Sofonías 3 - Biblia Mam de Quetzaltenango

Til Jerusalen ex kolb'ilte

¹ ¡Layxwitju' Jerusalen, pi's nintnam, tz'ilsa'ntib' ex jtz'ol xjal!

² Minti' xitb'i'nju' tq'ojq'ojel twi' Qman Dyos ex minti' taq' tzak'u' tib'; minti' sok qetk'u'j ti'j; ex minti' xi' lq'e tk'etz Dyos.

³ Nche' tzanunju' nejenel kye naku'j b'alun; aye'tzunju' ajkawil kye, naku'j xo'jqe' toj chq'ajlaj mixti' nkyaj kyq'o'n jun b'aq te prim.

⁴ Aye'ju' kysanjelal mixti'x knab'l, nche' b'jaw meltz'uj; aye'ju' kpale nkub' ktz'ilsa'nju' xjanb'il ex nche' ik' tib'aju' tkawb'il Qman Dyos.

⁵ Atzunte Qman Dyos ati toju' nintnam; ntb'incha'n b'a'n, myaju' taq'wix. Atl prim nche ok xjal toj xjel tu'n. Atzunte xjal b'inchal myab'a'n mixpeti'x tojtzqi'n ch'ixaw.

⁶ Ate Qman Dyos ntma'n kjalu: Matxi' che b'ajnxitu'ne' nimaqtnam matxi' che b'aj kub' nxitu'ne' ja nimaq kywe' exju' kytapi ex matxi' che b'ajkyaju' kyxk'ichb'e wu'ne' te chq'ajlaj, mixti'tl jun xjal nb'et toj. ¡Toju' ninttanam tjunalx mixti' jun xjal najli toj!

⁷ Kub' nximane': Aju' Jerusalen kxob'el weye' ex oklo tq'a kawi tib' weye; tu'ntzun lalun kyej xitju' tja tu'nju' matxi' kub' tz'e'yset twitz. Aye'tzunkye ma'pe' che'x xi'xtl b'inchal chukchaq il.

⁸ Qu'mtzun, che ayone' ti'ju' q'ij ajnjawe'ye' yolil taq'wix kyi'je'. Ayine', Dyos Manb'aj nchin q'mante: matxi' kub' nxima'ne' tu'n kytzaj b'u'yitju' nimaqtnam exqe' kawb'il tu'n ttzaj nb'ajsa'ne' ntx'u'jile' kyib'aj, aju' ntx'u'jile' inxi'x k'ant. ¡Tkyaqilju' tx'otx' kjel xitj tu'n tkyeqil ntx'u'jile'!

⁹ Ajtzun tponju' q'ij lu, knẍtilsa'ye' kyolju' tnam, tu'ntzun kykyaqilx che txokyil weye', ex tu'n kykyaqilx tu'n kyajb'en weye'.

¹⁰ Toju' jun plajtl kyeju' a' te Etyopiy, tzulju' ntaname' b'ajxni sputj kub'sal tuk'i'l oyaj weye'.

¹¹ Tojtzunju' tq'ijlalil lu, lalun jaw ch'ixwitla ntanam te junju' tb'inchb'aja tej sel tpa'ntib'a wi'je', oktzun che elel wiq'ine' ti'ja aye'ju' la'jil kyib' ex nimal kyib', ex lalun jaw tnima'ntl tib'a twi'ju' witz xjan weye'.

¹² Che kjel nq'o'ne' xjal me'sqe' kxole' ex mya nimal kyib', atzu' k'okyela' qe' kyk'u'j wi'je'.

¹³ Aye'ju' kche kjel anq'in toju' tnam te Israel lalun che b'inchan mya tnik'alti'j, lay che chanyol, ex lay ten sb'ujtib'il toj ktzi. Kche wal ex kche ojlal mixti' xob'ajil kye.

B'itz te tzalajb'il tu'n Jerusalen

¹⁴ ¡B'itzana nintnam te Syon! ¡Che ẍch'ine' tu'n tzalajb'il, tnam te Israel! ¡Tzalajxa, Jerusalen, tzalajxa tu'n tkyaqil tanmiya!

¹⁵ Matxi' tz'eltiq'i'nte Qman Dyos tz'e'ysb'il twitza ex matxi' che eltik'o'n tajq'oja. Ate Qman Dyos, nimaqkawil te Israel, ati kyxole': Mixti'tl tu'n t-xob'a te jun taq'wix.

¹⁶ Tojtzunju' tq'ijlalil lu kxe'l q'ma'n te Jerusalen: ¡Lalun xob'a, Syon, ex lalun taja tu'n tel kyipumalju' tq'ob'a!

¹⁷ Atite' Qman Dyos kxole'; ¡kuwxi'xte', ex kkletela tu'n! Ntzalaj te Qman Dyos ti'ja. Kxe'l tq'o'nju' ak'a'j chwinqlal teya tu'nju' tk'ujlalil; ex kb'itzil toju' ttzalajb'il

¹⁸ Kse'n toj ninq'ij. Chi Qman Dyos kjalu: Kntzaqpi'ya teju' taq'wix kxi'toq ttzaj ti'ja, teju' ch'xawil ju' al tib'aja.

¹⁹ Knq'a'ye' tu'me'l t-xel kyeju' kykyaqilju' mache okten yajulteya. Kchin onile' ti'ju' rit nkoxjne ex ktzajel wiq'inju'ye' xi'nitz'aq; kche jawil nimane' ex b'a'n yolb'il kyeye' toj tkyaqil twitz tx'otx', aye'ju' ik'b'il kyeye' xb'inchanjtz.

²⁰ Tojtzunju' tq'ijlalil lu che ktzajel wiq'ine', kche tzajel nb'u'yine'; knch'exb'eye' kyanq'ib'le', b'a'n kyolinjtze' ex ninb'el kyeye' kxol kykyaqilju' tnam twitz tx'otx'. Ayine', Dyos Manb'aj nchin q'mante.