Yowelo 1 - Amazwi Yakwe Leza 2013

¹ Lii, lili landwe lisuma lino Yawe wapile kuli Yowelo, umwana umonsi wakwe Petueli.

Antu yalosya pamulandu nu ononyi wakwe makanta

² Mwemo mwe ikolo, siuvwini. Teyini amatwi, mwensi mwemuno mwikala mu mpanga ya Ayuda. Uzye vii vino mwalola vyatala vyamuponela umu nkulo inu nanti umu manda ya vikolwe vinu?

³ Muyanene ana inu, nayo yakize yakanene ana yao nga na izikulu inu yatwalilile ukunena ivizikulula vyao.

⁴ Icintu consi cino ivikwe vyasile, makanta wizile alya. Na cino makanta wasile lulele nawe wizile alya, mpaka avivyo kwene kutali ni casile.

⁵ Acino zyukini mwe yakolesi mwe, nga mulile. Muililile mwensi mwemuno mwatemwa ukumwa waini, pano imitingi yonsi pyu yatiliika nu kulowa.

⁶ Imikumbi yakwe makanta yatipona muno nsi, cikuloleka icamaka sana nupya citangapendwa. Amino yakwe yali wa mino yakwe cisama uwakalume. Amino yakwe yakalipa wa mino yakwe cisama uwakaci.

⁷ Wataonona umutingi wane, watavunola imisamvu yane. Wene watapandola imisambo yonsi nu kuvutulula imisisi nu kuisumbola. Imisambo yonsi wataisya ili mpee!

⁸ Mwe antu, si lilisini, wakwe mwali uwatazwala umupango. Wino akulila pamulandu wa mfwa yakwe lumbwe uwamutaisye.

⁹ Ivyamawila vyonsi ivyakumwa ni vyakulya vitangapeelwa lyene ku Ng'anda ikulu yakwe Yawe Yasimapepo yakulosya, aomvi yakwe yonsi yakulosya.

¹⁰ Ivyalo vyalala, umusili ukulosya pasi pano musi ingano, imitingi yonsi yatiuma. Imiolivi nayo kwene yatiuma.

¹¹ Acino sokini mwe yalimi, lilini nu kulosya mwe yalimi ya matingi. Pano ingano ni mbezu zyakwe baale, na vyonsi vyamu calo vyativyononeka.

¹² Umutingi uuma, nu musamvu wafota. Nu mupomegeleneti, ni vyazi, nu muapo, nga ni miti yonsi ikaseeka ivizao munonsi, yene yatifota nu kuuma. Cumi kwene uluzango lwa antu lwasilila limwi.

¹³ Mwe yasimapepo, si zwalini vyakuzwala vyandosya, alino muyume apa visao pamulandu wa ulanda uwatiutuponela. Lilini mwemuno mukatumikila apa tuvuwa. Zwalini muivimbe ivizwalo vya ulanda uwanda onsi. Mwe aomvi yakwe Leza winu.

¹⁴ Nenini antu kuti yafunge ukulya. Nenini antu kuti yakongane umu mucinzi. Ama aikolo pamwi na yonsi aikala umu mpanga ii kuti yize yakongane mu Ng'anda ikulu yakwe Yawe Leza winu, nga mulile kunoli.

¹⁵ Iye mwe! Uwanda wakwe Yawe watiupalama, uwanda wakwe Yawe ukwiza nu ononesi uno ukufuma kuli wiyo Uwamaka yonsi.

¹⁶ Ivyakulya vitu vikusila lino swemo tukulola na manso ntontonto. Umu Ng'anda ikulu yakwe Leza witu musi insansa nanti ukuseka.

¹⁷ Imbezu zyonsi zyatizikonkotana pano umusili watiuma. Inkoma zyonsi nazyo kwene zyatizisambuluka. Intanta zyonsi zyatizyononeka pano kusi icakusungilamo.

¹⁸ Iviteekwa navyo kwene vikulila inzala. Ing'ombe nazyo zikulukulungana pano zitakweti umulemvwe. Ni mfwele kwene zikulukuzewana.

¹⁹ Nkulilila kunuli we Yawe, pano umoto wationona umulemvwe, na makala ya moto yalovya imitengo yonsi.

²⁰ Ni nyama zya mpanga kwene zikukulilila, pano amanzi yatiyapwa mu nguzi zyonsi.