Yakapingula 1 - Amazwi Yakwe Leza 2013

Umutundu wakwe Yuda na wakwe Simeoni yalema Adonibezeki

¹ Pacisila ca kufwa kwakwe Yoswa, aina Izlaeli yuzya Yawe yati, “Uzye umutundu cii pa mitundu itu umatandikilapo ukulwisya aina Kenani?”

² Yawe aasuka ati, “Umutundu wakwe Yuda umatandikilapo. Namalenga ukuti impanga iye mu makasa yao.”

³ Alino antu yakwe iyanena aina amu mutundu wakwe Simeoni yati, “Twendini tupitile pamwi tukalwisye amu mpanga ino yatupezile, aina Kenani. Lyene naswe tulamwazwa ukulwisya amu mpanga ino mwapelwa.” Caleka amu mutundu wakwe Simeoni yapita nayo.

⁴ Lyene lino antu yakwe Yuda yalwisya, Yawe nawe aleka iyacimvya aina Kenani na ina Pelizi, nga iyacimvya antu ukulingana na mazimbi ikumi ku Bezeki.

⁵ Ku Bezeki kwene kuli kuno yakomenkinye Adonibezeki, nga iyamuzanza, iyacimvya aina Kenani na ina Pelizi.

⁶ Adonibezeki autuka, lelo iyamucocovya, iyamulema nga iyamuputola ivyala nga ni vikando vikulu.

⁷ Adonibezeki avwanga ati, “Yamwene amakumi cinimbali yano yatakweti ivyala ni vikando vikulu yasolanga amalakasi aponanga ukwi tebulo lyane. Leza watacita icilanduzi kunondi pali vino nayacitile.” Lyene iyamusenda ku Yelusalemu, akuno aya afwila.

Antu yakwe Yuda yapokolola Yelusalemu na Hebuloni

⁸ Antu yakwe Yuda yazanza umusumba wa Yelusalemu nu kuupoka. Iyakoma antu yonsi nu kutumula umoto mu musumba ulya.

⁹ Pacisila cakwe vii, iyaya iyalwisya aina Kenani aikalanga mu mpanga ya myamba mu misana ya twamba, nga nu ku Negebu lwaku kaeya.

¹⁰ Nupya iyaya iyalwisya aina Kenani aikalanga mu musumba wa Hebuloni uno yamanga yati Kilyati Aliba. Kuku akuno yacimvizye inko zyakwe Syesyai, Aiimani na Talimai.

Otinieli wapokolola umusumba wa Debili

¹¹ Antu yakwe Yuda iyafuma kuku iyaya yayazanza umusumba wa Debili, uno pa nsita ilya yamanga yati Kilyati Sefeli.

¹² Wenga uwa munoyali, wino yamanga yati a Kalebu, avwanga ati, “Umonsi wensi alazanza nu kucimvya Kilyati Sefeli ndamupeela Akisa umwana wane umwanaci kuti aye umuci.”

¹³ Otinieli, umwana umonsi wakwe Kenazi, umuto wakwe Kalebu, apokolola umusumba ulya. Acino Kalebu amupeela Akisa, umwana wakwe umwanaci, kuti aye umuci.

¹⁴ Uwanda umwi lino Akisa wiza kuli Otinieli, amupapata kuti akalenge icalo kuli isi uwali a sivyala. Lino Akisa wika pali punda wakwe, Kalebu amuuzya ati, “Uzye ukulonda nkucitile cani?”

¹⁵ Nawe amwaasuka ati, “Nkulenga mumpeele tufukoka twa manzi. Pasi pano impanga ino mwampela iyumalale.” Acino Kalebu amupeela tufukoka utwayelile kupela nu kwisika.

Ucimvyo wa mitundu yakwe Yuda na yakwe Benjamini

¹⁶ Amu mupanda wa mwina Kenite, sivyala wakwe Mose, iyatumbela ukufuma mu musumba wa vikambalala pamwi na ina Yuda iyaya ku kwikala pakasi ka antu amu Lwanga lwa mpanga yakwe Yuda umu mpanga ya Negebu pipi nu ku Aladi.

¹⁷ Lyene amu mutundu wakwe Yuda iyapita pamwi na ina yao amu mutundu wakwe Simeoni, nga yaya yazanza aina Kenani akaikala mu Zefati, nga iyonona umusumba onsi pyu. Icaleka iyautemela ni zina yati Holima

¹⁸ Aina Yuda iyapoka ni misumba ya Gaza, Asyikeloni na Ekiloni, cila musumba ni mpanga yakweo.

¹⁹ Yawe wali na aina Yuda. Iyapoka impanga ya myamba, lelo iyaposiwa kuzinga antu ali mu manyika pamulandu wakuti antu yalya yakweti amaceleta.

²⁰ Wakwe vino Mose walavile, yapeela umusumba wa Hebuloni kuli Kalebu, wino wazinzilemo ana aonsi yatatu yakwe Anaki.

²¹ Lelo amu mutundu wakwe iyaposiwa kuzinga aina Yebusi aikalanga mu Yelusalemu. Na pilelo kwene aina Yebusi yacili ikala mwenemo pamwi na ina Benjamini.

²² Lyene amu mupanda wakwe Yosefu yazanza umusumba wa Betele, nga Yawe wali na aliyo kwene.

²³ Lino yatuma antu akuya nengula umusumba wa Betele (uno mpiti yatangi Luzi),

²⁴ inengu zizi izilola umuntu ala akufuma mu musumba nga izimunena iziti, “Tulange ivyakwingila mu musumba nga naswe tusikukucita nanti cimwi iciipe.”

²⁵ Acino nawe azilanga, nga izikoma aikazi amu musumba ulya lelo izisya sile umuntu wilya na amu ng'anda yakwe.

²⁶ Alino umuntu wilya aya ku mpanga iya ina Hiti, aya akuula kweneko umusumba nga autemela izina ati Luzi, wakwe vino ukaamwa ukufika na ndakai kwene.

Antu yano aina Izlaeli yaposiwe ukuzinga

²⁷ Lelo Manase atazinzile aikazi amu mu musumba wa Beti Syani nanti amu Taanaki nanti amu Doli nanti amu Ibeleamu nanti amu Megido kumwi na amu mizi izingulwike, pasi pano aina Kenani yang'ang'anile ku mpanga ilya.

²⁸ Lino aina Izlaeli yiiza yakwatisya amaka, iyakuulizya aina Kenani mu milimo, lelo nalyo kwene iyaposiwa kuyazinga yonsi pyu.

²⁹ Umutundu wakwe Efulemu nao kwene iuposiwa ukuzinga aina Kenani aikalanga pipi nu ku Gezeli. Lelo aina Kenani iyatwalilila ukwikala pakasi kao.

³⁰ Amu mutundu wakwe Zebuluni nayo kwene iyaposiwa kuzinga aina Kenani aikalanga mu musumba wa Kituloni nu wa Naaloli, yao asile pakasi kao. Lelo iyayakuulizya mu milimo.

³¹ Nanti amu mutundu wakwe Asyeli nayo kwene iyaposiwa kuzinga aikazi amu musumba wa Ako nanti amu Sidoni nanti amu Aalabu nanti amu Akizibu nanti amu Heliba nanti amu Afeki nanti amu Leobu.

³² Avino amu mutundu wakwe Asyeli yatenzi pakasi ka ikazi amu mpanga ilya.

³³ Nanti amu mutundu wakwe Nafutali nayo kwene iyaposiwa kuzinga aikazi amu musumba wa Beti Syemesyi nanti amu Beti Anati. Lelo amu mutundu wakwe Nafutali nayo kwene yatenzi pakasi ka ikazi amu mpanga ilya ya Kenani, iyakuulizya aikazi yaku Beti Syemesyi nu ku Betanati mu milimo.

³⁴ Aina Amoli iyapusizya amu mutundu wakwe Dani mu mpanga ya myamba, ukwaula kuyapeela umweko wa kutentemukila mu manyika.

³⁵ Aina Amoli nayo iyang'ang'anila Mwamba wa Helesi, na Aiyaloni na Syaalabimu. Lelo amu mutundu wakwe Yosefu iyalunduluka ukuya na maka panoyali mpaka nayo kwene iyasuka iyayakuulizya mu milimo.

³⁶ Umupaka wa ina Amoli watandikile ku mutentemuko wa mulundu wa Akilabimu, nga iukwela ku Selaa.