Yakapingula 5 - Amazwi Yakwe Leza 2013

Ulwimbo lwakwe Debola na Balaki

¹ Uwanda ulya Debola na Balaki umwana wakwe Abinoamu yimvile ulwimbo luu:

² Lumbanyini Yawe Aina Izlaeli yaifimile ukulwa Antu yaipile ku kuitemelwa kwao sile!

³ Uvwini, mwe ene! Tezini mwe yakateeka! Namaimbilanga Yawe, namalizizyanga Yawe, Leza wa ina Izlaeli, ivinanda.

⁴ We Yawe lino wafumile ku myamba ya Seili, lino wafumile ku mpanga ya Edomu, insi yasunkine nga ni mvula itonya. Endi amanzi yapongolwike ukufuma mu makumbi.

⁵ Imyamba yatensiwe pa manso yakwe Yawe, Yawe wa Sinai, pa manso yakwe Yawe Leza wa ina Izlaeli.

⁶ Mu manda yakwe Syamugali umwana wakwe Anati, mu manda yakwe Yaeli, ivikocikala vitatazile vipite nupya, kusalala mu mpanga. Na alendo aomvizye imiseo ikulu iyaomvya utuzila twakupambata.

⁷ Imisumba yamu Izlaeli yasangwike amatongwa, umutali cimwi, ukufika lino we Debola wizile, lino wizile wakwe nyina wa ina Izlaeli.

⁸ Alino kwali inkondo mu mpanga ilya lino aina Izlaeli yasolwile tuleza utupya. Pa onsi amazimbi amakumi yani mu Izlaeli, uzye pali uwasenzile icisyangu nanti isumo?

⁹ Umwenzo wane ukuzanganzila yamusika ya ina Izlaeli, ukuzangila antu aipeezile ni nsansa. Lumbanyini Yawe!

¹⁰ Si simikini mwemuno mukakwela pa mfwalasi zitiswe nu kwikala pa vikalilo vyao vino yanzika na mwemuno mukapita mu museo pa ngazo, elenganyini pali cii.

¹¹ Uvwini! Amaumba ya vyongo yano yali lwaku vifula ukuzinguluka. Kuku akuno yakulanda pa kucimvya kwakwe Yawe, ukucimvya wa nkonkotela ya ina Izlaeli. Lyene antu yakwe Yawe yatentemuka ukufuma mu misumba yao kwiza ku mpongolo zyakweyo.

¹² “Si angala utungulule, we Debola, tungulula! Tungulula, imbila ulwimbo, tungulula! Yanga pa nkolelo we Balaki! Lema yao akasi yakuleme nu kukucita uzya we mwana wakwe Abinoamu.”

¹³ Lyene acumi yiiza ku ntunguluzi zyao, antu yakwe Yawe yiiza kunoli aiteyanye ukulwa.

¹⁴ Iyafuma ku mpanga yakwe Efulemu, yiiza ku cifoloma, ku nsizi yakwe Benjamini na amu luko lwakwe. Yamusika akalamba ya vita yatentemwike ukufuma ku Makili, intunguluzi zyatentemwike ukufuma ku Zebuluni.

¹⁵ Intunguluzi zyakwe Isakali iziza pamwi na Debola, endi Isakali wali pamwi na Balaki, iyamulondela mu cifoloma. Lelo umutundu wakwe Lubeni wapalukine. Yene yatelenginye ukwiza.

¹⁶ Uzye pacani cino yene yasile icisila ni mfwele yala yakuvwa kuno yakacema yakukuwa imiluvi iyakwamila iviteekwa? Endi umutundu wakwe Lubeni wapalukine. Yene yatelenginye ukwiza.

¹⁷ Umutundu wakwe Gileadi wikalanga ku ufumondaka wa Luzi lwa Yodani, nu mutundu wakwe Dani wasile pipi ni vyombo. Umutundu wakwe Asyeli wikalanga mu nkumba yakwe yemba. Iusyala mu vituntu vyakwe yemba.

¹⁸ Lelo antu yakwe Zebuluni iyaya mu uzanzo wa kufwa. Avino cali nu ku antu yakwe Nafutali ukwayelile inkondo.

¹⁹ Uku Taanaki, apipi na manzi aku Megido, akuno yamwene yizile iyalwa. Yamwene aku Kenani iyalwa kuku, Lelo yatasenzile nanti siluva nanti ivisampwe vimwi.

²⁰ Intanda izyalwa ukufuma umwiyulu, intanda izyalwisya Sisela, lino zikupita ukucilinganya iyulu.

²¹ Umukuku mu Luzi lwa Kisyoni iuyasenda, uluzi lwa Kisyoni ulwa mukuku. Namatwalilila ukuya inkolelo, pankolelo na maka!

²² Lyene imfwalasi ziiza zila zikuciloka, izilyatola umusili ni nkamba zyaziko.

²³ Umungeli wakwe Yawe avwanga ati, “Tipwilini Melozi. Tipwilini yao akaikala mwenemo, pamulandu wakuti yene yatizile ku kwazwa Yawe, kwiza wa asilika aku mulwisizya.”

²⁴ Yaeli, umuci wakwe Hebeli umwina Kenite ali mwanaci uwalongo ukuluta pa anaci yano yakaikala mu mataalu.

²⁵ Sisela alenga amanzi, lelo Yaeli wene amupeela iziya. Wene amuletela iziya lya lwambu lwa mafuta mu lweso lwa yasambazi.

²⁶ Ikasa lyakwe limani ilitola ulupopo lwi taalu, ni kasa lyakwe ndilo ilitola inondo yakwe kasula wa vyela. Afwanta Sisela umutwe ni nondo, nu kupandola cipanga, atulula inzekete ku mbali zyoili.

²⁷ Sisela avopama pa makufi yakwe. Apona pansi alambalala cele pa ngazo zyakwe. Apa ngazo zyakwe avopama nga apona, apona pa musili, ala umufwe.

²⁸ Nyina wakwe Sisela asungamila pa nzota, api windo asungamila nga akuta ati, “Uzye pacani cino iceleta lyakwe lyalengela vii ukwiza? Uzye pacani cino imfwalasi zyakwe zyazingota ukuwela?”

²⁹ Yamangu yakwe amano sana iyamwasuka, endi, nawe ainena amaila avule ati,

³⁰ “Yene yakulondalonda ivintu ivyakupoka nu kwankanya, umukazyana wenga nanti yaili uwa kupeela kuli cila musilika. Ni vyakuzwala visuma ivyakupeela kuli Sisela, vyakuzwala visuma ivya masenkewele, ivyakupomba mu nsingo yakwe kacimvya.”

³¹ Acino we Yawe sungaleka anisi yako yonsi yafwe, lelo sungaleka yacuza yako yaengesa wa kutunka kwi lanzi! Nga mu mpanga ilya mwali umutende pa myaka amakumi yani.