Yelemiya 6 - Amazwi Yakwe Leza 2013

Anisi yalizizya Yelusalemu

¹ Mwe antu yakwe Benjamini, utukini! Mupuuke mu Yelusalemu! Lizini intandala mu Tekoa. Imikini imendela yakusonta ku Beti Hakelemu. Uzanzo nu uononesi vyasya vize ukufuma ku katutu.

² Umusumba wa Zioni uyembe wakwe cimwi, lelo nemo ndaonona.

³ Yamwene yalacita inkambi kuku pamwi ni vita vyao. Yene yalasimpa amataalu yao ukuzinguluka umusumba, na cila wenga alacita inkambi apali ponsi pano akasi.

⁴ Yene yalati, “Aleni muiteyanye ku kumulwisya! Katukini tumulwisye lino ilanzi lili umutwe papela.” Lelo lyene yalavwanga yati, “Iye mwe, caipa pano ilanzi lyatemba ni vinzingwa vya manguzi navyo vyatalimpisya.

⁵ Katukini tuye tukamulwisye usiku, tonone na malinga ya musumba.”

⁶ Vii ivyalanda Yawe Wamaka yonsi ati, “Temini imiti yakwe, mutuntumalike nu musili uku malinga yakwe Yelusalemu. Umusumba uu ulinzile kuvunukwa, pano mwazulamo sile ufi na kanyati katuputupu.

⁷ Vino icifula cikafukoka amanzi, avino nu musumba uu ukafukoka uyi. Ukakasi nu ononyi ivikauvwika sile mwenemo. Indwala ni vilonda vikaloleka pee ku manso yane.

⁸ We Yelusalemu, cenjela pano limwi ningakufutatila nu kukusangula ulwanga, incende muno musiikala umuntu nanti wenga.”

Izlaeli a cisanguka

⁹ Yawe Wamaka yonsi walanda wati, “Kungululini antu yonsi pyu yano yasile penepo mu Izlaeli. Muyakungulule vino mukakungulula amatingi. Acino mulinzile ukupususya wiyo wensi wino mungapususya lino kucili insita.”

¹⁰ Nga nani naasuka inti, “Uzye aweni wino ninganena nawe auvwe? Cumi kwene amatwi yao yapulama, yatange yakutike foo. Amazwi yakwe Yawe yasulwa kunoyali. Yene yasiyazengela, awe.

¹¹ Lelo nemo ninkwata icipyu cakwe Yawe. Natonta muno nkalu kuzizimizya.” Lyene Yawe avwanga kunondi ati, Pongolwela ukali wane apa ana yano yali mu misolo napa maumba ya alumendo. Yaiya na aci yalasendwa, nga na akoloci kwene yatalayasya.

¹² “Amang'anda yao yalapokwa ku antu yauze, kumwi ni vyalo vyao na aci yao. Pano ndazunzula ikasa lyane pa kuvunuka aikazi ya mpanga iyo.

¹³ Cila muntu, ukutandikila sile pa munono ukufika napa mukalamba, yonsi kwene yapunuka ku kulondelela ulonsi. Yonsi pyu, ukutandikila kuli kasema mpaka na kuli simapepo, yakacita usomvi umwi uipisye ku antu.

¹⁴ Yene yakanyepela icilonda ca antu yane mu kusakaizya ala yakuti, ‘Ulongo, ulongo,’ nalino kusi ulongo.

¹⁵ Uzye yene yatange yuvwe insonyi pa vicitwa vyao vyawinyi? Awe, yene yatuvwile insonyi nanti panono. Nupya yatamanyile ni vyakuloleka nsonyi nsonyi. Acino yalapona pamwi na aali nu kupona. Lino ndiza ku kuyavunuka, ilaya ili mpela yao. Ivyalanda ne Yawe.”

Aina Izlaeli yakana inzila zyakwe Leza

¹⁶ Yawe wavwanga ku antu yakwe ati, “Imililini pa masansa ya museo, mucelecensye! Muzye inzila zyampiti nupya muzye ukuli inzila zisuma alino lyene mupite mwenemo. Lyene mulikala mu mutende.” Lelo mwemo mwakanyile imuti nu kuti, “Tutange tupite mwenemo, awe!”

¹⁷ Namusontelile na yakalinda ukuti yangakutika ku kulila kwa ntandala. Lelo mwemo mwakanyile muti, “Tutakutala tukutike.”

¹⁸ Si uvwini kuno mwe nko, mwe yakambone mumanye ivilacitikila antu yane.

¹⁹ Uvwini kuno mwe ikazi ya panonsi! Lola, nkuletela antu yaa uononesi, pamulandu wakuti yene yakana usambilizyo wane nupya yakana ukuyela isunde lyane.

²⁰ Uzye mwati nemo nkasakamala kweneko ubani ukufuma ku Syeba nanti ivisali ukufuma ku mpanga zya kutali? Ala nemo ntange mpokelele impolelwa inu yakoca nanti ivya mawila inu ali yonsi a viteekwa ntayakasi, foo.

²¹ Caleka Yawe wavwanga wati, “Indika inkolelo ya antu yaa icakuipuma kweneko. Nayo yalaipuma kweneko suka yace yalowelele pyu. Yaisi alino na ana yao aonsi, nga na inipamba kumwi na yacuza yao kwene.”

Ukuzanzwa ukufuma ku katutu

²² Yawe wavwanga wati, “Lolini, impuka ya vita ilafuma ku katutu. Uluko lwamaka ukufuma ukutali lukuiteyanya ku kulwa inkondo.

²³ Yene yalasenda amalapwa na masumo mu minwe. Yene akalale nupya yasi nu luse. Yalaangula icongo kwati ukulunkuma kwakwe yemba mukalamba, lino yakupita pa mfwalasi. Yene yatiyaiteyanya ukukulwisya Yelusalemu.”

²⁴ Antu amu Yelusalemu yakuti, “Twatituvwa ilandwe lyapali alio, nga na makasa itu yatovoka. Intete nazyo zyatizitulema. Cikutunyongoloka kwati umwanaci wino ali pipi nu kulela.

²⁵ Cisi cakwezya umwi kufumila mu vyalo nanti umu nzila. Pasi pano mwene muli ulupanga lwa mwanisi. Uzanzo watiutulizizya konsi konsi.”

²⁶ Yawe wavwanga ku antu yakwe ati, “Mwe antu yane zwalini vizwalo vya ndosya munyepe ni mipango mu mitwe. Losyini, pomolini impooma wakwe vino yakaloosya umwana umonsi uwavyalwa sile wenga mpo. Pano umononyi amaiza amwiukizye.

²⁷ We Yelemiya nemo ninkucita wakwe simalungu, nga antu yane nayo wa cela, apakuti uyezye nga umanye imiyele yao.

²⁸ Yonsi pyu acisanguka atalame wakwe cimwi, nupya yakapitana sile nu kukwakwanya. Yakoma imyenzo wa mukuwa ni cela. Yonsi pyu yakacita iviipe.

²⁹ Ilungu likalunkuma wakwe cimwi, apakwengulula umutovwe apa moto. Lelo ivikwi ivyaya mwenemo vikakana ukufuma. Ala uwalanganyi sile ukwezya kutwalilila ukuswefya antu yane, pamulandu wakuti yayo aipe yasiswefiwa.

³⁰ Yene yakaamwa ukuti a siluva umusuulwe, pamulandu wakuti Yawe wayasuula.”