Jonás 1 - Mam de Huehuetenango nueva ortografía

El oq Jonás twitz Dios

¹ Tzaj yolin Qman tuk'il Jonás aju tky'ajal Amitai ex tma:

² Chux q'onku b'eya, txi'ya tuj nintz tnam Nínive ex q'manxa kye xjal qa knajel tnam wu'ne, porke ma pon tqanil wuk'ile ti'j kyb'inchb'en mya b'a'n, chi Dios.

³ Ex el oq Jonás twitz Qman, tu'n tpon tuj tnam Tarsis. Xi' ttzi mar tuj tnam Jope, ex atzun knet jun barc tu'n, kyja' t-xi' tu'n tpon tuj tnam Tarsis. Xi'tzun tchjo'n tpasaj ex jaxtzun tuj barc tu'n tpon ma chixin, tuj twitz qa tu'n tel oq twitz Qman.

⁴ Tzajtzun jun nintz kyq'iq' kyuwxix wen tib'aj mar tu'n Qman, ex mer ik tza'n kyja'toq tb'aj yuch'j barc tu'n tipumal a'.

⁵ Aqeju yukul barc tzaj nimxix kyxob'il, ex teyle junjun ok ten kub'sal twitz tdios, ax ikx ex kyxo'n tkyaqil iqtz tuj mar tu'ntzun tel talil tiqatz barc. Atzunte Jonás otoq ku'x tal max t-xe'pun barc, ex mi na'n tu'n tu'n watl.

⁶ Atzunte nejenel tuj barc pon tuk'il Jonás ex xi tma'n te: —¿Ti nb'aj teya, txa watin? We'ktza ex kub'sana twitz Tdiosa. Qape jaku tzaj q'aq'an tk'u'j qi'j tu'n qklet.

⁷ Atzun kye yukul barc kyma kyxolx: —E tjaw swert qu'n, tu'ntzun tel qnik' ti'j alkye at til ti'j ju mya b'a'n ma tzaj qi'j. Jawtzun swert kyu'n ex aju swert kub' tz'aq tib'aj Jonás.

⁸ Xi'tzun kyma'n te: —Q'mantza qeye tiqu'n ma tzaj mya b'a'n qib'aj. ¿Alkye taq'una? ¿Jatum tzajniya? ¿Alkye ttanmiya ex alkye tiyjila? Che chi xjal.

⁹ Atzunte Jonás xi ttzaq'we'n: —Aj Hebreo qine ex in chin k'ulune te Qman aju Dios at tuj kya'j, aju b'inchante mar ex tx'otx', chi Jonás.

¹⁰ Tzaj nimxix kyxob'il qe yukul barc, ex xi kyma'n te: —¿Tiqu'n ma tb'inchaya jlu? Porke el kynik' ti'j qa otoq tz'el oq Jonás twitz Qman ex ax Jonás otoq txi q'mante kye.

¹¹ Ex tu'nju kyja' ttzaj pulin mar nimxix wen, xi kyqanin te: ¿Ti kb'antel qu'ne ti'ja tu'ntzun tkub' nume' mar?.

¹² —Chin kyxo'nxe tuj mar, tu'ntzun tkub' nume'. B'a'n wu'ne, aqine at wile, ex tu'ntzun jlu ma tzaj nintz kyq'iq' lu kyib'aje, chi Jonás, xi ttzaq'we'n.

¹³ Qe yukul barc o kyajb'e tu'n kyajtz meltz'aj ex e ok ten yukulte barc tu'n tkyaqil kyipun, tu'ntzun kyik'el juntl maj ttzi tx'otx', ex minti'x pon kyxkye' ti'j, porke ate mar noq masxix tzaj pulin wen.

¹⁴ E oktzun ten kub'sal twitz Qman, che chi kyja': —Aya Qman, mi'n taq'a amb'il tu'n qkyime tu'n tlaj til ju xinaq lu. Ex mi'n tz'ok tq'o'na te qile aju tkamik qa minti' til, porke ma b'ant tu'na ik tza'nx tajb'ila, che chi.

¹⁵ Ku'xtzun xo'n Jonás kyu'n tuj mar ex atzunte mar kub' nume'.

¹⁶ Tejtzun kyke'yinte qe yukul barc jlu, tzaj nimxix tchi Qman kyi'j; xi kyq'o'n jun chojb'il te Qman ex xi kytziyan tu'n kyniman te.

¹⁷ Ex b'anin tten jun nintz kyiẍ tu'n Qman tu'n t-xi b'alq'u'n Jonás tu'n. Oxe q'ij ex oxe qonik'an ten Jonás tuj tk'u'j kyiẍ.