Génesis 1 - Biblia Mam de Quetzaltenango

Tch'isb'en Dyos t-xetnejel

¹ Tej ttzaj ku'qe t-xe tnejel, kub' tb'incha'n Dyos kya'j ex tx'otx'.

² Atzunju' tx'otx' mixtoqti' ttx'o'lajil; tkyaqil ninnjab' yiletoq nim t-xe, extzunju' tib'ajile majxtoq qxopin, atzunju' t-xew Qman Dyos intoq yukchi tib'ajileju' a'.

³ Ex tma Dyos ¡Kutjaw b'entju' spik'un! chij. Ex b'entju' spik'un.

⁴ Tetzunj tka'yinte Dyos b'a'nju' spik'un, eltpa'n ti'ju' qxopin

⁵ ex oktq'o'n tb'i q'ijtl, atzunju' qxopin oktq'o'n tb'i qonik'an. Aye' ja'lu eb'ent toj tnejel q'ij.

⁶ Tb'entlenxi'tzun ja'lu tma Dyos: Kutb'ent jun aq'pub'lteju' a' tu'ntzun kykyejten toj kab'e' tnej, chij. Ex b'ent ikju'.

⁷ Tb'incha Dyos jun aq'pub'lkyeju' a': jun tnej kyejten tjaq'xi'ju' aq'pub'l, atzunju' jun tnejtel kyejten tib'aj.

⁸ Atzunju' aq'pub'l oktq'o'n tb'i kya'j. Aju' lu b'ent toj tkab' q'ij.

⁹ Tb'entlenxi'tzun ja'lu tma Qman Dyos: Aju' a' makyejten tjaq'xi' kya'j b'uyinktib' junx, tu'ntzun tkyej tpa'ntib'u' tzqij, chij. Ex b'ent ikju'.

¹⁰ Tkyejlenxi'tzun tpa'ntib'u' tzqij, oktq'o'n Qman Dyos tb'i tx'otx', atzunju' a' tb'jo'klenxi' tb'uyi'n tib' junx oktq'o'n tb'i ninnjab'. Tetzunj tka'yinte Qman Dyos qa b'a'nile tkyaqil,

¹¹ tma: Kuktzaj ch'iy tkyaqil awal twitz tx'otx': e' k'ul tu'n kq'onte kyijajil exqe' tze tu'n kwitzan tu'ntzun kq'onte kyijajil kse'nx tyajajil junjun, chij. Ex b'ent ikju'.

¹² Ex tzaj ch'iy tkyaqil awal twitz tx'otx': e' k'ul ju' inkq'o'n kyijajil, ex e'tze tu'n kwitzan. Tetzunj tka'yinte Qman Dyos ja'lu b'a'n ela' toj twitz.

¹³ Aye' ja'lu eb'ent toj toxi'n q'ij.

¹⁴ Tmatzun Dyostzu': Kukyb'entu' spik'un twitz kya'j, tu'ntzun tpa'ntetib'u' q'ijtl ti'ju' qonik'an; ex tu'n kyajb'en te echb'il kyeju' tajlal q'ij, ex tajlal ab'q'i, ex tu'n kyajb'en te yek'b'il kyeju' tq'ijlalil jb'alil ex q'ijal.

¹⁵ Ex tu'n kyqoptz'aj twitz kya'j tu'ntzun t-spik'e'ju' twitz tx'otx', chij. Ex b'ent ikju'.

¹⁶ E'kub' tb'incha'n Qman Dyos kab'e' spik'un, jun nimin tu'n tk'ant twitz tx'otx' te q'ijtl, atzun jun b'o's tu'n tk'ant te qonik'an. Ex ikx e'kub' tb'incha'nju' che'w.

¹⁷ E'kub' tq'o'n Dyos spik'un twitz kya'j tu'n kyk'ant twitz tx'otx'

¹⁸ te q'ijtl ex te qonik'an, ex tu'n tel tpa'ntib'u' spik'un ti'ju' qxopin. Ex b'a'n ela' toj twitz.

¹⁹ Aye' ja'lu eb'ent toj tkyaji'n q'ij.

²⁰ Ex tmatl Dyos kjalu: Kukyjaw b'ent tkyaqil kyyajajil txkup toj a', ex ikx kukyjaw b'ent pich' tu'n kylipan tib'ajile tx'otx', chij. Ex b'ent ikju'.

²¹ E'tch'isa Dyos nimaqtxkup toj ninnjab', kykyaqilu' kyyajajil txkup eb'jaw b'ent toj a'. E'tch'isa tkyaqil kyyajajil pich'. Tetzunj tka'yinte Dyos tkyaqil ja'lu b'a'nile,

²² e'kub' tky'i'wla'n kykyaqilu' txkup e'kub' tb'incha'n, tma kjalu: che chmet-xu' kyal tu'n kynoju' ninnjab' kyu'n, ex tu'n kten nim pich' toj tkyaqil twitz tx'otx', chij.

²³ Aye' ja'lu eb'ent toj tjwe'yi'n q'ij.

²⁴ Ex tmatl Qman Dyos kjalu: ch'isama tkyaqil kyyajil txkup: e'txkup tu'n kyalumanjtz, e'txkup tu'n kten toj k'ul, ex e'txkup tu'n kqititinje' twitz tx'otx', chij. Ex b'ent ikju'.

²⁵ E'kub' tb'incha'n Dyos txkup lu, ex tkyaqil b'a'nile ela' toj twitz.

²⁶ Tmatzun Dyostzu': Atzu'n ja'lo qb'inchaku'ju' wnaq ik tilb'ilalu' kse'nqe. Ex ate ktenb'il toklen kyib'aj kyiẍ, kyib'aj pich', kyib'aj txkup aluma'nqe', kyib'aj tojk'ul txkup, ex kyib'aju' txkup qititin kyel twitz tx'otx', chij.

²⁷ Tej tkub' tb'incha'n Qman Dyos wnaq, kub' tb'incha'n kse'nxu' tilb'ilal; kub' tb'incha'n ichan ex qya,

²⁸ e'kub' tky'i'wla'ntzuntz kyu'nju' yol lu: che chmet-xu' kyk'wale' tu'n tnoj twitz tx'otx' kyu'ne, ex che kawinqe'ye' twitz. Toj kq'ob'e' che kjela'ju' kyiẍ, e'pich', ex kykyaqilu' txkup inche qititinje twitz tx'otx', chij.

²⁹ Ex tzaj tma'ntl Qman Dyos kye: Kyb'intzpeye', tkyaqilu' awal twitz tx'otx' nkyq'o'n kyijajil, ex kykyaqil tqan lob'j che kxe'lnq'o'ne' te k'a'chb'il kyeye'.

³⁰ Atzu'n kyeju' tojk'ul txkup, exqe' nche qititinje twitz tx'otx' exqe' pich', aju' cha'x k'ul kxe'l nq'o'ne' te k'a'chb'ilkye, chij. Ikytzun b'aj ju'.

³¹ Tkyaqiltzu'n matxi'toq b'aj tb'incha'n Qman Dyos majx b'a'n ela' toj twitz. Aye'tzun eb'aj b'entju' toj twaqaqi'n q'ij.