Nahum 1 - Biblia Mam de Quetzaltenango

Ttx'u'jil Dyos ex tu'me'l t-xel tu'n

¹ U'j te pakb'ab'l tk'am Nawum te Elkos toj nakuj witzik'. Ti'j Ninib'e yolina' pakb'ab'l lu.

² Nxky'aqlante Qman Dyos ex nq'on tu'me'l t-xel: Ntq'o'n tz'e'ysb'il witzb'aj kyeju' min nche' b'in te, ex ntzaj ttx'u'jil kyi'ju' tajq'oj.

³ Atite Qman Dyos tpasensi ex nimtipumal, ex nkub' ttz'e'ysa'n twitzju' ati tpaj. Ate Qman Dyos nb'et toj q'ankyaq, ex njawju' muj nakuj quq tu'n tqan.

⁴ Ntzqiju' ninnjab', qama txi' tma'n te. Nche tzqiju' nin a' tu'n kykyaqil. Nche kub' jilju' witz te B'asan exju' witz te Karmelo tu'n, ex ikx nche' ch'uẍi'xju' b'ech toj tx'otx' te Lib'ano tu'n.

⁵ Nche lu'lunju' witz twitz; ex nche kub' niwju' k'ok'e witz twitz. Tkyaqilju' tx'otx' njaw yukchi aj tlonte tkyaqilju' twitz tx'otx' ex ikxqe' xjal najlqe' twitz.

⁶ ¿Alxi'xkyeju' kweb'il twitzju' ttx'u'jil? ¿Alxi'xkye jun k'ik'exju' ttx'u'jil tu'n? In ximlenju' ttx'u'jil kse'n q'aq', ex twitzku' nche'xa' aq'puju' pik.

⁷ B'a'nxi'x te Qman Dyos; ntq'uqb'a'n qk'u'j toj k'ixk'oj: nche' tklo'nju' q'uqlok kyk'u'j ti'j.

⁸ Extzun, kse'n tnimal a' tkyaqil kb'ajel t-xitu'n, nche kub' tb'ajsa'nju' nche okmiltz'uj ti'j; kb'el kyi'ju' tajq'oj tu'nju' qlolj.

⁹ ¿Titi' nkyxima'ne' ti'j Qman Dyos? ¡Che b'elxitu'n jumajx tu'n! ¡Mix-a'lo'x kb'entel tmyonte tkamaji'n!

¹⁰ Ikyqe' kse'n ch'i'x tzyu'nkyib', tzyu'n kywi' b'a'nxi'x tu'n q'e'n, ikyche okyela' kse'n t-xaq tze tzqij te q'aq'.

¹¹ Tnam Ninib'e, toja setza'ju' xjaw ximante' taq'wixil ti'j Qman Dyos: Jun taq'wix q'ol nab'l.

¹² Qu'mtzun ntma'n Qman Dyos teju' ttanam: B'a'nqa kuwqe'kye' aj Asirya ex nim kyb'aj, kche b'elxitit ex che najel. Matxi' yajtixi'ya wu'ne', Extzun lay yajtitla wu'ne'.

¹³ Kb'ajel nq'uchi'ne' tiqb'ila ti'j tqula ex k'elel nlaqu'ne' txpatx'k'uxb'ila.

¹⁴ Oje tchaq'te Qman Dyos teya, nimaqkawil toj Ninib'e kjalu: Mixti' tyajajila kjelten tu'n tkyeju' tb'iya kukxju'; toju' tja tdyosa che kb'el nxitu'ne'. witzileb' exju' tilb'ilal b'incha'n, ex atzu' kb'elexa' mqu'na qu'n mya b'a'na toj nwitze'.

Tqanil tu'n tkub' tz'aqju' nintnam Ninib'e

¹⁵ ¡Kyka'yinxe'! ¡Lu tzul kwi'ju' witz lu sanjelal tzul ti'nju' tqanil te nak'b'il! Kyik'samjuye' ninq'ij, Juda; japunx tyola oje tmaya. Lay tz'el q'i'n jumajtlju' ttx'otx'a kyu'nju' b'inchal myab'a'n; matxi' che kub' xiti'n kykyaqil.