Yakapingula 6 - Amazwi Yakwe Leza 2013

Ukulanda vyapali Gidyoni

¹ Nupya kwene aina Izlaeli yiifya kuli Yawe. Caleka Yawe aleka aina Midyani iyayateeka pa myaka cinimbali.

² Aina Midyani yali amaka ukuluta aina Izlaeli, nga na ina Izlaeli iyafisama ukufuma ku manso yao mu macele nu mu ncende zyuze mu twamba.

³ Lyonsi lino aina Izlaeli yalima ivilimwa vyao, aina Midyani yiiza pamwi na ina Amaleke nga na amu mitundu yuze yamu lwanga iyayazanza.

⁴ Iyakuula insakwe mu mpanga ilya nu konona ivilimwa ukufika na lwaku kaeya kuzinguluka incende yaku Gaza. Iyapokolola imfwele zyao zyonsi, ing'ombe na yapunda, ukwaula kusiila aina Izlaeli nanti cimwi cino yangaomvya mu umi wao.

⁵ Yene yiiza kumwi ni viteekwa vyao na mataalu yao, kwati amakanta. Yene pamwi ni ngamila zyao yali avule nupya atangapendwa. Yizile yonona impanga ilya.

⁶ Aina Izlaeli yatakweti amaka akulwa nayo.

⁷ Lyene aina Izlaeli pali pakulilila kuli Yawe kuti ayatuule ku ina Midyani.

⁸ Nga Yawe ayatumila kasema uwayanenyile ati, “Yawe, Leza wa ina Izlaeli, watavwanga ati, Nene namufumizye mu Eguputo mu uzya.

⁹ Namukulwile ku uzya wa ina Eguputo nu ku maka yakwe yao yonsi amunyasile mu mpanga kwene ilya.

¹⁰ Namunenyile inti, ‘Nene indi Yawe Leza winu, nu kuti mutalinzile kupepa tuleza twa ina Amoli, yano ndakai mukwikala mu mpanga yao. Lelo mwemo mwakanyile ukuvwa amazwi yane.’ ”

¹¹ Lyene umungeli wakwe Yawe aiza ku muzi wa Ofula nga aikala mwisika lya muoko, umuti wakwe Yoasyi, uwamu luko lwakwe Abiezeli. Gidyoni umwana wakwe ala akupuula ingano mu umfisolo umwakufenela amatingi, pakuti aina Midyani yatamulola.

¹² Alino umungeli wakwe Yawe aloleka kuli Gidyoni nga avwanga ati, “Yawe ali nawe, we cita cikanzane!”

¹³ Gidyoni nawe amuuzya ati, “Uwi! Musambazi! Ndi cakuti Yawe waya naswe, uzye pacani cino imipamba yonsi ii yatuponela? Cili uli fwandi pa vintu vyonsi vino yatata yatunenyile, vino Yawe wacisile pa kuyafumya mu Eguputo? Yawe watatutazyela nu kuleka aina Midyani yatucuzya.”

¹⁴ Lyene Yawe amupeela ilamulo ati, “Katuka, pitanga na maka yako yonsi nga ukakulule aina Izlaeli ku ina Midyani. Nene nakutuma nemwisikulu.”

¹⁵ Gidyoni nawe aasuka ati, “We Yawe, uzye ningakulula uli aina Izlaeli? Uluko lwane ululi lutemboke sana mu mutundu wakwe Manase, nupya nene ndi nkwangu.”

¹⁶ Yawe aasuka ati, “Ungacita cico pamulandu wakuti ndakwazwa. Wemo ulacimvya aina Midyani kwati yali sile umuntu wenga.”

¹⁷ Gidyoni aasuka ati, “Ndi nakuzanzya undange cimwi icakusininkizizya ukuti wewe uli Yawe.

¹⁸ Napapata utatala upite mpaka nize nkupele uwila wa usu.” Nawe amunena ati, “Namalolela ukufika lino umawela.”

¹⁹ Acino Gidyoni aya aingila mu ng'anda yakwe, aeleka akambuzi, alino atoola amakilogalamu ikumi ya usu wa ngano nga apanga umukate usi na citutumusi. Alino aika inyama ilya mu cimponda nu musunyi awika mu mpoto, avileta ku mungeli wakwe Yawe umwisika lya muti uno yakati muoko, nga amupeela.

²⁰ Umungeli apeela ilamulo kunoli ati, “Ika inyama nu mukate apiwe lii, nga upongolwele umusunyi papela yaviko.” Gidyoni pali pakucita vivyo.

²¹ Lyene umungeli wakwe Yawe avungulula ikasa lyakwe nga akatusya insongo ya ntuwa ino walemile, akumya ku nyama nu ku mukate usi na citutumusi. Alino umoto iufuma mwi we nu koca inyama yonsi kumwi nu mukate. Lyene umungeli wilya pali pakongoloka.

²² Gidyoni pali pakwiluka ukuti umungeli wino waweni uwakwe Yawe nga avwanga ati, “Yawe Simwandalali! Natindola umungeli wako na manso ntontonto!”

²³ Lelo Yawe amunena ati, “Umutende uye nawe. Utuvwa intete. Utakufwa, awe.”

²⁴ Acino Gidyoni akuulila Yawe kavuwa kuku nga akatemela izina ati, “Yawe uli mutende kwene.” Na kavuwa kaka apano kacili ku Ofula, umusumba wa luko lwakwe Abiezeli.

²⁵ Usiku ulya Yawe anena Gidyoni ati, “Tola cipambasi wakwe so, nga na cipambasi namuze uwa myaka cinimbali. Utamole kavuwa kakwe so kano wakuulile Baali, nga uputule ulucesi lwa cimanyililo cakwe Asyela, Leza mwanaci wilya, ululi pambali ya kavuwa kako.

²⁶ Alino ukuulile Yawe Leza wako kavuwa pa ntonje ya mutumba uwo wa malivu. Lyene utoole cipambasi wakwe ciili umoce wensi pyu wa wila wakoca, ni nkwi izyakuomvya ivimpilinsya kwene vyakwe Asyela vino watuputola.”

²⁷ Acino Gidyoni atoola aomvi yakwe ikumi nga iyacita vino Yawe wamunenyile. Wene wofile ang'anda yakwe na antu amu musumba ulya, cakuti aposiwa ukucita vivyo umusanya. Caleka acita usiku.

²⁸ Uwanda uwalondelilepo akatondo, lino sile yazyuka iyazana kavuwa kakwe Baali nga ni cimanyililo cakwe Asyela vyativiputolwa, nu kuti cipambasi wakwe iyamocela pa kavuwa kano yakuuzile papa.

²⁹ Alino yuzyanya yati, “Uzye aweni watacita icintu cii?” Iyalondelezya iyasuka yazana ukuti Gidyoni umwana wakwe Yoasyi uwatacita cico.

³⁰ Antu amu musumba ulya pali pakunena Yoasyi yati, “Fumya umwana wako, kuti tumukome! Wene watatamola kavuwa kakwe Baali nu kuputola icimanyililo cakwe Asyela icali pambali yakako.”

³¹ Lelo Yoasyi anena yonsi amukatukile ati, “Uzye mukuvwangila Baali? Uzye mukumucingilila? Ali wensi akumuvwangila alakomwa lino kutali kuce pa mutondo. Baali ndi mucumi a leza, kaicingilile umwisikulu. Kavuwa kakwe akano katikatamolwa.”

³² Ukufuma lili kwene iyatemela Gidyoni izina lyakuti Yelubaali, pamulandu wakuti Yoasyi wavwanzile ati, “Ka Baali aicingilile umwisikulu. Kavuwa kakwe akano katikatamolwa.”

³³ Lyene aina Midyani, na ina Amaleke, nga ni mitundu yamu lwanga iyuminkanya ivita nga iyalamba Luzi lwa Yodani. Alino iyakuula insakwe mu Cifoloma ca Yezileele.

³⁴ Lyene Umupasi wakwe Yawe iwikila pali Gidyoni, nawe alizya intandala kuti aame aonsi amu luko lwakwe Abiezeli yamulondele.

³⁵ Atuma inkombe ku mpanga yonsi yakwe Manase ku kuyama kuti yamulondele. Atuma inkombe ku mutundu wakwe Asyeli, na wakwe Zebuluni, na wakwe Nafutali, nga nayo kwene yiiza iyuminkana na aliwe.

³⁶ Alino Gidyoni anena Leza ati, “Wemo wavwanga wati watuelenganya ukumbomvya kuti ukulule aina Izlaeli.

³⁷ Lyene fwandi namasasanta amavumbu ya mfwele pa lwano lwa kupuulila ingano. Ndi cakuti katondo twaca twazana ulumi ku mavumbu, lelo pa musili pene foo, lyene ndamanya ukuti ulakulula aina Izlaeli umu kuomvya nene.”

³⁸ Nacendi avino cizile ciya. Akatondo lino Gidyoni wazyuka, afena amavumbu yalya, nga ulumi ilufenwa ulwakuzuzya imbakuli.

³⁹ Lyene Gidyoni anena Leza ati, “Utansokela we Yawe, si kandande iila nalyuze lyonga sile. Napapata leka nezye iila lyonga ukuomvya amavumbu. Li lyene leka amavumbu yaye aume, lelo pa musili ponsi paye apatipate.”

⁴⁰ Usiku ulya Leza acita vivi kwene. Amavumbu sile yali aume, nga pa musili ponsi pali apatipate.