Zakaliya 8 - Amazwi Yakwe Leza 2013

Yawe walaya ukuwezya Yelusalemu nupya

¹ Nupya kwene Yawe Wamaka yonsi anena amazwi yaa akuti,

² “Nkuzuwila Zioni wakwe cimwi, pamulandu wakutemwisya aikazi ya mwenemo, ukutemwa kuno kwandenga kuti mpate anisi yao.”

³ Yawe Wamaka yonsi wavwanga wati, “Ndawela ku Zioni nu kwikala mu Yelusalemu. Lyene umusumba wa Yelusalemu ulaamwa ukuti Umusumba wa Cumi, nga nu mwamba wane ne Yawe Wamaka yonsi ulaamwa ukuti Mwamba Wamuzilo.”

⁴ Yawe Wamaka yonsi wavwanga wati, “Nupya kwene akoloci aonsi na anaci yalaikala mu misolo yamu Yelusalemu, cila wenga ala akweti insonzo mu minwe pamulandu wa kukotesya kwakwe.

⁵ Misolo yamu musumba ulya ilazula tupu ance, yakalume na yakaci yayo alacena mwenemo.”

⁶ Yawe Wamaka yonsi wavwanga wati, “Pa nsita iyo icintu cico cilaloleka cipezyamano ku antu amu mutundu ulya alasyalapo, awe cumi kuli nene citalaya cipezyamano foo.

⁷ Nemo ndatuula antu yane, ndayafumya mu mpanga zyaku ufumondaka, nu mu mpanga zyaku uwondaka.

⁸ Ndayawezya kuti yakize yakikale nu mu Yelusalemu. Yalaya antu yane, nani ndaya Leza wao. Ndayateeka ningo nu ulungami.

⁹ “Posyini! Pali ndakai mwemo mukuuvwa amazwi ali yonga sile yano yakasema yalandanga, lilyo lino umufula wa kukuulilapo cipya cipya Ng'anda yane ikulu wafukwilwe.

¹⁰ Lino insita iyo itacili yafika, kutalolekanga umuntu nanti wenga uwakulembwa uku ncito iyo pakuti sile alipilwa penepo, nanti sile ukwazima iciteekwa conga pakuti caombapo nu kulipila umweneco wa citeekwa, foo. Na antu yakuposiwa kuomba imilimo yao pamulandu wakoopa anisi yao, pasi pano anene nasongelekanyanga antu yonsi.

¹¹ Lelo pali ndakai, mwe antu mwemuno mwasyalapo, nemo lyene ntakumucitilanga ndi vino nacitilanga antu yampiti.

¹² “Mwemo mumaikomelelanga imbezu ku matwi cele. Imitingi inu imaseekanga iviseekwa, nu musili nao umamezyanga ivizao, kumayanga imvula ivule. Vii vyonsi vili vino namamupeelanga mwemwe mwe antu mwe muno mwasyalapo.

¹³ Mwe antu amu Yuda mwe, na mwe ina Izlaeli mwe! Mpiti ainamasi yatolanga izina linu, alino iyalumbula pakutipwila antu yauze, ala yakuti, ‘Mwe anisi mwe, cakumulya caula, wakwe cici calile Ayuda na ina Izlaeli!’ Lelo nemo ndamutuula, na inamasi lyene yamamoopanga. Si mungala mwalukupolelewa ndi vikwene ivyapolelelwa Ayuda na ina Izlaeli! Caleka mwemo posyini sile, mutaoopa foo.”

¹⁴ Nupya Yawe Wamaka yonsi wavwanga wati, “Lino ivikolwe vinu vyansosizye umwenzo, nemo napanzile ukuviponyezya isyamo, nu kuwezya ntalawezya umwenzo foo.

¹⁵ Lelo ndakai nimpanga ukupolelela aina Izlaeli na Ayuda. Caleka mutuuvwa intete.

¹⁶ Vino mwemo mungacita sile aivi, mwalanzyanya ivyacumi. Mu matengo ya milandu mwaputula imilandu nu ulungami apakuleta ulongo.

¹⁷ Mutapanga ukucuzyanya. Mutalapa ufi pano vii vyonsi navisoka. Ivyavwanga ne Yawe Wamaka yonsi.”

¹⁸ Nupya Yawe Wamaka yonsi wizile kunondi. Wanenyile wati,

¹⁹ “Kuizilizya ukulya kuno mwemo mukacita mu mwezi wakwe cini, wakwe cisano, wakwe cinimbali nga nu walenga ikumi, kulaya amanda makulu akuzevya mwenemo nu kuzanga ku antu amu Yuda. Fwandi mwemo mwatemwa sile ivyacumi nu kwikala umutende.”

²⁰ Nupya Yawe Wamaka Yonsi wavwanzile ati, “Insita ikwiza lino antu amu mitundu ikalamba yalaiza kuno ku Yelusalemu, pamwi na antu alafuma mu misumba yuze ikalamba.

²¹ Amu musumba onga yalanena amu musumba uze yati, ‘Yame, twapita ku kupepa Yawe Wamaka yonsi, tukamupapate pakuti atupolelele. Si aleni, twapita!’

²² Fwandi antu amu mitundu ikalamba nupya yamaka, yalaiza kuno ku Yelusalemu ku kupepa ne Yawe Wamaka yonsi nu ku kumpapata pakuti ince nayapolelela.”

²³ Yawe Wamaka yonsi wavwanga wati, “Mu manda yalya apa inamasi yonsi akaalanda indimi zipusanepusane, ainamasi ikumi yalaiza ku Muyuda wenga, nu kumunena yati, ‘Tukulonda tuye nawe, pano swemo tuvwa ukuti Leza waya kunomuli.’ ”