Yakapingula 4 - Amazwi Yakwe Leza 2013

¹ Pacisila ca kufwa kwakwe Eudi, aina Izlaeli nupya kwene yiifya kuli Yawe.

² Acino Yawe alenga kuti Yabini, umwene umwina Kenani ayacimvye. Wene wali umwene uwamu musumba wa Hazoli. Na musika mukalamba uwa vita vyakwe wali a Sisela wino wikalanga ku Halosyeti Hagoyimu.

³ Yabini wakweti amaceleta imyanda fundimbali a vyela. Wene wateesile aina Izlaeli mu uluku. Caleka aina Izlaeli iyakuuta kuli Yawe kuti ayazwe.

⁴ Pa nsita ilya Debola, umuci wakwe Lapidoti wali a kasema nupya watumikilanga aina Izlaeli wakwe kapingula wao.

⁵ Wikalanga umwisika lya kancindu kamwi kakwe Debola akayelile apakasi ka musumba wa Lama nu wa Betele, mu mpanga ya myamba yakwe Efulemu. Lyene aina Izlaeli nao yayanga kuku kunoli ku kupingulwa.

⁶ Uwanda umwi Debola atuma akuya ama Balaki umwana wakwe Abinoamu ku musumba wa Kedesyi, umu mpanga ya Nafutali. Amunena ati, “Yawe Leza wa ina Izlaeli watakupeela ilamulo lii ati, ‘Tola aonsi amazimbi ikumi ukufuma mu mutundu wakwe Nafutali na wakwe Zebuluni nga uyatungulule ku Mwamba wa Taboli.

⁷ Nane ndaleta Sisela, musika mukalamba uwa vita vyakwe Yabini, kuti aize alwe nawe pa Luzi lwa Kisyoni. Wene alaomvya amaceleta na asilika yakwe, nga lelo mulamucimvya.’ ”

⁸ Balaki nawe azumila ati, “Cisuma mukwai, ndaya lelo suka ndi twaca twapita nawe. Pano ndi tusi nawe, ale nemo ntalayako.”

⁹ Debola nawe aasuka ati, “Cisuma fwandi tumapita swensi. Lelo ucimanye ukuti umucinzi wa kucimvya utalaya nawe, pamulandu wakuti Yawe alapeela Sisela mu makasa ya mwanaci.” Acino Debola akatuka ukuya ku Kedesyi pamwi na Balaki.

¹⁰ Balaki aama amu mutundu wakwe Zebuluni nu wakwe Nafutali ku Kedesyi, nga na onsi amazimbi ikumi iyamulondela. Debola apita nawe.

¹¹ Pa nsita ili imwi kwene Hebeli umwina Kenite walanga wataimika itaalu lyakwe mu pipi nu ku Kedesyi mu pipi nu muti waku Zaananimu uno yakati muoko. Walanga wafuntuka ku ina Kenite yauze, amu mupanda wakwe Hobabu, mulamu wakwe Mose.

¹² Lino Sisela uvwa ukuti Balaki watakwela papela ya Mwamba wa Taboli,

¹³ atuma akwama ivita vyakwe vyonsi kumwi na maceleta imyanda fundimbali a vyela. Alino ayatuma ukufuma ku Halosyeti Hagoyimu ukuya ku Luzi lwa Kisyoni.

¹⁴ Lyene Debola anena Balaki ati, “Pitanga! Yawe akukutungulula! Ilelo watakupeela ucimvyo pali Sisela.” Acino Balaki atentemuka ukufuma pa Mwamba wa Taboli pamwi ni vita vyakwe amazimbi ikumi.

¹⁵ Lino Balaki ni vita vyakwe yatandika kuzanza, Yawe avulunganya Sisela kumwi na maceleta ni vita vyakwe kwene. Sisela aika mwi celeta lyakwe nga atandika nu lwilo pansi.

¹⁶ Balaki nawe azinganya amaceleta yalya ni vita mpaka ukufika ku Halosyeti Hagoyimu. Ni vita vyonsi vyakwe Sisela iyavikomola. Kutasiile nanti wenga.

¹⁷ Lelo Sisela autukila kwi taalu lyakwe Yaeli, umuci wakwe Hebeli umwina Kenite, pamulandu wakuti Yabini umwene waku Hazoli yikalanga ku matwi cele na amu ng'anda yakwe Hebeli umwina Kenite.

¹⁸ Yaeli afuma ku kukomenkanya Sisela nga amunena ati, “Musambazi, ingila. Iza ndu wingile mwi taalu lyane. Utuvwa intete.” Acino nawe aingila nga amufisa kunzi ya cisalu ca kucinga.

¹⁹ Nga anena Yaeli ati, “Napapata mpeleko amanzi imwe. Nuvwa ulusala.” Alino afundula inyambi umwali iziya, amupeela amwa, nga amufisa nupya.

²⁰ Lyene Sisela amunena ati, “Imilila pa mulyango wi taalu, nga ndi umwi wiza wakuuzya wati, ‘Uzye mu muli umwi?’ Umwasuke uti, ‘Awe.’ ”

²¹ Sisela watonsile sana cakuti akasula wakwe cimwi. Lyene Yaeli atoola inondo nu lupopo lwi taalu nga anyanya aya papela pano wali. Alino mu pipi ni kutwi lyakwe apano amupampamila ulupopo mpaka iluya lusimpa mu musili.

²² Lino Balaki wizile akulonda Sisela, Yaeli afuma ku kumukomenkanya nga amunena ati, “Iza kuno! Namakulanga umuntu wino ukulonda.” Acino Balaki aingila pamwi nawe nga alola Sisela alambalile pansi, watafwa, nu lupopo ilupuzinkanya mu mbali ya mutwe wakwe.

²³ Uwanda ulya Leza apeela aina Izlaeli ucimvyo pali Yabini, umwene wa ina Kenani.

²⁴ Aina Izlaeli yatwalilile ukunyata Yabini mpaka iyamukoma.