Sofonías 2 - Biblia Mam de Quetzaltenango

¹ Kyb'uyim kyib'e' junx aye'ye' xjal mixti' kych'ixawe',

² na'mxku' kponxone' kse'n ttxa triy, noq toj jun q'ijx nkub'a' naj; na'mxku' tkub' tz'aq kyib'aje' aju' ttx'u'jil Qman Dyos nk'anti; na'mxku' tkub' tz'aq kyib'aje' aju' tq'ijlalil ttx'u'jil Qman Dyos.

³ Kyjyome' Qman Dyos kykyaqile' me's qe'ye' twitzju' tx'otx' lu, aye'ye' nxikyb'i'ne' tchaq'b'il. Che okxe' tnik'alkyi'je' ex me's, qaj che kletiltzuntze' toju' q'ij ajttzaj tq'o'n Qman Dyos ttx'u'jil.

Tz'e'ysb'il kywitzju' nimaqtnam

⁴ Kjeltenju' nintnam Kasa chq'ajlajtl, exju' Askalon xitjnitl; tojxi'x q'ijtl che elex xla'ja'n xjal nche najan toj Asdod, ex majx che jawitz xb'oq'inju' xjal nche najan toj Ekron.

⁵ ¡Layqe'xwite' nche najane' toj kreta, najlqe'ye' ttzi ninnjab'! Matxi' tma Qman Dyos tu'n ttz'e'yset kywitze'. ¡Kanaan, ktanam pilistey, kb'el nxitu'na ex mixti'tl xjal knajal toja!

⁶ Kjeltenju' tnam ati ttzi ninnjab' wu'ne' te kywab'l wakx jakyb'u'yiya' kyib'ju' k'ik'lel, ex ja kb'elaju' kych'lajil rit.

⁷ Aye'ju' che kjel anq'in toju' tnam Juda che kb'el najan toju' tnam lu ajtul Qman Dyos onilkye ex aj tch'exb'ente kyanq'ib'l. Atzuntzu' che xq'uqila' ti'ju' krit, ex che ojlal te qonik'an kyoju' ja te Askalon.

^8-9 A ntma'n Qman Dyos nimtipumal kjalu: Oje nb'iye' yol taq'wix kyu'n aj Moab' exju' taq'wix xkyb'incha aj Amon. Qu'n nim kyol taq'wix kyeju' ntaname' ex matxi' che jawb'ent twitzju' kytx'otx'. Qu'mtzun knma' jun nyole' axx'ix ikykye aj Moab' che ik'ela' kse'n Sodom exqetzu'n aj Amon ikyche kjela' kse'n Komor, che jawil b'entju' kykojb'il te ch'ix, ex te ttx'otx'al atz'an, te jun tx'otx' noq tjunalx kukxju'. Aye'tzu'n che kjel anq'in toju' ntaname' che eletz q'inteju' toj kyja ex che kjelten twitzju' kytx'otx'.

¹⁰ Atzun chojb'ilju' kyk'ma' aj Moab' ex aj Amon. Tu'n tpajju' xikylanu'n kyol kyeju' ttanam Dyos, tu'n tpaju' mache b'jawb'ent noq tu'nelju' ttanam Qman Dyos nimtipumal.

¹¹ K'okyel te Qman Dyos xob'ajilx kye Che' kb'el t-xitu'n kykyaqilju' dyos teju' tnam, ex che k'ululju' xjal te toj tkyaqil najb'il, expe' ikx kyu'nju' xjal najliqe' kyoju' piẍ tx'otx' toj ninnjab'.

¹² ¡Ex ikxkye', aye'ye' aj Etyopiy, che k'ixb'ele' ex che b'eltz'aqe' tu'nju' tk'uẍtx'e'nb'il Qman Dyos!

¹³ Kxe'l tnuqpi'n tq'ob' toj tb'a'nq'ob' kya'j tu'n tkub' t-xitu'n Asirya, ex kjel t-xitu'nju' nintnam Ninib'e, ex majx kjawil b'ent te jun chq'ajlaj tzqij tu'n.

¹⁴ Kjawitz xb'oqitju' ttzeylal kyja, ex kyoj che b'jo'kyexa'ju' tnej rit ex tkyaqil tnej txkup toj k'ul. Aju' tukru exju' tol kche wtal kyib'aju' tqan ja, ex kche oq'el joj kyib'aju' tokexspik'un ex kyib'aju' nunb'ral.

¹⁵ Atzun nintnam ja'lu nxi'x tnima'ntib' nanq'in q'uqlixi'xtoq tk'u'j, ex intoq kma'nju' najlqe'toq toj qa mixti' juntl xjal twitz tx'otx' kse'nkye. ¡Matxi'xi'x kyej xitj ex matxi' tz'ok te knajb'il tojk'ul txkup! Kykyaqilju' nche' ik' tk'etz, kche ẍut'il ex majx k'elel kyik'u'n.