Yelemiya 7 - Amazwi Yakwe Leza 2013

Yelemiya wakosola mu Ng'anda ikulu yakwe Leza

¹ Izwi lya Mwene ilifika kuli Yelemiya liti,

² “Yanga ukimilile pa mpongolo ya Ng'anda ikulu yakwe Leza. Ali pano ume imbila uti, ‘Mwe ina Yuda mwensi mwemuno mukaingilila pa mpongolo zii ku kupepa Yawe, uvwini amazwi ya Mwene.

³ Yawe Wamaka yonsi, Leza wa ina Izlaeli, akuti, “Senulini imiyele inu ya wikazi nga ni vicitwa vinu vino mukucita, nga nani namazumilizya kuti mutwalilile ukwikala mu ncende ii.”

⁴ Tiini ukutaila mu mazwi yalya ausomvi nu kuvwanga muti, “Sweswe yacingililwe! Ii, ili Ng'anda ikulu yakwe Leza, ii ili Ng'anda ikulu yakwe Leza, ii ili Ng'anda ikulu yakwe Leza!”

⁵ “‘Mucumi ndi cakuti mwasenula imiyele inu ya wikazi nga ni vicitwa vinu vino mukucita, nu kusakamala ukukana fyengana,

⁶ ndi cakuti mwata ukuzunya ainamasi, ana asyale nanti yamukamfwilwa nu kuta ukukoma antu akaele mu ncende ii, ndi cakuti mwata ukulondela tuleza tuze,

⁷ lyene ndaleka mwikale mu ncende kwene ii, mu mpanga ino napiile ivikolwe vinu kuti iye caupyanyi amanda pe.

⁸ Lelo si lolini, vino mwemo mukutaila mu mazwi ausomvi nupya asi yampomvu.

⁹ Mwemo mwatemwa ukwiya, ukukoma antu, ukucita uzelele, ukulapa imilapo ya ufi, ukocela Baali ubani, nu kupepa tuleza tuuze tuno mutamanyile mpiti.

¹⁰ Mwemo mukacita ivintu vii vino napata, nga lyene mwiza mwimilila pa manso yane, mu Ng'anda ikulu yakwane kwene, nu kuvwanga muti, “Sweswe yacingililwe!”

¹¹ Uzye mwemo mukalola ukuti Ng'anda ii, ino ikaamilwa kwi zina lyane, ininga ya ivi vwile? Lelo nemo nkalola vyonsi vino mukacita! Ivyalanda ne Yawe.

¹² Pitini muye ku ncende imwi yaku Syilo, umusumba uno pakutandika wamanyikwe pamulandu wi zina lyane. Mumaya mukalole vino nacisile ku antu yane aina Izlaeli apamulandu wa uyi wao.

¹³ Lino mwemo mwacitanga ivintu vii vyonsi, nemo namuvwanzizye lili lili, lelo mutatezizye awe. Namwamile, lelo imukana ukuvwa ulwamo lwane.

¹⁴ Acino, ivintu vino nacitile Syilo avino ndacitila Ng'anda ikulu ii iyakwane, ino mwemo mwataila mwenemo, incende ino napiile ku vikolwe vinu.

¹⁵ Ndamuvwintila ukutali nani, ndi vino nacisile ku ina inu, antu amu mutundu wakwe Efulemu.’”

Antu yakana ukuyela

¹⁶ Yawe avwanga kunondi ati, “We Yelemiya utezya ukupepela antu yaa nanti ukwezya ukuyalengela cimwi. Utezya kuyapapatila, pano ntaluvwa kunuli.

¹⁷ Uzye utakulola ivintu vino yakucita mu misumba yaku Yuda nga nu mu misolo yamu Yelusalemu?

¹⁸ Ana yakasweya inkwi, yaisi nayo yapemba umoto, anaci nayo yakandila umunya wakupangila namwene wa kwiyulu yakeke. Nupya yene yakapongolwela uwila wakwe waini kuli tuleza tuze apakuti yansosye.

¹⁹ Uzye kwene umucumi anene yasosyanga umwenzo? Uzye yasiisosya imyenzo nu kuizewanya sile aisikulu?”

²⁰ Ali cino Yawe Simwandalali akuti, “Ukali wane ni cipyu cane vilaponela apa ncende ii. Vilaponela umuntu ni nyama kwene, imiti ya mpanga ni viseekwa kwene. Ukali wane ulaya wa moto uno kusi nanti wenga angauzimya.”

²¹ Yawe Wamaka yonsi, Leza wa ina Izlaeli wavwanga wati, “Lundini impolelwa zinu zyakoca apa mpolelwa na zyuze, mulye inyama.

²² Pano lino nafumizye ivikolwe vinu mu Eguputo, ntayanenyile nanti cimwi nupya ntayapiile ni sunde apa mpolelwa zyakoca na pa mpolelwa zyuze zyasyala.

²³ Lelo nayapile ilamulo lii lyakuti, mwayela amazwi yane, pakuti nje Leza winu nga namwe mulaya antu yane. Nupya mwapita umu nzila zyonsi zino nkumulanga, alino mulaya nu longo.

²⁴ Lelo yakanyile ukunguvwa nanti ukuteya amatwi. Yalondelelanga ulunkumbwa lwamu myenzo yao iipe. Yene yamfutatile yakana nu kumfutatukila.

²⁵ Ukutandikila sile pa wanda uno ivikolwe vinu vyafumile umu Eguputo ukufika ni lelo kwene, nemo natwalilile ukumutumila aomvi yane, yakasema.

²⁶ Lelo yene yakanyile uku nguvwa nanti ukusakamala. Mu cifulo cakwe cico, yene yatonkomalike sile insingo zyao, nu kwifya ukuluta na pa vikolwe vyao.

²⁷ Acino wemo nanti umayanena amazwi yaa yonsi, yatalakuuvwa awe. Ulayaama, lelo yatalazumila awe.

²⁸ Caleka kayanene uti, ‘Luu luli luko luno lutayela Yawe Leza wao, luno lutazumile ukusundwa pa kuvunukwa kwakwelo. Cumi calowa, cisilandwa nanti ukulandwa.’”

Ivicitwa viipe mu Cifoloma ca Hinomu.

²⁹ Losyini, mwe ina Yelusalemu. Pelini inyele zinu muzisumbe. Saulini ulwimbo lwa malanda pa tumpuke, apamulandu wakuti ne Yawe nene musoke, nupya natinkana antu yane.

³⁰ “Antu yakwe Yuda yatiyacita iviipe pa manso yane. Ivyalanda ne Yawe. Yene yatiyika ivyauwelewele vyao, ivya muselu mu Ng'anda yane ikulu nu kuikowezya.

³¹ Nupya yatiyakuula incende umwa kumpepela mwenemo mu Cifoloma ca Beni Hinomu, umwakuti yaocelamo ana yao aonsi na anaci. Icintu cino ntatazile njanena, cino citatazile ciza nu mu mano yane.

³² Acino amanda yaliza lino yatalaama izina lyakuti Tofeti nanti Cifoloma ca Beni Hinomu. Lelo yalaama yati Cifoloma ca Kufyulilamo, pamulandu wakuti yalaziikamo afwe mu Tofeti mpaka ni ncende iluulila.

³³ Ni vyala vya antu yayo vilaliwa uku vyunyi vyamu lwelele ni nyama zya mpanga, nga kutalaya uwakuvizinga.

³⁴ Ndamyalalika amu misumba yakwe Yuda nu mu miseo yamu Yelusalemu, impooma zya luzango ni nsansa alino ni zwi lyakwe siwinga na nawinga pano impanga ilasansamuka.”