Zakaliya 6 - Amazwi Yakwe Leza 2013

Cilolwa ca maceleta yani

¹ Ne Zakaliya indola icilolwa nacuze. Iila lii lyene indola amaceleta yakufuma pakasi ka myamba iili ya cela ca mukuwa.

² Celeta lyakutandikilapo lyasendwanga ku mfwalasi ziyenzu, nga lyakwe ciili ku mfwalasi zitifi,

³ nga lyakwe citatu ku mfwalasi zitiswe, nga lyakwe cini ku mfwalasi zya maalamaala.

⁴ Alino umungeli wino twalandanga nawe imuzya inti, “Uzye amaceleta yaya nayo acani?”

⁵ Umungeli wilya nawe angasuka ati, “Yakwene ili miza ini ya kwiyulu, ino ikufuma kuli Yawe umweneco wa nsi yonsi.”

⁶ Iceleta lilya ilili ni mfwalasi zitifi, likuya ku lusansa lwaku kayeya ka mpanga ya Babiloni, na lili ilili ni mfwalasi zitiswe lilungime ku mpanga yaku uwondaka, na lino lili ni mfwalasi ziyenzu lilungime ku mpanga yaku ufumondaka, na lino lili ni mfwalasi zya maalamaala lilungime ku mpanga yaku katutu.

⁷ Imfwalasi zya maalamaala lino zyalolike zyene zyali sile zizakantike pakuya mu kulonda impanga. Umungeli pali pakuzinena ati, “Pitangini fwandi kalondini impanga!” Fwandi nazyo ali pakupita.

⁸ Lyene umungeli anena ati, “Walola, zizi zino zyalungime uku katutu ku mpanga ya Babiloni, ali zino zyatekizye Yawe umwenzo, pasi pano walanga wene watasoka.”

Ilamulo lyakulasika Yoswa apa wene

⁹ Yawe anena umulandu uu ati,

¹⁰ “We Zakaliya, pita kasende vyamawila ku azya aku Helidai, ku Tobiya, Yedaya na kuli Yosiya umwana umonsi wakwe Zefaniya uwawelulwike ukufuma ku mpanga ya Babiloni mu uzya. Wewe kwene ukaye ku ng'anda yakwe Yosiya umwana umonsi wakwe Zefaniya.

¹¹ Ukaye ukatole siluva na zaabu vino yatuuzile, ukapangemo icilongwe ca wene cakuzwika Simapepo Mukulu Yoswa umwana wakwe Yeozadaki.

¹² Ukamunene ukuti ne Yawe Wamaka yonsi navwanga nati, ‘Umuntu wino akaamwa ukuti umusambo, wakulilila papo kwene pano ali, nga nu kukuulila Yawe Ng'anda ikulu cipya cipya.

¹³ Aliwe kwene alankuulila Ng'anda yane ikulu ne Yawe, nupya alacindama wa mwene wa muno nsi, wiyo alaateeka na antu yakwe. Alakwatapo simapepo wenga wino alaaimilila pa cilimba cakwe ca wene, yonsi yoili yalauvwana nu kuombela ca pamwi mu mutende.

¹⁴ Ingala iyo ya wene ilaya iciusizyo mu ng'anda yane ne Yawe, cakwiusizyako Helidai, Tobiya, Yedaya na Yosiya. Umwana umonsi wakwe Zefaniya.’

¹⁵ “Antu aikala kutali yaliza mukwazwilizya ukukuula cipya cipya Ng'anda ikulu yakwe Yawe. Lino ilasila, alino mulasininkizya ukuti fwandi Yawe Wamaka yonsi aliwe wantumile ne Zakaliya kunomuli. Ni cintu cico cilacitika kuno muli ndi mwalondela ningo vino Yawe wamukonkomezyanga.”