Yakobo 4 - Amazwi Yakwe Leza 2013

¹ Uzye pacani mukalwisyanya nu kupazyanya? Uzye asi pamulandu wakuti mukweti vilondwa vyakuitemwa vino vikalwisya kutungulula mili inu?

² Mukalonda kukwata vintu vino mutakweti. Acino mukacita cili consi, nanti kukoma kwene, pakuti mukwate. Mukalondesya kukwata vintu, lelo mukaposiwa kuvikwata. Caleka mukalemanila nu kulwa. Musyakwata vino mukalonda pamulandu wakuti musyalenga Leza.

³ Nupya lino mukamulenga musyapeelwa, pano mapange inu aipe. Mwemo mukalenga vintu vya kuizanzya mweisikulu.

⁴ Mwe antu mwe muno musi akutailwa kuli Leza! Uzye mutamanyile ukuti ndi mwaya ucuza ni nsi ala mwapatana na Leza? Wino wensi akalonda kuya cuza wa nsi ala wene waicita mwanisi wakwe Leza.

⁵ Mutatwisika cumi icaya mu malembelo yano yakati, “Leza akasakamala pamulandu wa mupasi uno wika munotuli.”

⁶ Lelo cikuku cino Leza akatukwatila cene ica maka kuluta. Cili ndi vino malembelo yakati, “Leza akakanya umuntu wensi uwa cilumba, lelo akaya ni cikuku ku muntu uwaicefya.”

⁷ Caleka, mwayela Leza. Mwakanya Ciwa, nawe aluutuka kufuma kunomuli.

⁸ Mupalame kuli Leza, nga nawe amapalama kunomuli. Mwe yakaifya, namwe fulalini minwe inu! Mwe asomvi, namwe swefini myenzo inu!

⁹ Muye nu ulanda, mwalosya nu kulila minsozi. Tini kuseka, tandikini kulosya. Tini kuzanga, tandikini kukungumala!

¹⁰ Muicefye mweisikulu pa manso ya Mwene, nga nawe alamutumpula.

Kusokwa pamulandu wa kupingula munyonko Mwina Klistu

¹¹ Mutapelana milandu, inane. Wino wensi akapeela mwina Klistu muze mulandu nanti kumupingula, ala wene akusula masunde nu kwezya kuyapingula.

¹² Leza aliwe wenga sile ali kapela wa Masunde nupya kapingula. Aliwe wenga sile angatutuula nanti kutonona. Uzye nsambu cii ino mukweti iyakupingula umuntu muzo?

Kusokwa pamulandu wa kuitumika

¹³ Lyene nguvwini mwe muno mukati, “Ilelo nanti mutondo tulaya pa lwendo kuya ku musumba ukulu umwi. Kuku akuno tulikala kulingana mwaka, ale tukuculuzya nu kulonka impiya zingi.”

¹⁴ Mutamanya nanti vino umi winu ulaya pa mutondo! Mwemo mukoline wa cunsi, cino cikaloleka pa kasita kanono nupya icita kuloleka.

¹⁵ Mulinzile kulanda muti, “Ndi cakuti Mwene akasi, swemo tulaya nu umi nu kucita cii nanti cica.”

¹⁶ Lelo ndakai muli ni cilumba nupya mukuitumika. Kuitumika kwa musango uu konsi ukuluvyanya.

¹⁷ Caleka, umuntu wino asyacita cisuma cino amanyile ukuti alinzile kucita ala ali nu mulandu uwa kwifya.