Yakapingula 19 - Amazwi Yakwe Leza 2013

¹ Mu manda yalya lino aina Izlaeli yatali yakwate umwene, umwina Levi uwikalanga mu mpanga ya myamba yakwe Efulemu atoola umuci namuze ukufuma ku Betelemu mu mpanga yakwe Yuda.

² Lelo iyapusana ni ya aswilila kuli isi ku Betelemu, mu mpanga yakwe Yuda. Pacisila ca kwikala kuku pa myezi ini,

³ iya amulondelela kuti akamutonsye ku mwenzo pakuti angawela. Wapisile pamwi nu muomvi wakwe na yapunda yaili. Lino wafisile kuku, umwanaci wilya amusenda mu ng'anda yakwe isi, nga lino sivyala wamulola, amuzengela ni nsansa.

⁴ Sivyala amupapata kuti alinde. Acino aikala kuku amanda yatatu, ala akulya nu kumwa nu kusendama kuku kwene.

⁵ Pa wanda wakwe cini, iyakatuka pa macaca nu kuiteyanya ukupita, lelo sivyala anena umukwi ati, “Tala lini ivyakulya, pakuti mukwate amaka akupita.”

⁶ Acino yoili yikala pansi iyalya nu kumwa pali pamwi. Pacisila isi wa mukazyana avwanga ati, “Uzye mutange musendame kuno usiku nu kuilyokezya?”

⁷ Lino sile wakatuka, sivyala amupapata kuti alinde, nga nawe alinda nu usiku ulya kwene.

⁸ Akatondo pa wanda uwalenga yasano, lino wakatuka kuti apite, sivyala amunena ati, “Tala lini kuti mukwate amaka. Lolelini kusuke kuye amanguzi!” Acino antu yalya yoili iyalya pamwi.

⁹ Lyene umuntu wilya akatuka kuti apita nu muci namuze nu muomvi wakwe, lelo sivyala amunena ati, “Si lola, ilanzi lyasya liwe. Nupya sendamini kuno usiku. Lindini nu kuilyokezya mweisikulu. Lyene mutondo katondotondo muce mukatuke mwapita kumwinu.”

¹⁰ Lelo umuntu wilya atakasi ukulinda kuku usiku nauze. Acino akatuka nu muci namuze alungama ku Yebusi (kuli kuti, Yelusalemu), pamwi na yapunda yakwe yoili ala iyayanyepela iviya.

¹¹ Lino yapalama ku Yebusi nga walanga ni lanzi lili pipi nu kuwa, umuomvi wilya anena umusambazi wakwe ati, “Katupaluke tulale sile mu musumba uu uwa ina Yebusi.”

¹² Musambazi wakwe amunena ati, “Awe, cakana. Uu umuzi wa inamasi. Katuye sile ku Gibeya.”

¹³ Alunda nu kunena umuomvi ati, “Katwapitisya twezyeko ukufika kuno tungalala usiku, ku Gibeya nanti ku Lama.”

¹⁴ Acino iyatwalilila ulendo wao, nga ni lanzi iliwa lino yapalama ku Gibeya mu mpanga yakwe Benjamini.

¹⁵ Kuku kwene iyapaaluka kuti yalale kweneko usiku, nga iyaya mu musolo wa musumba ulya. Lelo kutali umwi uwa kuyasezya mu ng'anda yakwe.

¹⁶ Lino kakuku katola ikwiza umonsi umwi umukote ukufuma ku vyalo. Wene wali uwaku mpanga yakwe Efulemu, impanga ya myamba, nanti angala wikalanga mu Gibeya. (Aikazi yauze ya mwenemo yali amu mutundu wakwe.)

¹⁷ Umukote wilya kuno ati, alola umulumendo ali pa musolo wa musumba nga amuuzya ati, “Uzye muli nu ulendo uwakuya kwi? Uzye mufumile kwi?”

¹⁸ Nawe aasuka ati, “Tufumile ku Betelemu mu mpanga yakwe Yuda nga tukuya ku lutwe lwa mpanga ya myamba yakwe Efulemu kuno tukaikala. Nemo nali ku Betelemu mu mpanga yakwe Yuda nga ndakai nkuya ku ng'anda yakwe Yawe. Kusi umwi uwanzengela ku ng'anda yakwe.

¹⁹ Tukweti ivipelele ni vinkapala ivyakupeela yapunda itu, nga ni vyakulya vino tungalya na waini uwakumwa, nene nu mukazyana nu mulumendo. Fwandi kusi nanti acimwi cino twatitulizya.”

²⁰ Umukoloci wilya pali pakuti, “Ingilini umwane. Namamupeela vyonsi vino mukulonda. Mutalinzile ukulala apanzi apa musolo usiku.”

²¹ Acino amusezya umu ng'anda yakwe apeela na yapunda yakwe ivyakulya. Lyene pacisila ca kufulala ingazo zyao, yonsi kwene iyalya nu kumwa.

²² Walanga aisikulu yacili yakuilyokezya, antu yamwi amu musumba ulya ankota iyalizizya ing'anda. Iyapuma ku cisasa, nga iyapunda sana ku mukote wilya yati, “Fumizya panzi umuntu wiyo uwataiza ukwako kuti tuulungane nawe.”

²³ Umwine wa ng'anda afuma panzi nga ayanena ati, “Awe mukwai, mwe yacuza mutaezya ukucita icintu icawinyi wakwe cico. Pasi pano umuntu wii umwenyi wane. Namupapata mutaezya icintu ci icamuzewanya.

²⁴ Si lolini, umwana wane umwanaci aewi nupya atatala wamanya umonsi, nga nu muci namuze aewi. Kanjafumizye panzi pakuti mucite cino mukasi kunoyali. Lelo mutaezya ukucita icamuzewanya icili consi ku muntu wi.”

²⁵ Lelo antu yalya iyakana ukuvwa kunoli. Caleka umuntu wilya atoola umuci namuze nga amufumizya panzi kunoyali, nga iyamupona napenepo yalongozya nawe usiku onsi, nga pa macaca iyamuta kuti apite.

²⁶ Lino kwandatuka umwanaci wilya aswilila ku ng'anda ya mukote wilya ukwikalanga iya, apona pansi pa mulyango nga alambalala papa kwene suka ikuca.

²⁷ Lino iya wazyuka akatondo nu kuyula icisasa kuti atwalilile nu ulendo wakwe, azana umuci namuze alambalile pa mulyango, watalozya na makasa yakwe ku mulyango.

²⁸ Alino amunena ati, “Zyuka twapita.” Lelo kutali ukwasuka nanti akumwi. Caleka amukatusya nu kumwika pali punda wakwe nga iyatenuka yaswilila ukwakwe.

²⁹ Lino wafisile ukwakwe, atoola umupeni nga atoola icala ca muci wilya namuze aciputola mu vipande ikumi na viili nga avituma monsi mu mpanga ya ina Izlaeli.

³⁰ Wensi uwaweni icintu cii avwanga ati, “Icamusango uu citatala cacitika nanti ukuloleka ukufuma sile lino aina Izlaeli yafumile mu mpanga ya Eguputo. Ale lyene twelenganye ningo nga tuvwane vino tumacita pali cii.”