Yelemiya 4 - Amazwi Yakwe Leza 2013

Ulwamo lwa kuzenzuka

¹ Yawe wavwanga wati, “Mwe antu amu Izlaeli, ndi mukasi ukwaluluka, lyene mwalukile sile kunondi. Sumbini utuluwi twinu utwa winyi tuno napata wakwe cimwi, nupya mutapumboka umu nzila.

² Ndi cakuti mwalapa umu cumi, mu ufumaluke nu mu ulungami umwi zina lyane ne Leza waumi, ale lyene antu amu mitundu yonsi yasyala yalapolelelwa ukufuma kunondi. Nupya ukupitila munondi ali muno yalalumbanya izina lyane.”

³ Alino lyene Yawe anena antu amu Yuda na amu Yelusalemu ati, “Limini ivyalo vinu vino vitacili vilimwe. Mutezya ukukomela imbezu zinu mu myunga.

⁴ Sungini upangano uno ne Yawe napangine namwe. Mutuule imyenzo inu kunondi mwe antu amu Yuda na amu Yelusalemu. Ndi cakuti mwakana ukucita cico, ale lyene ukali wane ulalunkuma wa moto pamulandu wa vintu viipe vino mwacita. Wene ulalunkuma wa moto, nupya kusi nanti umwi alauzimya.”

Uzanzo ukufuma ku kayeya.

⁵ “Laizini umu mpanga yakwe Yuda nu kuuma imbila mu Yelusalemu muti, ‘Lizini intandala mu mpanga yonsi ya Yuda nu mu Yelusalemu!’ Pundini na maka muti, ‘Konganikini antu pamwi! Lekini tutukile ku misumba ya malinga!’

⁶ Tumpulini cimanyililo cakulanga ukuya ku Zioni. Simulini muipususye, ukwaula kuzingota! Pano nasya ndete uzanzo ukufuma ku kayeya, nu uononyi uwipe wakwe cimwi.

⁷ “Wakwe cisama uwatakatuka ukufuma mwi tesi muno afisime, avili vino umononyi wa mitundu watakatuka ukufuma ku cifulo cakwe. Wene akwiza ku konona Yuda. Imisumba yaku Yuda ilononwa isyale wa vitumba. Kusi umwi wino alikala mwenemo.

⁸ Acino zwalini ivyakuzwala vya ndosya, mulile nu kupomola impooma, pano ukali wakwe Yawe pali sweswe utalatala usile.”

⁹ Yawe wavwanga wati, “Mu wanda ulya yamwene ni ntunguluzi yonsi kwene yalaputuka imisana. Yasimapepo cilayapezya amano, na yakasema yalazunguka.”

¹⁰ Lyene nani imvwanga inti, “Yawe Simwandalali, silola vino cili kwati watusomba antu amu Yelusalemu! Wemo walanda ukuti kutalaya umutende, lelo ulupanga lwatilwekamila apa nsingo zitu.

¹¹ “Umu nsita ilya yalumila umutundu kwene uu na antu amu Yelusalemu imbila yati, Umuza ukaye auwa ukufuma mu lwanga, ukwizila mwe antu yane. Wene usikwiza mu kumwelulula ndi vino ukaelulula ingano, awe.

¹² Umuza uo uno ukwiza api lamulo lyakwe Yawe, wene ulaya ukome ukuluta. Yawe umwisikulu aliwe akuma imbila ya uputuzi pa antu yakwe.

Anisi yazinguluka Yuda

¹³ Lolini! Umwanisi akwiza wa makumbi. Amaceleta yakwe ankondo yakwiza wakwe nkungulupya. Imfwalasi zyakwe zilusile yacipungu uku lwilo. Kalanda kunotuli! Twatitononwa!

¹⁴ “We Yelusalemu, si wange ufulale uyi wa mwenzo wako pakuti lyene upusuke. Uzye umatwalilila ukwelenganya iviipe ukufika lilaci?

¹⁵ Pano izwi likulaizya ukufuma kuli Dani, likuvwika lya ulanda. Lyene likufuma ku myamba yakwe Efulemu nga likusowela ukononwa.

¹⁶ Izwi likuti muceule nu kunena aina Yuda, mulaizye nu mu Yelusalemu ukuti anisi yatiyiza ukufuma ku mpanga ya kutali. Yakutezela imisumba yakwe Yuda apa nkondo iyasya iize.

¹⁷ Yene yatiyazinguluka Yelusalemu, kwati a yakalinda ya calo, apa mulundu wakuti wene watalamila ne Yawe. Ivyalanda ne Yawe.

¹⁸ “Endi, mwe ina Yuda amwemwe mwailetelela sile mwenga uku mikalile inu. Uyi winu auno wamuletelela uku macuzi yaa. Lyene mwatimucekama sile pamulandu nu kucula, ni myenzo inu nayo pasi paukali.

Yelemiya uvwila antu yakwe ulanda

¹⁹ Owe nafwa mwe! Nemo nkunyunguluka sile pamulandu nu ukali! Umwenzo wane umalepuka! Umwenzo wane uku kulukunta uyi uyi. Naposiwa kumyalala. Pano natinuvwa ukulila kwa ntandala nga nu kupunda kwamu nkondo.

²⁰ Uzanzo walondela apa uzanzo uze. Ni mpanga yonsi yatiyononeka umu kasita sile akanono. Amataalu yane yatiyononeka umu kupumikizya, icifulo cane naco umu kasita kanono.

²¹ Uzye ukufika lilaci lino ndalola imendela ya nkondo, nu kuvwa ukulila kwa ntandala?

²² Pano kwene antu yane yatumpa, nupya yatamanya, awe. Yene yakolana na ana aula amano. Yene yatamanyile nanti cimwi. Yacenjela sile umu kucita iviipe. Yakaposiwa ukucita ivisuma.”

Cilolwa cakwe Yelemiya ca ononyi uno ukwiza

²³ Lino nalolekesya insi, indola ukuti itakweti umwata nupya iyaulwamo akantu. Nga ndolekesya umwiyulu, namo musi uluswepo.

²⁴ Lino nalolekesya imyamba, indola ukuti ikusunkana. Ni milundu yonsi nayo ikutelengana.

²⁵ Nalolekesya, awe cumi kusi umuntu nanti wenga. Ivyunyi vya mpanga vyonsi vyativyutukila kumwi.

²⁶ Nalolekesya, indola impanga ivunde yatisanguka ulwanga. Imisumba iyali mwenemo yatisyala ivitotela, apamulandu wa ukali wakwe Yawe.

²⁷ Pano avino Yawe watavwanga ati, “Impanga yonsi ilononwa, lelo ntalayonona pyu.

²⁸ Calenga ukuti impanga ilalila iyoyomba, nu kwiyulu kulafita fititi, pamulandu wakuti ne Yawe natimvwanga, nupya natimpanga ukucita cico kwaula kufutuka.”

²⁹ Apa kuvwa icongo ca mfwalasi ni ca asilika ya nceto, cila muntu alapuuka Yamwi yalapuukila ku mitengo. Yauze yalakwela apapela mu vimawe. Cila musumba mutalasyala nanti akantu, nga kusi umwi alikala mwenemo nupya.

³⁰ Alino nawe we Yelusalemu, ulazanzwa! Uzye pacani cino ukazwala insalu ziyenzulukile? Uzye pacani cino ukazwala iviyembelo vyakwe zaabu, nu kuipentola apa vipa vyako? Ala ukuicuzya sile apakuiyemvya! Yayo akutemilwe mpiti yatiyakusuula, yene yakulonda kukukoma.

³¹ Nuvwile inkuuta kwati izya mwanaci wino ali pipi nu kulela ukuilizyanya kwati a wiyo akwelepa umwana wiyeli. Kwali kuli kulila kwakwe Yelusalemu, wino akwasela sile wataanza na makasa ala akuti, Owe mwe! Nazanzwa! Yene yakwiza ku kunkoma!