Abdías 1 - Biblia Mam de Quetzaltenango

Tz'e'ysb'il twitz Edom

¹ Tzaj tyek'u'n Qman Dyos tpakb'alil te Ab'diy kjalu. Maqb'i jun tpakb'alil tu'n Qman Dyos; matxichq'o'n jun sanjelal q'malte kye nimaqtnam kjalu: ¡Lwiyqe'xe'! ¡Qo'qe' q'ojil ti'j Edom! chij. Intma'n Qman Dyos kye aj Edom kjalu:

² Che b'el nb'oẍsa'ne' kyxol nimaqtnam ex che elel ik'u'ne' b'a'nxi'x kyu'n.

³ Tu'nx kyninb'ilkyib'e' ẍesb'eta'ye'. Najlqe'ye' kyoj kyk'atxab' pik ex ate'qe'kxe' tzmax jawl, qu'mtzun nkub' kyxima'ne' qa mix-a'lo'x jun kb'elsalte kyi'je'.

⁴ B'a'ntzun qama che jaw lq'eye' kse'n q'anjel ex makub' kyq'o'n kyjaye' kyxol che'w, tzmaxtzuntzu' che tzajela' nxone' na'tz, chi Dyos. Chi Qman Dyos kjalu:

⁵ Naqwit qonik'an che ok eleq' kyi'je', lay b'ent tu'n txikyiq'i'n tkyaqil ati kyeye'; naqwit che ul xilul ub'a kyi'je', okx kjel kyq'o'n jte' tq'ob' ub'a tuk'i'l twitz. Aye'tzunkye' kyajq'oje' majx che b'elb'ajsa'ne' kyu'n.

⁶ ¡Majx che b'je'lel iq'i'n kyeye', tyajajil Esawu! ¡Kb'ajxel elq'a'n tkyaq'ilju' kyq'inumale'!

⁷ Che b'el sb'u'ne' kyu'n kykyaqilju' mojli kyole' kyuk'i'l, tojku' kytx'otx'e' che eletza' xla'ja'ne' kyu'n. Naq pe'naqe' kamiwe' che okyel miltz'uj kyi'je', exqe' kamiwe' q'uqli kyk'u'je' kyi'j kb'el kyq'o'n xpatxab' kyeye'. ¡Mixti'x nche ximane' aj Edom! chi Dyos.

⁸ Intma'n Qman Dyos kjalu: Ajtkub' ntz'e'ysa'ne' kywitz aj Edom, che kb'el nb'yo'ne' kykyaqilju' kyxjal ati kynab'l ex k'elel wiq'i'ne' kyk'atzal xjal najlqe' kywi' witz kye tyajajil Esawu.

⁹ K'okyeltchi kyi'ju' xjal aj Teman q'ojilqe', ex mix-a'lo'tlte kjel anq'in toj kytx'otx' tyajajil Esawu kywi' witz.

Aye' til Edom

¹⁰ Tu'n tpaj e'kub' kyalq'a'ne' ex e'kub' kyb'yo'ne' tyajajil Jakob' ju' kytzikye' k'elel kych'ixawe' ex che kjel xitu'ne' tejumajx.

¹¹ Tej tokx kypa'n najchaq xjal te q'oj tjpel Jerusalen tej tb'ajx kyelq'a'n ajq'oj q'inumal toju' nintnam, ¡naq exika'yine' ti'j! Tej t-xikyse'n tu'n telkynik' alqechaq kxe'la' b'je'x kyalq'q'a'n ex b'ajx kyiq'i'n kyq'inumal aj Jerusalen, ¡ikx kyb'inchaju'ye' kse'n kyb'incha!

¹² Miwtlojun e'tzalaje' kyi'ju' kytzike' toju' tq'ijlalil kykub'o'lj, exwitlo min e'tzalaje' ti'j Juda toju' q'ij tej tkyaj xitu'n, exwitlo min e'xmayine' kyi'j tej intoq che oq'.

¹³ Mixwitloti' e'okxe' toju' nintam weye' tej kyok toj yajb'il, exwitlo min e'tzalaje' tej kykub'o'lj toju' tq'ijlalil tej kyk'ulb'an, exwitlo min b'je'x kyalq'a'ne' kyq'inumal tej inxi'xtoq che yajlanjtz.

¹⁴ Mixwitloti' e'kub'we'ye' kyoj xky'ichb'e tu'n kykub' kyb'yo'ne' ntoq che'x oq, exwitlo min e'pon kyq'o'ntle' intoq che matxitoq che oq toju' q'ij intoq che oq'.

¹⁵ Ikx kb'inchetelju' teya kse'n tb'inchaya kye txqantl: ¡kb'el tz'e'yset twitza tojx tila! Matxi' tzul lq'e tq'ijlalil Qman Dyos kye kykyaqil nimaqtnam.

Ninb'ilkye aj Israel

¹⁶ K'axi'xna' xkyk'waye' aj Israel ju' ẍek'wane' ti'j twi' witz xjan, ikxtzunkye' txqantl nimaqtnam kxel kyk'wa'n tkyaqil; ex majx che b'elnajsa'n.

¹⁷ Atzunte' witz Syon k'okyel te najb'il xjan ja che kletela' junjun toj. Ktzyetel jumajtl kytx'otx'ju' tyajajil Jakob';

¹⁸ che okyel kyyajajil Jakob' ex Jse te q'aq' ex taq' q'aq', aye'tzu'n tyajajil Esawu, maj che okyila' majx che b'ajel tu'n q'aq' lu. ¡Mix-a'lo'x jun tyajajil Esawu ktzaq'pajel! Ayine' Dyos Manb'aj nchin q'mante, chi Dyos.

^19-20 Kytzyu' aj Israel ate' Nekeb' kytx'otx' toj kyk'ul tyajajil Esawu, aye'tzu'n ate' toju' plan tx'otx' kb'el kytzyu'n kytx'otx' pilistey. Ex kytzyu' kytx'otx' toju' kye tyajajil Eprayin ex toj kyatx'otx' aj Samarya, aye'tzu'n tyajajil B'enjamin kb'el kytzyu'n Kalaad. Kytzyu' tnam xjal aj Israel b'je'xni xla'ja'nqe' lu kytx'otx' aj Kanaan, kpomelx toj tnam Sarepta, aye'tzu'n aj Jerusalen yaju'nqe' toj Separad che tzyulkye nimaqtnam Nekeb'.

²¹ Che jawix twi' witz Siyon matxitoq che kanb'n, tu'n kymante tz'e'ysb'il kywitzju' witz toj kytx'otx' tyajajil Esawu, ex aku'te Qman Dyos kkawil.