Yakapingula 13 - Amazwi Yakwe Leza 2013

Kuvyalwa kwakwe Samusoni

¹ Nupya kwene aina Izlaeli iyiifya pa manso yakwe Yawe. Caleka Yawe ayapeela mu makasa ya ina Filisti pa myaka amakumi yani.

² Pa nsita ilya kwaliko umuntu umwi uwaku Zola, uwi zina lyakwe Manoa, uwamu mutundu wakwe Dani. Umuci wakwe wali ing'umba. Wene atakweti umwana.

³ Umungeli wakwe Yawe aloleka kunoli nga amunena ati, “Wewe ng'umba utakwata umwana, nga lelo ulasenda indilwa nu kuvyala umwana.

⁴ Lyene ucenjele utakezye ukumwa waini nanti ivili vyonsi ivikakola. Nupya utakalye icikowele icili consi,

⁵ pamulandu wakuti ulasenda indilwa nu kuvyala umwana umonsi. Nupya umwana wiyo yatakatale yamupele inyele ku mutwe, pamulandu wakuti umulumendo wiyo alaya umwina Nazili, uwapaatwilwa Leza ukufuma ku kuvyalwa kwakwe. Wene alatandika ukutuula aina Izlaeli ku lucu lwa ina Filisti.”

⁶ Lyene umwanaci wilya apita aya anena iya wakwe ati, “Umuntu wakwe Leza umwi wali wiza kunondi. Imilolekele yakwe ikoline ni ya mungeli wakwe Leza, iyakoofya wakwe cimwi. Ntamuzizye kuno afumile, nanti aliwe atanenyile izina lyakwe.

⁷ Lelo wali wanena wati, ‘Ulasenda indilwa nu kuvyala umwana umonsi. Ukufuma pali ndakai utakezye ukumwa waini nanti ivili vyonsi ivikakola. Nupya utakalye icili consi icikowele, pamulandu wakuti umulumendo wiyo alaya umwina Nazili, uwapaatwilwa Leza ukufuma ku kuvyalwa kwakwe kufika na pa wanda wa kufwa kwakwe.’ ”

⁸ Manoa pali pakupepa kuli Yawe, ati, “Napapata, we Yawe, sungaleka umuntu wakwe Leza wino waliwamutuma aize nupya kuli sweswe, pakuti atusunde vino tulinzile kucitila umulumendo wino alavyalwa.”

⁹ Leza auvwa ipepo lyakwe Manoa, nga nu mungeli wakwe Leza nupya aiza ku mwanaci wilya lino atenzi mu calo. Lelo iya wene atali nawe.

¹⁰ Alino umwanaci wilya akumpeka kuyanena iya, ati, “Lola! Umonsi wilya uwalolike kunondi uwanda ulya wataloleka nupya!”

¹¹ Manoa akatuka lili kwene nu kulondelela umuci. Lino wiza apali umuntu wilya, amuuzya ati, “Uzye awewe wino mwalandine nu muci wane?” Alino nawe aasuka ati, “Anene kwene.”

¹² Caleka Manoa amuuzya ati, “Lino amazwi yako yalafikiliziwa, uzye umwana wilya alasundwa uli nupya ivyani vino wene alacita?”

¹³ Umungeli wakwe Yawe aasuka ati, “Umuci wako alinzile asininkizye ukuti wacita vyonsi vino namunenyile kucita.

¹⁴ Atakezye ukulya icili consi icikafuma ku matingi, nanti ukumwa waini ali wensi nanti ivili vyonsi ivikakola nanti ukulya icili consi icikowele. Wene alinzile kucita vyonsi vino namupeela ilamulo kucita.”

¹⁵ Manoa anena umungeli wakwe Yawe ati, “Cingatuzipila kuti utale wikale mpaka tukwelekele akana ka mbuzi.”

¹⁶ Umungeli wakwe Yawe nawe aasuka ati, “Nanti angala munganteeka, nemo ntamalya icakulya cako icili consi. Lelo ndi mukasi teyanyini uwila wakoca, nga mocele Yawe impolelwa.” (Manoa atamanyile ukuti umuntu wilya wali umungeli wakwe Yawe.)

¹⁷ Alino Manoa auzya umungeli wakwe Yawe ati, “Uzye izina lyako wewe weni, pakuti tuce tukucindike lino amazwi yako yalafikiliziwa?”

¹⁸ Umungeli wakwe Yawe aasuka ati, “Uzye pacani cino ukunguzizya izina lyane? Izina lii, ilya cipezya amano.”

¹⁹ Acino Manoa atoola akana ka mbuzi, nu wila wa cakulya, nga aocela Yawe impolelwa pa ciliwe. Nga Yawe acita ivizungusyo ala Manoa nu muci wakwe yakulola,

²⁰ icimbilimbili ca moto icitumukila mupela umwiyulu ukufuma pa kavuwa kaka, nu mungeli wakwe Yawe akwela mu cimbilimbili ca moto. Alino Manoa nu muci, apakulola cii, iyapona pansi yafupime.

²¹ Pacisila cakwe vii, umungeli wakwe Yawe atalolike nupya kuli Manoa nu muci, nga Manoa pali pakumanya ndi vino wene umungeli wakwe Yawe.

²² Manoa anena umuci wakwe ati, “Owe, tumafwa, pano twatitulola Leza!”

²³ Lelo umuci aasuka ati, “Ndi cakuti Yawe walakasi ukukoma sweswe, lyene atange azumile uwila wakoca nu wila wa cakulya ukufuma kunotuli, nanti kutulanga nu kutunena ivintu vii vyonsi.”

²⁴ Umwanaci wilya pali pakwiza vyala umwana umonsi nga amutemela izina ati a Samusoni. Umulumendo wilya akula nga Yawe amupolelela,

²⁵ nu Mupasi wakwe Yawe iutandika kumuomvya lino acili ku Maane Dani, pakasi kakwe Zola na Esyitaoli.