Yakapingula 16 - Amazwi Yakwe Leza 2013

Samusoni ku Gaza

¹ Uwanda umwi Samusoni aya ku Gaza. Nga kuku alola cizelele, alino aya alalindo ukwakwe.

² Lino aikazi amu Gaza yuvwa ukuti Samusoni wataiza, nga iyakongana pamwi nu kumuteyamila usiku onsi pa mpongolo ya musumba.

³ Lelo Samusoni wene waizi pa musanzi ukufika nu usiku pakasi. Lyene akatuka nga anyemula nu kutukula icisasa ca mpongolo ya musumba, kumwi na maingwe yoili kwene, asokomola ifulemu na vyonsi ivyasyala nga avipinga pa ciye avisenda pa mwamba papela lwaku ufumondaka wakwe Hebuloni.

Kulanda vyapali Samusoni na Delila

⁴ Lino papita insita, Samusoni yiiza yatemwana nu mwanaci wino yatemile izina yati a Delila, wino wikalanga mu Cifoloma ca Soleki.

⁵ Intunguluzi zya ina Filisti ziza kunoli izimunena iziti, “Uce umulyombeleke ukezye ukuzana kuno amaka yakwe yafuma, na vino tungacita pakuti tumutonsye nu kumunyepa pakuti tukapoke amaka yakwe. Cila wenga uwa munotuli tulakulipa impiya zyakwe siluva ukulingana ni zimbi nu mwanda onga.”

⁶ Acino Delila anena Samusoni ati, “Napapata unene inkama ya cintu icalenga kuti ungakwata amaka vii. Uzye umwi angacita uli ndi akulonda ukukutonsya?”

⁷ Samusoni amwaasuka ati, “Ndi cakuti umwi wanyepa ni myando ya mikwela cinimbali ipya ino itali kuti yume, lyene ntangakwata amaka. Ningaya wa muntu ali wensi.”

⁸ Acino intunguluzi zya ina Filisti pali pakuletela Delila imyando ya mikwela cinimbali ipya ino itali kuti yume, nga nawe amunyepa.

⁹ Delila ale watafisa na antu yakwe yamwi mu muputule uwa mukasikasi, nga apunda ati, “Samusoni, wafwa aina Filisti ayayo!” Lelo Samusoni pali pakwiza vwandamuka nu kutankola imyando ya mikwela kwati avino usavu ukaputoka ndi wakumya umoto. Caleka ni nkama ya maka yakwe itamanyikwe papo.

¹⁰ Delila pali pakunena Samusoni ati, “Fwandi wali ukuntumpika nu kuntumpoka sile. Napapata lyene si nene vino yangakunyepa.”

¹¹ Nawe amwaasuka ati, “Ndi umwi wanyepa ningo ni myando ipya ino itatala yaomviwa, lyene ntangakwata amaka. Ningaya wa muntu ali wensi.”

¹² Acino Delila atoola imyando ipya nga amunyepa. Pa nsita ilya walanga aina Filisti yatiyafisama mu muputule wa mukasikasi, nga Delila apunda ati, “Samusoni, wafwa aina Filisti ayayo!” Lelo wene atankola imyando ilya ku makasa yakwe kwati usavu.

¹³ Delila pali pakuilizyanya kuli Samusoni ati, “Nalikwene ucili ukuntumpika nu kuntumpoka. Napapata lyene si nene vino yangakunyepa.” Nawe aasuka ati, “Ndi waluka vimukule cinimbali uminkanyemo nu lukusa alino uvinyepelele ku lupopo, lyene ntangakwata amaka. Ningaya wa muntu ali wensi.”

¹⁴ Alino Delila amulyombeleka mpaka amulalikizya. Alukinkanya na vimukule cinimbali ivya nyele zyakwe ku lukusa lwa wile. Alino avinyepenkanya ku lupopo nga nupya apunda ati, “Samusoni, wafwa aina Filisti ayayo!” Lelo Samusoni avwandamuka mu tulo nga avuta na vimukule atukwila kumwi nu lupopo.

¹⁵ Alino Delila amunena ati, “Ungalanda uli ukuti wantemwa lino fwandi utantaila? Lii, ila lyakwe citatu lino wemo ukalu kuntumpika nupya utali kuti unene inkama ya maka yako akulu.”

¹⁶ Walondekinye ukumuzya cila wanda, amwanola mpaka amutonsya pipi ni mfwa.

¹⁷ Acino Samusoni amuyulila inkama zyakwe zyonsi ati, “Yatatala yampela ku mutwe pamulandu wakuti nene Munazili mupaatulwe kuli Leza ukufuma ku kuvyalwa kwane. Ndi yampela ku mutwe, amaka yane yangafuma munondi, nga lyene ntangakwata amaka. Ningaya wa muntu ali wensi.”

¹⁸ Lino Delila wamanya ukuti Samusoni wamuyulila inkama yakwe yonsi, lyene atuma intumi iyakuyanena intunguluzi zya ina Filisti ziti, “Izini kuno nupya kwene. Pasi pano wene watanena inkama yakwe yonsi.” Acino intunguluzi zya ina Filisti iziza zila zisenzile impiya zizi zyakwe siluva mu minwe.

¹⁹ Delila amulyombeleka mpaka amulalikizya pa mpamba zyakwe, nga aama umonsi umwi uwakuti aize amupele vimukule vivi cinimbali ku mutwe wakwe, alino lyene yamutonsye. Avino amaka yafumile munoli nga

²⁰ Delila apunda ati, “Samusoni, wafwa aina Filisti ayayo!” Samusoni avwandamuka mu tulo, aelenganya ati, “Namafuma nu kufyumbutuka wakwe vino cikaya lyonsi.” Lelo wene atamanyile ukuti Yawe watamusya.

²¹ Lyene aina Filisti iyamulema iyamutonkola amanso nga iyamusenda iyatentemukila ku Gaza. Kuli kuno iyaya iyamunyepa mu minyololo iili iyamukuwa, nga iyainyepelela kwiwe lyakusila umu ng'anda yaminyololo amuno aasya.

²² Lelo ukufuma lino yamupezile, inyele ku mutwe wakwe nupya izitandika ukukula.

²³ Lyene intunguluzi zya ina Filisti izikongana kuti zipeele impolelwa ikulu kuli Dagoni leza wao, nga nu kuzevya ziti, “Leza witu watapeela Samusoni umwanisi witu mu makasa itu.”

²⁴ Lino antu yalola Samusoni iyalumbanya leza wao yati, “Leza witu watapeela umwanisi witu mu makasa itu, wino wononanga impanga itu nu kuvuzya imfwa pa antu itu.”

²⁵ Lino yazanga mu myenzo yao, iyapunda yati, “Kaletini Samusoni aize atusansamusye.” Acino iyama Samusoni ukufuma mu ng'anda yaminyololo, nga nawe acita iviila pa manso yao. Nga lino yamwimika pakasi ka ncesi ziili,

²⁶ Samusoni anena umuomvi uwamulemile ikasa nu kumutungulula ati, “Ntungulule pa ncende pano ningakumya incesi izyatungilila ng'anda ikulu, pakuti nsintilile kweneko.”

²⁷ Lyene mu ng'anda kwene ii mwazile antu avule, aonsi na anaci. Intunguluzi zisano zya ina Filisti amuno yali yonsi kwene, nga kwali antu manye amazimbi amakumi yatatu yano yatenzi api paala yala yakulola vino Samusoni akucina.

²⁸ Alino Samusoni apepa kuli Yawe ati, “Yawe Simwandalali, napapata su nganjiusya. Su mpeele nupya amaka nanti iila lyonga kwene, ngu leke kuti ndandule pa manso yane yoili yano aina Filisti yantonkola.”

²⁹ Alino Samusoni alema incesi ziili zizi izyatungilile Ng'anda ikulu ilya, ikasa lilunji kuli longa ni limani kuli luze, azipunganya

³⁰ nga avwanga ati, “Kamfwile pamwi na ina Filisti!” Lyene azitensya na maka yakwe yonsi nga ing'anda ilya ikulu pali pakuponela intunguluzi zizi na antu yonsi ali mwenemo. Avino Samusoni wakomile antu avule pa mfwa yakwe ukuluta yano wakomile lino wali umumi.

³¹ Aina yakwe aonsi pamwi na akazi kakwe isi yonsi iyatentemuka, iyamusenda iyatumbela nga iyaya iyamuzika mwi cele lyakwe isi Manoa pakasi kakwe Zola na Esyitaoli. Samusoni watungulwile aina Izlaeli pa myaka amakumi yaili.