Yobo 1 - Amazwi Yakwe Leza 2013

Satana wezya Yobo iila lyakwe conga

¹ Mu mpanga ya Uzi mwikalanga umuntu umwi wino izina lyakwe wali a Yobo. Umuntu wi wali uwaula umulandu nupya akacita ivisuma. Umuntu wi woopanga Leza nu kuleuka inkota.

² Wene wakweti ana aonsi cinimbali na ana anaci yatatu.

³ Wakweti imfwele amazimbi cinimbali, ingamila amazimbi yatatu, yamasaye izimbi lyonga nga na yapunda imyanda isano. Wakweti na aomwi aingi sana. Wali umuntu mukama wakwe cimwi ukuluta antu yonsi amu mpanga zyaku ufumondaka.

⁴ Ana yakwe aonsi yacitanga uluti lwa kuteyanyizizyanya ivimulo mu mang'anda yao, uwanda umwi mu ng'anda yakwe umwi, nu wanda uze mu ng'anda yakwe umwi. Alino yalalika yakaci yao yaya yatatu ku vimulo vyao vivyo.

⁵ Lino amanda ya vimulo vivyo yapita, Yobo wamanga ana yakwe ku kuyasangulula. Alino katondotondo mu wanda uwalondelela penepo wapeelanga impolelwa ya wila wakoca, ala akupeelela cila mwana. Wene wacitanga vivyo pano welenginye ukuti limwi ale umwi mu ana yane wataifya, nu kulanda amazwi yamiponto kuli Leza mu mwenzo wakwe. Fwandi lulo lwali luli lutambi lwakwe Yobo amanda pe.

⁶ Uwanda umwi, ana yakwe Leza amwiyulu yizile uku kupempula Yawe. Na Satana kwene apano wali.

⁷ Alino lyene Yawe auzya Satana ati, “Uzye aukwi kuno wafuma?” Satana nawe aasuka Yawe ati, “Naile nkutandala mu nsi, inda nkuzeuluka ku na ku.”

⁸ Nupya Yawe auzya Satana ati, “Uzye utali walola ivyaya umuntu wane Yobo? Uzye kwene muno nsi mungaya umuntu wino yangalingana nawe umu kucita ivyaololoke? Wene wankwatila umucinzi ni coopo, nupya wene akafuntuka ku kucita akantu akali konsi akaipe.”

⁹ Lelo Satana aasuka Yawe ati, “Ee kwene. Uzye lelo tungati pataya cimwi icalenga kuti aye vivyo?

¹⁰ Uzye asi wewe kwene ukamucingilila pamwi ni vyuma vyakwe vyonsi? Ukapolelela icili consi cino akacita. Icalenga ni viteekwa vyakwe visanduluke mu mpanga yonsi.

¹¹ Lelo ndi cakuti wapokolola na vyonsi vino akweti, umalola wakutuka ale ukuvwa nu kuvwa!”

¹² Lyene Yawe anena Satana ati, “Icisuma, nakuzumilizya ukucita Yobo icili consi cino ungatemwa ukumucita. Lelo kwene umwisikulu utezya kumukoma.” Lyene Satana ali pakufuma, asya Yawe nga apita.

Ana yakwe Yobo yakomwa nga ni vyuma vyononwa

¹³ Uwanda umwi ana yakwe Yobo yali mu ng'anda yakwe silenzi, muno mwayelile amalila.

¹⁴ Lyene kwiza inkombe nga inena Yobo iti, “Lino yamasaye yako yali yakulima na yapunda ala yakulya lwa mupipi,

¹⁵ aina Sabeya yali yiza yavwangatila iviteekwa yavisenda vyonsi. Yali yakoma na aomvi yako. Nene nenga sile nimpusuka apakuti nize nkunene vino cali cili.”

¹⁶ Lino umuntu wilya atatala wamala ukulanda, inkombe nayuze ifika nga ivwanga iti, “Inkuwa yali yapona ukufuma ukwiyulu yiza yoca imfwele kumwi na aomvi kwene. Nene nenga sile nimpusuka apakuti nize nkunene vino cali cili.”

¹⁷ Nupya kwene lino umuntu wiyo atacili wamala ukuvwanga, muze nawe afika. Atandika nu kunena Yobo ati, “Aina Kalideya ivikundi vitatu, yali yiza yasenda ingamila zyako zyonsi. Yati yasya yakoma na aomvi yako yonsi. Nene nenga sile nimpusuka apakuti nize nkunene vino cali cili.”

¹⁸ Nupya kwene lino umuntu wiyo acili akulondololola, muze nawe afika nga avwanga ati, “Ana yako yonsi pamwi yali uku malila mwakwe silenzi.

¹⁹ Alino lyene icipunga ukufuma ku lwanga cali ciza cingila, icipukanya nu kusya cawisya yamutali. Ali vino calicawisya yamutali yonsi yani atungilila ing'anda. Ing'anda ali vino yaliyawa nu kwilikizya ana yako yonsi nu kufwa yatiyafwa. Nene nenga sile nimpusuka apakuti nize nkunene vino cali cili.”

²⁰ Lino Yobo uvwa vivyo, ali pakuvwandamuka, alepola ni laya lyakwe apakulanga ulanda uno wakwata. Alino apeela ni cikuzu. Nga lyene apona na pansi afukama nu kupepa kuli Yawe.

²¹ Alino avwanga ati, “Owe Mwe! Navilwe ukwaula nanti cimwi, nga nupya indafwa ukwaula nanti cimwi. Yawe aliwe wampile, nupya Yawe aliwe wapoka. Si Yawe sile wenga awino acindikwe!”

²² Umu uzanzo uwo onsi, Yobo atatazile aifye nanti cimwi nanti ukupeela Yawe umulandu.