Yoane 18 - Amazwi Yakwe Leza 2013

Kulemwa kwakwe Yesu

¹ Lyene lino Yesu wamala kupepa, afumako pamwi na alondezi yakwe aya ku mbalama yuze ya cifoloma ca Kiduloni. Ku ncende ilya kwaliko ni calo, nga Yesu na alondezi yakwe amuno iingila.

² Yuda, kakoopa, wene wamanyile apali calo, pano maila aingi Yesu na alondezi yakwe yakomenkananga kweneko.

³ Caleka Yuda aya kweneko ala atungulwile impuka ya vita vya uteko wa Ciloma, nga na yakalinda yamwi a Ng'anda ikulu yakwe Leza, ala yatumilwe na yasimapepo akalamba nga na Afaliseo, yano asenzile inkozyo ni nyali ni vyanzo.

⁴ Yesu wamanyile vintu vyonsi vino yali nu kucita kunoli, caleka aya pa nkolelo nga ayauzya ati, “Uzye mukulonda weni?”

⁵ Nao yaasuka yati, “A Yesu uwaku Nazaleti.” Yesu avwanga ati, “Anene.” Na Yuda kwene wino uwali nu kukoopa Yesu ala aimi nao papa kwene.

⁶ Lino Yesu wavwanga kunoyali ati, “Anene,” yawela cundansizi yapona na pansi.

⁷ Nupya kwene Yesu ayauzya ati, “Mukulonda weni?” Nao yaasuka yati, “A Yesu uwaku Nazaleti.”

⁸ Yesu ayanena ati, “Nati munena mpiti vino anene kwene. Caleka ndi mukundonda, lekini yaa yauze yapite.” (

⁹ Wavwanzile cii kuti yafikiliziwe mazwi yano wavwanzile ati, “Muli yao yano wampile, ntaponzya nanti wenga.”)

¹⁰ Simoni Petulo, wino wakweti lupanga, alusomola nga asempa ikutwi lilunji lya muomvi wakwe Simapepo Mukulu. Muomvi wii wamwangwa izina Makasi.

¹¹ Lelo Yesu anena Petulo ati, “Swilizya lupanga lwako mu cipata caluko! Uzye ukwelenganya vino ntangamwa lwako lwa ucuzi luno Tata watampela?”

Yatwala Yesu kuli Anasi

¹² Lyene vita vya uteko wa Ciloma pamwi nu mukalamba wakwevyo nga ni ntunguluzi zya Ciyuda, yalema Yesu nga yamunyepa.

¹³ Yatala yamutwala kuli Anasi. Wene wali a sivyala wakwe Kayafa, wino uwali a Simapepo Mukulu mu mwaka ulya.

¹⁴ Kayafa ali wino wapile intunguluzi zya Ciyuda ilango lyakuti cingazipa kuti umuntu wenga afwile antu onsi.

Petulo wakana Yesu

¹⁵ Lyene Simoni Petulo nu mulondezi muze yalondela Yesu. Mulondezi muze wii, wamanyikwe ningo kuli Simapepo Mukulu. Caleka aingila nu mu musolo wa Ng'anda ikulu yakwe Simapepo Mukulu,

¹⁶ lelo Petulo wene asyala aimi kunzi, pipi na pa mpongolo. Lyene mulondezi muze wino wamanyikwe ningo kuli Simapepo Mukulu, afuma aya avwanga nu mukazyana uwali a kalinda wa pa mpongolo, nga aingizya Petulo.

¹⁷ Alino mukazyana uwali pa mpongolo auzya Petulo ati, “Uzye nawe kwene usi wenga uwamu alondezi a muntu wii?” Petulo aasuka ati, “Asi nene.”

¹⁸ Kwali ni mpepo. Caleka aomvi na yakalinda yapemba moto wa malasya, nga iimilila, yaulizizya yala yakoota. Alino Petulo aya aimililapo, aota pamwi nao.

Yesu mwi Tengo lyakwe Simapepo Mukulu

¹⁹ Simapepo Mukulu auzya Yesu pamulandu wa alondezi yakwe, nga na pamulandu wa usambilizyo wakwe.

²⁰ Yesu amunena ati, “Nsita zyonsi navwanganga paswe kuli cila muntu. Kusambilizya kwane konsi kwacitwanga mu mang'anda yamapepo, nga nu mu Ng'anda ikulu yakwe Leza, muno Ayuda yonsi yakongananga. Ntatala navwanga cimwi mu nkama.

²¹ Uzye lyene, pacani ukunguzya? Uzya antu yao anguvwile. Uyuzye pali vino nayanenyile. Yene yamanyile vintu vino navwanzile.”

²² Lino Yesu wavwanga cii, musilika umwi uwaimi pipi amuma ulupi ati, “Uzye avino ungavwanga kuli Simapepo Mukulu?”

²³ Yesu amwaasuka ati, “Ndi nati mvwanga cimwi ciipe, unsinile pa manso yakwe yano onsi ali pano. Lelo ndi ntaluvinye muli vino nati mvwanga, uzye pacani wanguma?”

²⁴ Caleka Anasi amutuma kuli Kayafa, Simapepo Mukulu, ala acinyefilwe.

Nupya Petulo wakana Yesu

²⁵ Petulo waimi ala akoota. Alino yao ali penepo yamuzya yati, “Uzye nawe kwene usi wenga uwamu alondezi yakwe?” Lelo Petulo akana ati, “Asi nene.”

²⁶ Lyene wenga uwamu yaomvi yakwe Simapepo Mukulu, uwali uwa kazi ka muntu wino Petulo waputwile ikutwi, avwanga ati, “Uzye ntakuweni mu calo pali pamwi na Yesu?”

²⁷ Nupya Petulo akana. Lyene lilyo kwene mukolwe alamula.

Yaleta Yesu kwi Tengo lyakwe Pilato

²⁸ Lyene katondo tondo yafumya Yesu kwakwe Kayafa, yamutwala kwi sano lya mulasi. Ntunguluzi zya Ciyuda zyene zitingile mwi sano, zyoopa kukoweziwa, kuti zingalyako Cimulo ca Ucilo.

²⁹ Caleka Pilato afuma aya kuno zili azyuzya ati, “Uzye mulandu cii uno mukupeela umuntu wii?”

³⁰ Nazyo zyasuka ziti, “Ndu muntu wii asi kacita wa viipe, nga tutamupile kunuli.”

³¹ Pilato avwanga ati, “Musendini mweisikulu mukamupingule kulingana na Masunde inu.” Ayuda nao yamunena yati, “Tutazumiliziwa kukoma umuntu ali wensi.” (

³² Cii, cacitike kufikilizya mazwi yano Yesu wavwanzile pa kulanga musango wa mfwa ino wali nu kufwa.)

³³ Nupya Pilato aingila mwi sano, aama Yesu nga amuuzya ati, “Uzye wewe uli Mwene wa Ayuda?”

³⁴ Yesu nawe ati, “Uzye iuzyo lii lyafuma mwi lango lyako nanti ale yauze yati yakunena pamulandu wane?”

³⁵ Pilato aasuka ati, “Uzye ukwelenganya vino nene Muyuda? Antu amu luko lwako nga na yasimapepo akalamba ali yano yapile wewe kunondi. Uzye icani cino watucita?”

³⁶ Yesu avwanga ati, “Uwene wane usi uwa muno nsi! Ndi uwene wane uya uwa muno nsi, lyene alondezi yane nga yakulwisya kuti ntapelwa ku ntunguluzi zya Ciyuda. Awe, uwene wane usi uwa muno nsi.”

³⁷ Caleka Pilato amuuzya ati, “Uzye lyene wewe Mwene?” Yesu aasuka ati, “Watuvwanga vino nene Mwene. Navilwe nga nu kwiza mu nsi pamulandu onga sile wakuti ndande pamulandu wa cumi. Wino wensi waya uwa cumi wene akauvwa mazwi yane.”

³⁸ Alino Pilato auzya ati, “Uzye cumi icani?” Lyene Pilato afuma, aya nupya ku Ayuda, nga ayanena ati, “Ntamuzanyile nu mulandu wakuti avunukwe.

Yesu wapingwilwa ukufwa

³⁹ Lelo kulingana nu lutambi lwinu, lyonsi pa nsita ya kuzevya Cimulo ca Ucilo nkamusapwila munyepwe wenga. Uzye mukulonda kuti musapwile Mwene wa Ayuda?”

⁴⁰ Nao yasanzika mazwi yao, yaasuka yati, “Awe, wene foo! Tukulonda Balaba!” (Balaba wali cipondo.)