Yakobo 1 - Amazwi Yakwe Leza 2013

¹ Kalata kufuma kuli ne Yakobo, muomvi wakwe Leza nu wa Mwene Yesu Klistu. Nkulamuka antu yakwe Leza yonsi mitundu ikumi na ili asalangana konsi mu nsi.

Utailo na Mano

² Inane, mwelenganye ukuti mwemwe yasyuke lino kweziwa kwa misango yonsi kwiza pakasi kinu.

³ Pano mwamanya ukuti ndu utailo winu wacimvya kweziwa konsi kwa musango uu, lyene mulakwata maka akuposya.

⁴ Musininkizye ukuti utailo winu watwalilila kwaula kutonta, pakuti mukule, muye afumaluke, antu atulilwa cimwi.

⁵ Lelo ndi umwi uwa munomuli ulilwa mano, wene alinzile kulenga Leza, nga nawe alamupeela, pano Leza akapeela kuli yonsi kwaula kasoozi.

⁶ Lelo lino mukulenga cimwi mwataila kwaula kutwisika. Muntu ali wensi wino akatwisika wene wakolana wi imbi lya pali yemba lino likusunkwa ni cipupu.

^7-8 Muntu uwa musango ndi uu, wino atakweti kusolola nupya asyaipingula muli vyonsi vino akacita, wene atalinzile kwelenganya ukuti alapokelela cintu cili consi kufuma ku Mwene.

Upina nu ukama

⁹ Mwina Klistu mupina alinzile kusansamuka lino Leza walenga kuti acindame.

¹⁰ Mwina Klistu mukama nawe alinzile kusansamuka lino Leza wamupoka ucindami. Pano akama yalafwa wa maluwa amu mpanga.

¹¹ Ilanzi likatunka nga cikaililwa caliko cikaoca cimelwa, maluwa yaciko nayo yalukuta, nga nu kuyemba kwayako kononwa. Mu musango uli onga kwene mukama lino akuomba milimo yakwe ya ulonsi, afwa.

Kweziwa nu kutunkwa

¹² Walongo umuntu wino akatwalilila kuya mutailwe lino akweziwa, pano lino wacimvya kweziwa, wene alapeelwa umi wa pe, wila uno Leza walaya yao amutemwa.

¹³ Ndu muntu watunkwa na mezyo amusango uu, wene atalinzile kulanda ati, “Leza akuntunka.” Pano Leza atangatunkwa ni nkota, nupya Leza asyatunka muntu nanti wenga.

¹⁴ Lelo umuntu akatunkwa lino umwisikulu wongolwa nu kulemya mu citeyo ca kulonda kwakwe kwa nkota.

¹⁵ Lyene kulonda kwakwe kwa nkota kulamulenga kwifya. Kwifya nako ndi kwakoma kulaleta imfwa.

¹⁶ Inane mutasombwa!

¹⁷ Wila usuma onsi ni cakupeelwa cifumaluke consi cikafuma kwiyulu, kuli Tata, kaumba wino uwaumvile ivya mwiyulu vyonsi vino vikapeela luswepo. Wene ali umwi lyonsi, nupya luswepo lwakwe lusyazima nanti panono.

¹⁸ Ku kulonda kwakwe umwisikulu wene watupeela umi kupitila mwi Landwe lya cumi, kuti tuye wa vizao vyankolelo pa viumbwa vyonsi.

Kuvwa nu kuyela mazwi yakwe Leza

¹⁹ Mwe inane yakundwe, iusyini cii! Muntu wensi alinzile kuuvwa zuwa, lelo atekele kulanda nu kusoka.

²⁰ Pano kusoka kwa muntu kusyafikilizya kulonda kwakwe Leza.

²¹ Acino lekini kucita vya winyi nu ukakasi onsi. Tontelini Leza nu kuzumila mazwi yano akaika mu myenzo inu, yano angamutuula.

²² Mutaisomba mweisikulu pa kuvwa sile mazwi yakwe Leza. Lelo mulinzile kucita vino mazwi yalanda.

²³ Wino wensi akauvwa mazwi kwaula kucita vino yakulanda, wene akoline wa muntu wino akalola mwi lola nu kuilola umwisikulu vino waya.

²⁴ Wene umwisikulu akaiceceta ningo, apita, nga lilyo kwene ailila vino akaloleka.

²⁵ Lelo wino wensi akaceceta ningo mu masunde afumaluke yano akalenga antu kuya antungwa, ndi watwalilila kusumba mano kunoyali kwaula kuvwa sile nu kwilila, lelo akacita vino yene yakulanda, muntu wiyo Leza alamupolelela muli vino akacita.

²⁶ Uzye muntu umwi akaelenganya vino wene umupefi wakwe Leza? Ndi cakuti wene asyapindulula lulimi lwakwe, ale nu upefi wakwe uwasilesile nupya akaisomba umwisikulu.

²⁷ Upefi uno Leza Tata akalola ukuti uwa mpomvu aewu: ukwazwa ana asyale na yamukamfwilwa mu macuzi yao nga nu kuisunga ku ukakasi uwaya mu nsi.