Yakobo 3 - Amazwi Yakwe Leza 2013

Pamulandu wa lulimi

¹ Inane, aingi munomuli yatalinzile kuya yakasambilizya. Mwamanya ukuti swe yakasambilizya tulapingulwa nu kucecetwa cuze kuluta yauze.

² Lili lingi swensi kwene tukaluvyanya. Lelo ndi cakuti muntu umwi asyaluvyanya mu mazwi yano akalanda, ala umuntu wiyo umufumaluke nupya wene ali na maka akukanya mwili wakwe onsi.

³ Tukaika vyela mu milomo ya mfwalasi kuti zitutontele, nga alino tukaleka ziya kuno tukasi.

⁴ Nanti manye elenganyini ciwato cikulu. Nanti angala caya cikulu, cene cikasendwa ni miza ikome, nupya cingapindululwa ku kapindulwilo kanono sile. Alino lyene ciya konsi kuno kapisya akulonda kuti ciye.

⁵ Vivyo kwene avino cili nu ku lulimi kwene. Nanti angala ulunono, lwene lungaitumika pa vicitwa vikulu. Tala elenganyini vino mutengo ukulu ukapya nu moto lino wasontekwa na kambilimbili kanono.

⁶ Acino lulimi lukoline wa moto. Lwene amaka yaipe yano yakakowezya mwili nga nu koca umi onsi uwa muntu ku vimbilimbili vino vikafuma kuzimo.

⁷ Umuntu angateeka nupya wateekapo viumbwa vyonsi, inyama nga ni vyunyi vya mpanga, ivisela nga ni nswi.

⁸ Lelo kusi umwi uwatala wateeka lulimi. Lwene ulwipe nupya lutangapindululwa. Lwene lukasalanganya mazwi akoline wa ulembe.

⁹ Swemo tukaomvya lulimi pa kutaizya Mwene witu nupya Tata, nga nu kutipilako antu yanji, yano aumbwa mu unkolanya wakwe Leza.

¹⁰ Ntaizyo nga ni ntipu zikafuma mu mulomo uli umwi kwene. Inane cii citalinzile kucitika!

¹¹ Kutaya kafukoka ka manzi kano kakafumya manzi asangalale na asampe kwene.

¹² Inane, uzye musamvu ungaseeka maolivi? Uzye mutingi ungaseeka masamvu? Nanti uzye manzi asangalale yangafuma mu kafukoka ka manzi ali nu musilya?

Mano kufuma kwiyulu

¹³ Uzye munomuli mungaya umwi akweti mano nu kumanyikisya? Ndi amunoli lekini aisininkizye kupitila mu kwikala umi wakucita visuma mukufuka na mano.

¹⁴ Lelo ndi cakuti mu mwenzo muli uzuwa, muvimbila, kuitemwa, lyene mutaitumika pa mano inu nanti kufisa cumi mu kutumpoka kwinu.

¹⁵ Mano amusango uu yasyafuma kuli Leza. Yene amano yamu nsi auntunze nupya yakwe Ciwa umwisikulu.

¹⁶ Konsi kuno antu yakazuwilana nu kuitemwa, kwene kwaya cimvulunganya ni misango yonsi iipe.

¹⁷ Lelo mano yano yakafuma kwiyulu nkolelo yakatwazwa kuya asanguluke, acuvwano, mutembo nu kuyelezyanya. Yene yakatulenga kukwatisya mizu nga nu kucita vicitwa visuma. Yene yakatulenga kuntakwata vikanza nanti usomvi.

¹⁸ Lyene usuma uli uzombozi uno ukafuma ku mbezu zino yakacita ya mutende yakakomela.