Yakapingula 11 - Amazwi Yakwe Leza 2013

¹ Yefuta umwina Gileadi wali umusilika umukanzane. Isi wali a Gileadi nga wamuvile muli cizelele.

² Umuci wakwe Gileadi nawe amuvyalila ana aonsi, nga lino yakula iyazinga Yefuta iyamunena yati, “Wemo utange upyane nanti cimwi pa vyuma vyakwe tata, pano wewe mwana wa ciza na nyina.”

³ Acino Yefuta autuka aina yaya aya aikala ku mpanga ya Tobu, kuno waile akusa iumba limwi lya viwelewele, ilyamulondela.

⁴ Lino papisile insita, aina Amoni iyakatuka nu kwiza lwisya aina Izlaeli,

⁵ nga lino ulwi wakatuka, intunguluzi zyamu Gileadi izipita ku kutoola Yefuta ku mpanga ya Tobu.

⁶ Izimunena iziti, “Iza kuno uye musika mukalamba witu uwa vita, pakuti tulwisye aina Amoni.”

⁷ Yefuta azinena ati, “Uzye asi mwemwe mwampasile cuze nu kunzinga mu ng'anda yakwe tata? Icani cino nupya mungizila kunondi, lino mwaya mu ntazi?”

⁸ Intunguluzi zizi izinena Yefuta iziti, “Ali cico kwene cino twizile kunuli. Tukulonda utulondele nu kuya lwisya aina Amoni, nga lyene ulaya intunguluzi itu iya ikazi yonsi amu Gileadi.”

⁹ Yefuta ayanena ati, “Ndi mwansenda ku kulwisya aina Amoni, na Yawe ayapeele mu makasa yane, lyene ndinzile kuya intunguluzi inu.”

¹⁰ Intunguluzi zyamu Gileadi zimunena iziti, “Yawe ali kambone witu. Cumi kwene tulacita wakwe vino uvwanzile.”

¹¹ Acino Yefuta apita ni ntunguluzi zizi zyamu Gileadi, nga antu iyamucita kuya intunguluzi yao na musika mukalamba wao uwa vita. Lyene ku Mizipa, pa manso yakwe Yawe, Yefuta aswilizya ukulanda amazwi yaya wakwe vino yapangine nayo.

¹² Alino Yefuta atuma inkombe ku mwene wa ina Amoni kuti zikamuzye iuzyo lii ziti, “Uzye icani cino nakutala pakuti wize ukatusye inkondo mu mpanga itu?”

¹³ Umwene wa ina Amoni aasuka inkombe zyakwe Yefuta ati, “Umulandu uwakuti lino aina Izlaeli yafumile ku Eguputo yamposile impanga yane, ukutandikila ku Luzi lwa Alinoni kufika ku nu Luzi lwa Yaboki nu ku Luzi lwa Yodani. Lyene umbwezezye impanga iyo mu mutende.”

¹⁴ Nawe Yefuta aswilizya inkombe ku mwene wa ina Amoni,

¹⁵ na mazwi akuti, “Cisi cacumi ukuti aina Izlaeli yaposile impanga ya ina Moabu nanti impanga ya ina Amoni.

¹⁶ Lelo lino yafumile ku Eguputo, aina Izlaeli yapisile mu lwanga iyaya kuli Yemba Muyenzu iyasuka yafika nu ku Kadesyi.

¹⁷ Lyene aina Izlaeli yatumile inkombe ku mwene wa ina Edomu kuti yalenge ulusa lwa kupita kusalala mu mpanga yakwe. Lelo umwene wa ina Edomu wakanyile. Nupya yatumile inkombe ku mwene wa ina Moabu, lelo nawe kwene wakanyile. Acino aina Izlaeli yatenzi ku Kadesyi.

¹⁸ Lyene alino yakatwike nu kupita mu lwanga, iyapambata impanga ya ina Edomu ni ya ina Moabu, iyapita ku ufumondaka wa mpanga ya ina Moabu, nga iyakuula insakwe mu mbali ya Luzi lwa Alinoni. Yatingile mu mpanga ya ina Moabu, pano Luzi lwa Alinoni ali mumpaka na mpaka.

¹⁹ Alino aina Izlaeli yatumile inkombe kuli Siooni umwene wa ina Amoli, wino wateekanga mu Hesyiboni, nga yamulenga kuti ayazumilizye ukupita ukusalala mu mpanga yakwe pakuti yace yafike kumwao.

²⁰ Lelo Siooni, atayazumilizye ukupita ukusalala mwenemo. Akonganika ivita vyakwe vyonsi, alino iyakuula insakwe ku Yaazi nga iyalwa na ina Izlaeli.

²¹ Lelo Yawe, Leza wa ina Izlaeli, apeela Siooni kumwi na antu yakwe yonsi mu makasa ya ina Izlaeli, yao acimvizye aina Amoli nu kwikala mu mpanga yao yonsi mu muputule wa mpanga ilya.

²² Iyapoka impanga yonsi iya ina Amoli ukutandikila sile ku Luzi lwa Alinoni ukufika nu ku Luzi lwa Yaboki nga nupya ukutandikila ku lwanga ukufika nu ku Luzi lwa Yodani.

²³ Ale lyene vino Yawe, Leza wa ina Izlaeli, watazingila aina Amoli kunzi pakuti cizipile aina Izlaeli, uzye insambu ci ino ukweti iyakutola icifulo cao?

²⁴ Uzye citange cikuzipile ukutoola cino Kemosyi leza wako wakupeela? Naswe kwene consi cino Yawe Leza witu watupela, cico kwene acino tumatola.

²⁵ Uzye ukwelenganya ukuti wemo wazipa ukuluta Balaki umwana wakwe Zipoli, nupya umwene waku Moabu? Uzye wene watazile alemanizya aina Izlaeli nu kulwa nayo?

²⁶ Pa myaka imyanda amakumi yatatu aina Izlaeli yatenzi mu Hesyiboni, nu mu Aloeli ni mizi yakweo, nga nu mu misumba yonsi pipi nu ku Alinoni. Uzye lyene pacani cino mutaposile incende zizi lilya kwene?

²⁷ Ala mwine nemo ntakutala nanti cimwi, lelo wewe ukwifya kunondi pa kunkatusizya inkondo. Si angala Yawe, kapingula aliwe apingule pa ina Izlaeli na ina Amoni ilelo.”

²⁸ Lelo umwene wa ina Amoni atasumvile amano ku mazwi yano Yefuta wamutumile.

²⁹ Lyene Umupasi wakwe Yawe iwikila pali Yefuta. Nawe pali pakusalala impanga ya Gileadi na yakwe Manase, alino apita mu Mizipa uwaku Gileadi. Lyene ukufuma kuku aya ku kuzanza aina Amoni.

³⁰ Nupya Yefuta alapa nu mulapo kuli Yawe ati, “Ndi wapeela aina Amoni mu makasa yane,

³¹ ale iciumbwa icili consi cino cilatandika ku nkomenkanya lino ndawela ku kucimvya aina Amoni cilaya icakwe Yawe, nupya cili cino ndapeela wa wila wakoca kunoli.”

³² Lyene Yefuta alamba ku kulwisya aina Amoni, nga Yawe ayapeela mu makasa yakwe.

³³ Nawe ayacimvya nu kuyakomola ukufuma ku Aloeli ukufika pipi nu ku Miniti, atoola imisumba amakumi yaili, ukufika nu ku Abeli Kelamimu. Avino Izlaeli wacimvizye aina Amoni.

Umukazyana mwana Yefuta

³⁴ Lino Yefuta wawelulwike ukufuma ku Mizipa, icamupamba umwana wakwe uwa kaci aiza amukomenkanya, ala akulizya icinanda nu kucina. Wene wali ali mwana wakwe wenga mpo. Atakweti umwana namuze umonsi nanti umwanaci.

³⁵ Lino Yefuta wamulola, alepola ivyakuzwala vyakwe nga apunda ati, “Uwi, mwanane! Wandetela amalanda nu kunyunguluka, pamulandu wakuti natindaya nu mulapo kuli Yawe uno ntangemfutuke!”

³⁶ Mwana nawe avwanga ati, “Tata, ndi cakuti walaya mpiti kuli Yawe, lyene ulinzile uncitile wakwe muno walayile, pano Yawe watakulandwila anisi yako aina Amoni.

³⁷ Lelo nkulenga uncitile icintu ci conga. Munte pa myezi iili imfume nkuzeuluka na anji mu myamba nu kuililila pa lwakufwa ni cisungu cane.”

³⁸ Isi nawe amunena ati, “Ungapita.” Alino amuta apita pa myezi iili. Apita pamwi na auze mu myamba nu kulilila pa lwakufwa ni cisungu cakwe.

³⁹ Pacisila ca myezi iili, awela kuli isi nga nawe amucitila wakwe vino walafile nu mulapo. Wene wali umukazyana atatala wamanya umonsi. Ukwafuma nu lutambi lwa ina Izlaeli

⁴⁰ ulwakuti cila mwaka akazyana amu Izlaeli yalinzile yaya mu myamba pa manda yani ku kulosya umwana kaci wakwe Yefuta umwina Gileadi.