌpbil tey, juꞌ tzunj at tcꞌasbena we, pero min tzaj nnaꞌnwe tey.

²⁰ Jeyꞌ, Filemón, jay jun ocslal tiꞌ Kaaw Jesús. Bincham xtalbil wiꞌj tuꞌn tiikꞌentey Onésimo tuyaxix cykil tcꞌuꞌja. Nimsaꞌnctzen ncꞌuꞌj, cuma ocslal koꞌ tiꞌ Jesús.

²¹ Nxiꞌ ntzꞌiꞌben uꞌj tey, cuma kꞌuklec ncꞌuꞌj ka cbinel tuꞌna tisenj nxiꞌ nkbaꞌn tey, bix ntzkiꞌn mas cbinel tuꞌna twitzj nxiꞌ nkanen tey.

²² Nuksama. Bincham chꞌin nposada tjay, bix cynaꞌm Dios tuꞌn wex tzakpet tuj tzeeꞌ. Kꞌukl ncꞌuꞌj tuꞌn npon canan cyuyey.

Jun kꞌolbebl cyuꞌn ocslal te Filemón

²³ Epafras, juntl ocslal toctz tuj tzeeꞌ, nxiꞌ tkꞌoꞌn jun kꞌolbebl tey.

²⁴ Juꞌx te Marcos, Aristarco, Demas, bixse Lucas, ejeeꞌtzen xinj nchi akꞌanan wuya tuj tnom lu, jax nxiꞌ cykꞌoꞌnxin jun kꞌolbebl tey.

²⁵ Tzajxit t-xtalbil Kaaw Jesús cyibaja. Juꞌxit tzuna.