Yakapingula 18 - Amazwi Yakwe Leza 2013

Mika nu mutundu wakwe Dani

¹ Pa nsita ilya kutali umwene mu Izlaeli. Mu manda yalya amu mutundu wakwe Dani yalondanga impanga umwakwikala pamulandu wakuti walanga yatacili yapelwe impanga mu mitundu ya ina Izlaeli.

² Acino amu mutundu wakwe Dani yasolwile antu yasano asipe ukufuma mu ng'anda zyonsi izya mu mutundu wao iyayatuma ku musumba wa Zola nu wa Esyitaoli. Iyayatungulula ivyakwendezya impanga ilya nu kunengula ivyayamo. Lino yafisile mu mpanga yakwe Efulemu, ya myamba, yatenzi mu ng'anda yakwe Mika.

³ Lino yali ku ng'anda kwene ilya, iyalooka imivwangile ya mulumendo umwina Levi. Alino iyaya kunoli iyamuzya yati, “Uzye ukucita cani kuno? Uwakulesile kuno aweni?”

⁴ Nawe aasuka ati, “Akuno vili vino twapangana na Mika. Wene akandipila pa ncito ino wandemba iya kutumikila wakwe simapepo wakwe.”

⁵ Nao iyamunena yati, “Twapapata utuzizyeko kuli Leza ndi cakuti ulendo witu ulaya utambalale.”

⁶ Simapepo wilya aasuka ati, “Si mutasakamala. Yawe amamusunga pa lwendo lwinu.”

⁷ Acino aonsi yalya yasano pali pakukatuka nga iyaya ku musumba wa Laisyi. Yaweni vino antu ya kweneko yakaikala umu kucingililwa wa ina Sidoni. Yene antu atemwa umutende, aikala ku matwi cele, nupya yasicita ivikanza nu muntu. Antu yaa yatulilwe ivintu vino yalondanga. Yene yikalanga ukutali nu kwali aina Sidoni nupya yatakweti kapitilo na antu yauze asyala.

⁸ Lino antu yalya yasano yaweluluka ku Zola nu ku Esyitaoli, auze iyayuzya yati, “Uli kuko kuno mwaile?”

⁹ Nayo yaasuka yati, “Izini kuno. Tuini tukayazanze! Twaile itulola impanga yonsi impanga ilya vino yazipa. Uzye mutakucitapo cimwi? Mutasitoka ukuya kuku nu kupoka impanga ilya.

¹⁰ Lino mwafika kweneko, mulazana ukuti ukwaya antu atange yamutunganye nanda cimwi. Nupya impanga iyo ikulu umwaya konsi kano umuntu akalonda. Fwandi ili mpanga ino Leza wapeela kunomuli.”

¹¹ Aonsi imyanda mutanda amu luko lwakwe Dani pali pakutenuka ukufuma mu Zola nu mu Esyitaoli, ala iyaipangasya ku kulwa.

¹² Iyatumbela iyaya yakuula insakwe pipi nu ku Kilyati Yealimu mu mpanga yakwe Yuda. Uli mulandu uno incende iyaya lwaku uwondaka wa Kilyati Yealimu ni lelo kwene ikaamwa ukuti Maane Dani.

¹³ Lino yafuma kuku iyaya ku mpanga yakwe Efulemu, ya myamba nga yiiza ku ng'anda yakwe Mika.

¹⁴ Lyene aonsi yalya yasano yano yaile iyendezya impanga ya Laisyi iyanena aina yao yati, “Uzye mwamanya ukuti umu ng'anda imwi pa ng'anda zii mwaya cakuzwala ca efodi, akaluwi akawaze kano yengelelako siluva? Nupya mwaya utuluwi tuze. Lyene elenganyini vino tulinzile ukucita.”

¹⁵ Acino iyakatuka iyaya ku ng'anda yakwe Mika, kuno umulumendo wilya umwina Levi wikalanga, nga iyamulamuka.

¹⁶ Pa nsita ilya ala amu mutundu wakwe Dani yaya imyanda mutanda yimilile pa mulyango aipangasye ku kulwa.

¹⁷ Aonsi yalya yasano aile iyendezya impanga yingila mukasi ka ng'anda ilya iyatola akaluwi akawaze, ni cakuzwala ca efodi, nu tuluwi tuze pamwi na kaluwi akawaze kano yengelelako siluva. Ale lilyo simapepo aimilile pa mulyango pamwi ni vita imyanda mutanda.

¹⁸ Lino aonsi yalya yingile mu ng'anda yakwe Mika nu kutoola akaluwi akawaze, ni cakuzwala ca efodi, nu tuluwi tuze pamwi na kaluwi akawaze kano yengelelako siluva, simapepo ayuzya ati, “Icani cino mukucita?”

¹⁹ Nayo yamwasuka yati, “Tuzya! Utezya ulande nanti izwi lyonga. Iza upite naswe, nga lyene uye tata na simapepo witu. Uzye citange cizipe kuti wemo uwatumikila umutundu nu luko lwamu Izlaeli wakwe simapepo ukuluta ukuya simapepo wa ng'anda yonga sile.”

²⁰ Lyene simapepo wilya atemwa. Aliwe kwene asenda cakuzwala ca efodi, nu tuluwi tuze nga na kaluwi kano yengelelako siluva nga apita na antu yalya.

²¹ Nayo papo kwene ali pakusenuka, iyaswilila yonsi, ala iyakolezya ana yao, iviteekwa vyao nga ni vintu vyao.

²² Lino yapita akatalamukila sile ukufuma ku ng'anda yakwe Mika, Mika apunda ainipamba yakwe aonsi nga iyalondelela iyasuka iyazana amu mutundu wakwe Dani.

²³ Lino aonsi yalya yapunda pacisila, amu mutundu wakwe Dani nayo iyasenukila kunoyali nga iyuzya Mika yati, “Uzye icani icakusakamika pakuti ukonganike antu yako ku kulwa?”

²⁴ Nawe aasuka ati, “Mwatimunsendela tuleza twane tuno naipangila nemwisikulu nupya mwatimunsendela simapepo wane, imupita. Lyene nemo insile minwe. Uzye lyene munganguzya uli muti, ‘Uzye icani icakusakamika?’ ”

²⁵ Amu mutundu wakwe Dani nayo iyamwasuka yati, “Utatwanola, pano limwi ungazana ukuti aonsi asepukilwe yakukatukila, nga yakukome kumwi na ang'anda yako.”

²⁶ Acino amu mutundu wakwe Dani iyatwalilila nu ulendo wao, nga Mika apakulola ukuti yamucizya amaka, asenuka aswilila ukwakwe.

²⁷ Lyene amu mutundu wakwe Dani iyasenda ivintu vivi vino Mika wapanzile, kumwi na simapepo wilya, nga iyaya ku Laisyi, ku kulwisya antu amutende, atatunganyanga kamwi. Alino iyayazanza ku lupanga nu koca umusumba wao.

²⁸ Kutali umwi uwa kuyatuula pamulandu wakuti yatenzi ukutali nu ku Sidoni nga yatakweti utandano nu muntu ali wensi. Umusumba ulya wali mu cifoloma pipi nu ku Beti Leobu. Amu mutundu wakwe Dani iyakuululula umusumba ulya nu kwikala mwenemo.

²⁹ Pali pakuutemela izina yati Dani, ilili zina lya cikolwe cao Dani, uwali umwana wakwe Izlaeli. Lelo mpiti izina lyankolelo lyauko yatangi Laisyi.

³⁰ Kuku kwene akuno amu mutundu wakwe Dani yimika tuluwi twao, nga Yonatani umwana wakwe Gelisyomu, umwana wakwe Mose, pamwi na ana yakwe yali a yasimapepo atumikilanga umutundu wakwe Dani ukufika na lino yizile iyasendwa mu uzya.

³¹ Yatwalilile ukuomvya tuluwi tuno Mika wapanzile, pa nsita yonsi ino ing'anda yakwe Leza yali ku Syilo.