Rt 1 - Biblia Mam de Quetzaltenango

E'xi' Elimelek najal toj Moab'

^1-2 Tzaj jte' q'ij we'yaj toj tkyaqil Israel toj ju' tq'ijlalil intoq che kawin ajkawil toj Israel. Xi' jun ichan Elimelek tb'i, aj B'elen toj Juda, najal jte' q'ij toju' tx'otx' Moab'. Xitiq'i'n Noemi ju' t-xu'jil kyuk'i'l kab'e' tk'wal aye', Malon ex Kyilyon. Tetoq Eprataqe' kykyaqil toj B'elen. Eb'ajpon Moab', ex e'kyajten najal atzu'.

³ O'kx tkyim Elimelek, ju' tchmil Noemi, kyajtentzun Noemitz tjunalx kyuk'i'lju' kab'e' tal.

⁴ Yajxi'tzuntl e'mje kab'e' tal Noemi kyuk'i'l kab'e' txin aj Moab': Orpa tb'iju' jun, atzu'n juntl Rut. Tetzunj tb'aj lajoj ab'q'i,

⁵ ex e'kyimju' Malon ex Kyilyon, kyajtentzun Noemitz mixti'xte tchmil ex tal.

Eb'ajx Noemi tuk'i'l Rut B'elen

⁶ Jun q'ij tb'i Noemi qa matxi'toq tzaj q'aq'an tk'u'j Qman Dyos ti'ju' ttanam, matxi'toq tzaj tq'o'ntl tb'anil awal toj.

⁷ Kub'tzun t-xima'n Noemi tu'n tanjti'j toj Juda kyuk'i'lju' tlib'.

⁸ Tojtzun b'e xitma'na' kye: —Kutanj kyi'je' tk'etz kytxuye'. Awt Qman Dyos b'inchan xtalb'il kyeye' kukxju', kse'n kyb'inchaye' weye' ex kyeju' wale',

⁹ ex awt Qman Dyos tz'oninkyeye' tu'n kymje jumajtle' ex tu'n kytzalaje' kyuk'i'l toj kyjaye', chij kye. Ex eb'ajkyaj tma'tzi'n Noemi, aye'tzunkye e'aq'wi oq'el.

¹⁰ Ex xikyma'n te: —¡Lay! ¡Qo xe'lqe' toj ttanama!, chechij.

¹¹ Atzunte Noemi xitma'n jumajtl kye: —Kuxkxi'ye' wal, ¿tiqu'n kyajb'ila'ye' tu'n kxi'ye' wuk'i'le'? Layna' che tentlwe' wal tu'n ykmejeye' kyuk'i'l.

¹² Kutanj kyi'je' kyjaye'. Qu'n matxi' chin tijinwe' ex lay chin mjetle'. Maskyepe' atiwt tu'me'l, ex chin mjewte' toju' qonik'an lu exqa machin alintle',

¹³ ¿ma oktzun che b'el kyayo'ne' tzmaxi'j aj kych'iy tu'n kymjeye' kyuk'i'l? ¿Ma laytzun che mjeye' naqx tu'n ayob'enkye? Lay ye, mya tu'me'lte' ikyju'. Qu'n jaku' chin b'isunxi'xtle' kyi'je' ajkyxi' nka'yine' nche yajtiye', kse'nju' yajb'il matxi' tzaj tq'o'n Qman Dyos wi'je', chij kye.

¹⁴ Aye'tzunkye e'kub'ten jumajtl oq'el. O'kx chab'ax oktma'tzi'n Orpa tlib' ex kyej ttzaqpi'n, atzunte Rut kyejten tuk'i'lju' tlib'.

¹⁵ Xitzun tma'n Noemi te tlib': —Matila Orpa matxi' tz'anjti'j toj ttanam ex tu'n tajb'en kyeju' tdyos. Ikxtzunteju'ya kutxi'ya tuk'i'l, chij.

¹⁶ Atzunte Rut xittzaq'we'n te: —¡Lalun b'isuna wi'je' qu'n layna' kyej ntzaqpi'nta! Chin xe'lwe' tuk'i'la jaxja matxa'ya ex chin najale' ja knajala'ya. Aju' ttanama k'okyel te ntaname', ex chin k'ululwe' teju' Dyos ja inima'na'ya.

¹⁷ Chin kyimele' ja kkyimela'ya, ex axtzu' wajb'ila'ye' tu'n nku'x mqu'ne'. ¡Tzajxwit tq'o'n Qman Dyos jun tz'e'ysb'il nwitze' kuw qa matz'el npa'nwib'e' ti'ja, noq o'kxte' qama chin kyime', kjel ntzaqpi'ntzuntza! chij.

¹⁸ Tetzunj tel tniky' Noemi ti'j Rut qa matxi'toq kub' t-xima'n b'a'nxi'x tu'n toklpe ti'j, mixti' ok iltl ti'j,

¹⁹ xikyljo'ntzun kyb'etz kykab'il tzmax kypon toj B'elen. Tetzunj kypon toj B'elen, e'jaw lab'tiju' tnam kyi'j. Intoq kyma'nju' qya: —¡Kyka'yinxpe' ch'inkye', myatzun Noemi ju'lu!, chechij.

²⁰ Atzunte Noemi xitma'n kye: —Lalun tzaj kyma'ntle' nb'iye' Noemi ('tzalajb'il), kymantze' nb'iye' Mara (b'isb'ajilx'), qu'n b'isb'ajilx soka' nchwinqlale' tu'n Qman Dyos nimtipumal.

²¹ Tej wexe' tza'lu nimtoq ti'xti' weye', atzu'n sanjtz wi'je' ja'lo, mixti'te iq'i'n wu'ne', qu'n ax tajb'il Qman Dyosju'. ¿Titiqu'n inxtzaja' kyma'ne' nb'iye' Noemi, extzun matxi' chin yajtiye' ex matxi' kub' nchjo'ne' tu'n Qman Dyos?, chij.

²² Ikytzu'n anjtza' ti'j Noemi toj B'elen tuk'i'l Rut ju' tlib', aj Moab'. Tetzunj kypon, Akxtoq nb'uyinjtz twitz awal seb'ad toj B'elen.