Yelemiya 1 - Amazwi Yakwe Leza 2013

¹ Yaa ali mazwi yakwe Yelemiya, umwana umonsi wakwe Hilikiya, wenga wamuli yasimapepo aku Anatoti, mu mpanga yakwe Benjamini.

² Yawe avwanga kunoli mu mwaka walenga ikumi na itatu, wakuteeka kwakwe Yosiya, umwana umonsi wakwe Amoni umwene waku Yuda.

³ Yawe wavwanzile nawe nu mu manda kwene akuteeka kwakwe Yeoyakimu umwana umonsi wakwe Yosiya, umwene waku Yuda, mpaka nu mu mwezi wakwe cisano wa mwaka walenga ikumi na onga, wakuteeka kwakwe Zedekiya umwana umonsi wakwe Yosiya umwene waku Yuda. Cali apa nsita ino antu amu Yelusalemu yasenzilwe ku uzya.

Ulwamo lwakwe Yelemiya

⁴ Yawe avwanga kunondi ati,

⁵ “Nakusolwile lino ntacili nkuumbe mu ndilwa yakwe mayo wako, Lino utali uvyalwe ala nakusonta mpiti, kuti uce uye kasema wa mitundu yonsi.”

⁶ Nani ali pakwasuka inti, “Iye, we Yawe Simwandalali! Lola nemo nene mwance, nupya ntamanya ivyakuvwanga.”

⁷ Lelo Yawe anena ati, “Utalanda ukuti wewe mwance. Ulinzile ukuya ku muntu ali wensi wino nakutuma kweneko, nu kuyamunena ilamulo lyane.

⁸ Utayoopa foo, pano namayanga nawe nu kukupususya. Ivyalanda ne Yawe.”

⁹ Lyene Yawe atambika ikasa lyakwe, nga ankumya na pa milomo avwanga ati, “Lola, namaika amazwi yane mu kanwa kako.

¹⁰ Ilelo nakupeela amaka pa mitundu na pali yamwene yayo, amaka ya kutukulula nu kuongolola, amaka akonona nu kulovya, akukuula nu kulema.”

Ivilolwa viili

¹¹ Alino Yawe avwanga kunondi ati, “We Yelemiya, uzye icani cino walola?” Nani naasuka inti, “Nalola ulusaala lwa muti uno yakati mualimondi.”

¹² Yawe nawe avwanga kunondi ati, “Icacumi walungika, pano nemo nkawaka izwi lyane nu kulifikilizya.”

¹³ Nupya kwene Yawe avwanga kunondi ati, “Walola cani nupya?” Nani imwasuka inti, “Nalola intendo ikutopota, navino vili mwenemo viyendekile lwaku kayeya.”

¹⁴ Lyene avwanga kunondi ati, “Umupamba wafuma ku kayeya nu kwiza ponela aikazi yonsi muno nsi.

¹⁵ Pano nasya mpunde imitundu yonsi ino ikateekwa kuli yamwene aku kayeya. Yaliza yonsi pyu. Nacila wenga aliza aike icilimba cakwe ca wene apa mpongolo zyakwe Yelusalemu, na pa malinga yonsi yano yauzinguluka. Alino nu kunzi ya misumba yonsi yakwe Yuda.

¹⁶ Ndakalipila antu yane nu kuyapingwila uyi uyi apa kwifya kwao. Yene yatiyansangukila, yakocela tuleza tuze ubani nu kupepa ivicitwa vya minwe yao.

¹⁷ Ali cino fwandi wemo Yelemiya posya sile, nyepa nu musipi mu musana. Katuka uye ukayanene vyonsi vino namakunena. Utayoopa foo, pano limwi ningiza nkoofye apa manso yao.

¹⁸ Namakusangula umusumba wi linga, ulucesi lwa cela, ilinga lya mukuwa lya kulwisyanya ni nsi yonsi. Yamwene aku Yuda, ivilolo vyao, yasimapepo yao kumwi na ikala nsi yonsi.

¹⁹ Yene yalakulwisya, lelo yalaposiwa ku kucimvya, pano nemo namayanga nawe apa kukupususya.” Ivyalanda ne Yawe.