Zefaniya 2 - Amazwi Yakwe Leza 2013

Ukupapata antu kuti yazenzuke

¹ Mwe antu amu luko ulusi na nsonyi, si elenganyini ningo nga muzenzuke

² lino anisi inu yatali kuti yize yamusende ndi vino umuza ukaululula cungu, lino ukali wakwe Yawe utali umuponele, lino uwanda wa ukali wakwe utacili wize.

³ Zenzukini nu kwiza kuli Yawe, mwensi mwe ikazi ya mpanga, yano yakayela amalamulo yakwe. Citini ivyaololoke nu kuicefya pa manso yakwe Yawe. Limwi muluutuka ukuvunukwa apa wanda uno Yawe alasokolola ukali wakwe.

Ukuzanzwa kwa mitundu yazinguluka Izlaeli

⁴ Umusumba wa Gaza mutalasyala umuntu, nu wa Asyikeloni ulasyala icipompa. Lino ilanzi lilafika umutwe pakasi umusumba wa Asyidodi mutalasyala nanti cimwi, na ikazi yamu musumba wa Ekiloni yalazingwa mwenemo.

⁵ Kalanda kuli mwemwe mwemuno mwikala mu nkumba yakwe yemba, mwe mutundu wakwe Keleti. Yawe watamulolwesya, mwe ina Kenani, impanga ya ina Filisti. Wene akuti, “Ndamonona mwemwe mwensi, nga patalasyala nanti wenga uwa munomuli.”

⁶ Umusumba uno uli mu nkumba yakwe yemba, ulaya wa mitanda yakwe yakacema ni vitata vya mfwele.

⁷ Amu mutundu wakwe Yuda asyala yalikala mu mpanga inu. Yene yalacemelamo iviteekwa vyao nu kusendama mu mitanda ya ina Asyikeloni. Yawe Leza wao alayasakamala nu kuleka yaye nu longo nupya kwene.

Aina Moabu na ina Amoni

⁸ Yawe akuti, “Natinuvwa intusi zya ina Moabu ni misowe ya ina Amoni, muno yakutuka antu yane na muno yakuyuvwa ukuti yamapoka impanga yao.

⁹ Caleka ne Yawe Wamaka yonsi nkulapa ukuti, ‘Nene ne Leza waumi, uwa ina Izlaeli, nkuti cumi kwene aina Moabu yalononwa wa antu aku Sodoma, aina Amoni yalononwa wa antu aku Gomola. Ncende ilya ilaya wa musonso wa vikona nupya wa viwina vya musilya. Antu yane asyala yalazanza incende iyo. Yayo apusuka amu luko lwane yalapoka impanga yao.’ ”

¹⁰ Vivyo ali vino antu amu mpanga ya Moabu na ina Amoni yalavunukwa pa kuituumika nu kuya ni cilumba, pa kutuka nu kusoweka antu yakwe Yawe Wamaka yonsi.

¹¹ Yawe alayoofya wakwe cimwi. Wene alonona tuleza twa mpanga ilya. Mitundu yonsi ya antu ilapepa Yawe, cila mutundu ulamupepa mu mpanga yakweo.

Kulanda vyapali Etiopia na Asilya

¹² Namwe kwene mwe ina Kusyi, Yawe alamukoma uku lupanga lwakwe.

Yawe alavunuka aina Asilya

¹³ Yawe alaomvya amaka yakwe ku katutu nu konona impanga ya Asilya. Umusumba wa Ninive alaucita wa citalang'anda nupya ulaya uumalale wa lwanga.

¹⁴ Cilaya icifulo kuno amaufyo ya viteekwa nga ni viumbwa vya misango yonsi vilalambalala. Sinsimwe uwamu lwanga ni vipuululu vilalila mu ncesi zyakweo. Ukulila kwaviko kuluvwika mu mawindo, amaunguluwe yalazanwa mu milyango yakweo, ni myalo ya mikelide ilasyala icenjemile.

¹⁵ Ukwene uli musumba uno waitakizizyanga amaka nu kwelenganya ukuti utenzi mu mutende. Antu yamwenemo yakaelenganya mu myenzo yao yati, “Umusumba witu uli musumba umu nsi yonsi uwamaka ukuluta.” Wene ulaya wi tongwa, mumo muno inyama zya mpanga zilikala! Umuntu wensi wino alapita apipi alazakaza nu kuvwa amiiku uku ntete.