Zefaniya 3 - Amazwi Yakwe Leza 2013

Iifyo lyakwe Yelusalemu nu kukululwa kwakwe

¹ Kalanda kuli we Yelusalemu, umusumba wa antu ankalwe, yacisanguka nupya akowele!

² Wemo usiyela umuntu nanti wenga, nupya usizumila ukusundwa. Usitaila muli Yawe, nanti ukupalama kuli Leza.

³ Yacilolo yako yakung'anza wakwe yacisama, ni ntunguluzi zyako zikoline wa mimbulu, ino isyasya nanti cimwi kuti cifike nu mukatondo.

⁴ Yakasema yakwe imbutuma. Yene incenjezi.

⁵ Lelo Yawe acili mu musumba uo, nupya wene akacita vyaololoke. Wene asicita iviipe. Cila katondo wene akapingwila antu yakwe, ukwaula kuposiwa. Lelo yakaifya yakatwalilila ukucita iviipe nupya yasi na nsonyi.

⁶ Yawe akuti, “Natinonona antu amu nko zyonsi, nga nu kuwisya amalinga yao yonsi ankondo. Ni miseo yao naitazyela, kusi umuntu nanti wenga akapita mwenemo. Imisumba yao yononwa, nupya kusi umuntu nanti wenga asile mwenemo.

⁷ Nelenginye ukuti cumi kwene lyene antu yane yamangoopa, nu kufukila kusunda kwane, nu kuti yene yatalatala yilile amalamulo yane. Lelo yene yakweti insuna yakutwalilila ukucita iviipe, muli vyonsi vino yacitanga.”

⁸ Yawe akuti, “Caleka lolelini, mulolele uwanda uno ndakatuka nu kumupeela umulandu. Pasi pano natinelenganya uku konganika antu amu mitundu yonsi, kumwi na mawene kwene, kuti njalange ukali wane yuvwe ukulu wa ukali wane. Insi yonsi ilononwa ku ukali wa cipyu cane.

⁹ “Lyene ndasangulula amazwi ya antu amu mitundu yonsi, nga lyene yalapepa kuli ne Yawe nenga mpo nupya yatalapepa tuleza tuze lelo yalanjela.

¹⁰ Ukutandikila nu kutali kwene ku nguzi zyaku Kusyi, antu yane asalangana, yayo akampepa, yalafuma kweneko nu kundetela amawila.

¹¹ Pa wanda kwene uo mwe antu yane mutalaya ni nsonyi pa vintu vino mwacita umu kunsangukila. Pano nemo ndafumya antu yonsi acilumba. Nupya mutalasya muituumike apa mwamba wane uwamuzilo.

¹² Lelo nemo ndasyapo sile munuli antu aicefya nupya afuke, yayo akalilila kunondi kuti njazwe.

¹³ Aina Izlaeli alasyalapo yatalifya ku muntu awe. Yene yatalatumpoka awe, nanti ukulanda ivyaucenjezi, foo. Yalaya nu longo nu kuikalila uku matwi cele, ukwaula nanti aumwi uwakuyasonsomba.”

Ulwimbo lwa nsansa

¹⁴ Si aleni saulini ulwimbo lwa nsansa mwe ina Izlaeli, mwangulisye nu kuzanga nu mwenzo onsi!

¹⁵ Ala Yawe wene watalovya anisi inu, Watalovya yayo yonsi akamucuzya. Yawe uwamuteeka mwemwe mwe ina Izlaeli, ali namwe, fwandi kusi icakuti mwaoopa foo.

¹⁶ Insita imwi ilafika, lino yalamunena mwe ina Izlaeli iyati, “Mutuvwa intete mwe ina musumba wa Zioni! Mutaleka na makasa inu yapomponteke foo!”

¹⁷ Yawe Leza winu waya namwe, amaka yakwe akalenga ukuti mwacimvya. Yawe alasansamukila munomuli, nupya wene alamupeela umi upya, pasipano mwemo wamutemwa. Mwemo alamuzangila nu tupundu twa nsansa,

¹⁸ ndi vino antu yakacita apa wanda ukulu. Yawe akuti, “Nemo ntalesile ukuti isyamo lipalame kunomuli, nupya ntalesile ukuti mwemo muzewane foo.

¹⁹ Pa nsita ilya ndavunuka yonsi akamuzunya. Ndatuula yayo alemale nu kukonganika yayo asalangana. Ndaleka antu yayatasye nu kuyacindamika, konsi kuno anisi yao yayasausya.

²⁰ Pa nsita ilya indamukonganika, nu kumuwezya ku mwinu. Ndaleka mulumbuke nu kuya alongo, pakasi ka antu amu mitundu yonsi ya pano nsi. Ndamuwezezya uwene winu mule mukulola.” Avino Yawe wavwanga.