Yobo 34 - Amazwi Yakwe Leza 2013

Eliu wavwangila kweneko Leza

¹ Eliu atwalilila ukuvwanga ati,

² “Namwe kwene mwe antu yamano, muvwe amazwi yane, mutezye kunondi mwe yacenjele.

³ Mwamanya ukuti ikutwi ali lino likapusanya ivilandwa, ndi vino ululimi lukauvwa usuma wa vilyo.

⁴ Ali cino fwandi naswe kwene katulondelezye icingalungama, nupya swensi pamwi tulole icingazipa.

⁵ Yobo umweneco watavwanga ukuti umulungame, lelo Leza wakana ukuti ampingwile nu ulungami.

⁶ Nanti angala nindungika, akumpenda ukuya wantumpu. Nanti angala insi nu mulandu, ivilonda vino wamponyezya visi ni mipolele.

⁷ Uzye mwemo mwatala mwalola umuntu uwaya wakwe Yobo? Yobo wii acivwangevwange kuli Leza,

⁸ Yobo akapita na antu akacita iviipe, akapita pamwi ni vipondo.”

⁹ Yobo akavwanga ati, “Umuntu wino akasi kuzanzya Leza akaicuzya sile.

¹⁰ “Ali cino fwandi muvwile navwanga ukuti mwe antu ya malango kutikini ningo. Pasi pano Leza asicita icintu iciipe, awe. Wamaka yonsi asifyenga umuntu foo.

¹¹ Leza akalinganya pali vino umuntu akacita. Wene akacitila cila muntu ukulinganya ni miyele yakwe.

¹² Cumi kwene, Leza ataya nu lufyengo, awe. Wamaka yonsi atange afyenge umuntu, umu uputuzi wakwe nanti panono.

¹³ Nupya kutatala kwaya umuntu nantu wenga pano nsi uwamuseekile insi ukuti ayangalila.

¹⁴ Ndi cali icakuti Leza atale afumye mupasi wakwe pano nsi, afumyepo nu mupu wakwe,

¹⁵ lyene ivintu ivyaumi vyonsi vingalowa pyu. Nu muntu kwene angafwa aswilile nuku lukungu.

¹⁶ Ndi cakuti uli namano yakwiluka, uvwa cico, kutika kuli vino nalangasa.

¹⁷ Uzye umuntu uwapata ulungami, aliwe angateeka antu? Uzye kwene umweneco wa ulungami na Maka yonsi, ali wino ungapama nu kumupeela mulandu?

¹⁸ Uzye aweni anganena Leza ukuti uwa ciwelewele? Pasi pano wene akakalipila na asambazi kwene ati, ‘Mwemwe vipondo.’

¹⁹ Wene nu kuntunguluzi kwene atakwata akasoozi, asipaatulula pakasi ka akama na apina, pano yonsi kwene, iviumbwa vya kumakasa yakwe.

²⁰ Yene yakafwa mu kupumikiziwa, usiku pakasi. Leza akakunta antu pansi, nga nayo iyafwa, antu aulamba yakafumiziwapo ukwaula intazi nanti imwi.

²¹ Wene akaceceta imipitile ya muntu, nu kulola cila lutampulo lwakwe.

²² Kutaya ukwafisama, nanti ukwazika, kuno kacita wa viipe angafisama.

²³ Leza asimanyisya umuntu uwanda wakumwamilapo, pakuti aye kuno ali uku kupingulwa.

²⁴ Akalovya acindami apaula ukuyuzya umulandu, nu kupyanikizya, akapyanikizya antu yauze.

²⁵ Apa mulandu wakuti wamanya mpiti ivicitwa vyao, akayasumba pansi usiku. Apano ayalopwela, antu iyayalyatola.

²⁶ Akatimbolela yakaifya apa manso ya antu, nu kuyanyepa umu myando,

²⁷ apamulandu nu utalami wao ni misuli uku masunde yakwe.

²⁸ Apa mulandu wakuti yapatikizye alanda ukupunda, kuli Leza, nawe fwandi ali pakuvwa ukulaizya kwao, nu kuyaasuka wayaasuka.

²⁹ Ale lelo tuti Leza ndi cakuti atakasi ukuyaasuka, uzye kungaya uwakumusokonsya? Nanti ndi cakuti wene wavimba apa manso, uzye kungaya uwakumulola? Kusi!

³⁰ Ali cino fwandi Leza akalungamika imitundu na antu, nu kupususya umuntu mwipe, uku viteyo vya ulanda.”

³¹ Uzye akunoli umuntu wino anganena Leza ati, “Nene wa mulandu, lelo ntalatala nswilizye ukwifya nupya?

³² Unsambilizye ivintu vino nsikulola. Ndi cakuti naluvyanya, nalaya ukuti ntalaswilizya nupya.

³³ Umu mulandu ndi uu ndi cakuti utange uzumile upinguzi wakwe, uzye wemo ukulola ukuti aliwe Leza angazumila ukucita vino wewe ukulonda? Ale fwandi icakwako, wewe wasolola cico, asi anene foo. Wewe fwandi utupande amano yako.

³⁴ Antu ya malango na wensi umucenjele, pali yayo akunguvwa yanganena yati,

³⁵ ‘Yobo akuvwanga ivyaula amano, wene akuzaila sile.’

³⁶ Ali cino nu kumwezya, yangamwezya sana, pano imyasukile yakwe iya antu aipe.

³⁷ Na piifyo lyakwe wene walundilapo ukutalamila Leza. Akutwisika ulungami wakwe Leza apa manso itu, nu kuvuzyanya amazwi amusaalula kunoli.”