Ester 1 - Mam de Huehuetenango nueva ortografía

Tej tb'ant jun nintz wa'n tu'n rey Asuero

¹ A jlu o b'aj tuj tq'ijlalil rey Asuero, aju in kawintoq kyib'aj 127 partament, tzajni qe' max jatum ta' tx'otx' India ex ponin b'aj jatum ta' tx'otx' Etiopía,

² ex atzun najltoq tuj nintz tnam Susa jatum in kawintoq.

³ Tuj toxin ab'q'i ttzyetlen tkawin rey Asuero, ok jun nintz wa'n tu'n kye kykyaqil qeju at kyoklen ttxlaj, kye qeju in che onin ti'j tuj tkawb'il, kye qe nejenel kye soldad aj Persia ex aj Media, ex kye qe gobernador ex qe nejenel kyuj qe partament,

⁴ tu'ntzun t-xi tyek'un aju tq'inumab'l ex aju toklen tkawb'il, ex tu'n t-xi tyek'un tipumal ma'xix toklen. Ex aju ninq'ij lu qaq xjaw o ten.

⁵ Tejtzun tb'aj ninq'ij lu, o tb'incha rey juntl wuq q'ij ninq'ij tuj ttxa'n pe'n jatum tkub' tqan b'ech twitz tja. Kykyaqil qeju najlqe tuj tnam Susa, tza'nx qeju ma' kyoklen ax ikx qeju ch'in kyoklen, e je'x txko'n wa'l tuj nintz wa'n lu.

⁶ Aju ttxa'n pe'n otoq b'aj adornarin kyu'n qe xb'alun tb'anilxix saq ex cha'x che ke'yin, k'alo'n qe kyu'n qe taq'al b'inchamaj ti'j noq' lino ex juntl wiq noq' ẍjulin ke'yin, kyexsa'n qe kyuj qe argoy saq pwaq, ex k'alo'n qe kyi'j qe tqan ja ab'j mármol kytx'otx'il. Ax ikx otoq kub' kyq'o'n qe q'uqb'il q'an pwaq ex saq pwaq kytx'otx'il, ex te piso kykub'toq qe tal ab'j tb'anilxix, junxilchaq che ke'yin.

⁷ Xi q'o'n kyk'a' xjal kyuj qe copa q'an pwaq kytx'otx'il; teyle junjun copa partchaq b'inchb'en kye, ex nimtoq ta'l twitz uva at aju otoq tzaj tq'o'n rey, tu'nju at nim tgan tu'n t-xi tq'o'n kye xjal.

⁸ Maske ikju, pero otoq txi tq'o'n rey orden kye qeju in che ajb'en tuj tja tu'n mi'n tok kyq'o'n il kyi'j xjal tu'n kyk'an vin, noq o'kx teyle junjun tu'n tk'an noq nik'pun taj.

⁹ Ax ikx te Vasti aju t-xu'jil rey Asuero, b'ant jun nintz wa'n tu'n, te kye kykyaqil qe xu'j ate' tuj tja rey.

¹⁰ Tujtzun twuqin q'ij ninq'ij, tej in tzalajtoq rey wen tu'nju vin otoq b'aj tk'a'n, e je'x t-sama'n wuq xinaq in che ajb'en te ex q'uql tk'u'j kyi'j, ex atzun qe jlu: Mehumán, Bizta, Harbona, Bigta, Abagta, Zetar ex Carcas.

¹¹ Xi tma'n kye tu'n tpon kyi'n Vasti aju t-xu'jil max twitz, tb'inchan tib' wen ex tjaxsa'n tcoron tuj twi', tu'ntzun kyjaw lab'in tnam xjal ti'j, ax ikx qe xjal ma' kyoklen, ok kylonte qa mejorxix ke'yin; ex ax tok tb'anilxix ke'yin t-xu'jil rey.

¹² Atzunte Vasti aju t-xu'jil rey minti' xi tniman aju orden otoq txi tq'o'n rey kye qe xinaq q'uqlxix tk'u'j kyi'j. Tzajtzun nimxix tq'oj rey, ex tzaj nim ttx'u'jil,

¹³ ex xi tqanin kye qe xjal at kynab'l ti'j ley, tu'nju jun costumr jlu, qa at jun ti'xti in b'aj ti'j rey, in xi' naj qanil te kye qe xjal at kynab'l ti'j ley ex ti'j alkye tu'n tb'ant.

¹⁴ E tzajtzun ttxko'n rey qe xinaq lu: Carsena, Setar, Admata, Tarsis, Meres, Marsena ex Memucán; atzun qe wuq xinaq lu ma'xix kyoklen tuj Persia ex tuj Media, ex attoq kyoklen tuj tkawb'il rey ex attoq kyoklen tu'n kyokx yolil tuk'il rey noq alkyex or.

¹⁵ Xitzun tqanin rey kye: —¿Ti in tma'n ley, ti kb'antel wu'ne ti'j nxu'jile Vasti, tu'nju minti' ma txi tniman aju orden xi q'ma'n te kyu'n qe nsanjele?

¹⁶ Ex kywitztzun qeju at kyoklen tuj tkawb'il rey, xi ttzaq'we'n Memucán te rey kyja': —Tat rey, aju t-xu'jila Vasti mya o'kx ti'ja ma tb'incha mya b'a'n, ax ikx kyi'j kykyaqil qeju at kyoklen tuj kawb'il ex kyi'j kykyaqil xjal ate' kyuj qe partament ate' tjaq' tkawb'ila.

¹⁷ Kb'injtzel kyu'n kykyaqil xu'j aju ma tb'incha t-xu'jila, ex tu'n jlu mlay txi kyniman xu'j kychmil, ex oklo kyma' kyja': Ate rey Asuero xi txokb'aj Vasti tu'n, aju t-xu'jil, ex atzunte t-xu'jil minti' xi tniman.

¹⁸ Ok kyb'inte kyxu'jil qeju at kyoklen tuj Persia ex tuj Media aju ma tb'incha t-xu'jila, oklo che okel ten yolil ti'j b'i'x ja'lo tuk'il kychmil, ex tu'ntzun jlu ktzajel ik'b'il ex q'oj kyxol.

¹⁹ Kyja'tzun, qa b'a'n tuj twitza Tat Rey, q'o'n exa jun ley aju mlay kub' q'uchj, tu'n tkyaj tz'ib'et tuj kyley aj Persia ex aj Media, ex atzun ley jlu: Ya minti'tl toklen Vasti aju t-xu'jil rey tu'n tpon juntl maj yek'ul tib' twitz rey. Ex aju toklen te t-xu'jil rey k'elel q'it ex kxel q'ot te juntl xu'j mas b'a'n ik tza'n te.

²⁰ Aju ley kb'antel tu'na il ti'j tu'n tb'injtz kyu'n kykyaqil xjal ate' tjaq' tkawb'ila, kyja'tzun kykyaqil xu'j kb'antel kyniman kychmil, qa ma' toklen kychmil ex qa ch'in toklen, chi Memucán.

²¹ Aju nab'l xi tq'o'n Memucán b'a'n ela tuj twitz rey, ax ikx b'a'n ela tuj kywitz qeju at kyoklen tuj tkawb'il, ex b'anttzun jlu tu'n rey.

²² E je'xtzun t-sama'n rey qe u'j kyuj kykyaqil partament jatum ponin b'aj tkawb'il, tz'ib'amaj tuj kyyol xjal te teyle junjun partament ik tza'nx tz'ib'bil te kyyol xjal kyuj kykyaqil tnam ate' tjaq' tkawb'il, ex aju u'j lu il ti'j tu'n tjaw sch'it kywitz kykyaqil xjal tuj kyex kyyol. Xi tma'n tuj u'j: Teyle junjun chmilb'aj, a tu'n tkawin tuj tja.