Utandiko 1 - Amazwi Yakwe Leza 2013

Leza waumba ivintu vyonsi

¹ Pa kutandika Leza waumvile iyulu ni nsi.

² Lelo insi itali mwa mwata umwi nupya yali iyaulwa kantu kamwi. Imfinzi yandatile pi ziya lyonsi na Mupasi wakwe Leza wazyundanga pa manzi.

³ Alino Leza avwanga ati, “Kakuye uluswepo,” nu luswepo iluyako.

⁴ Lyene Leza alola ukuti camuzanzya, nga apaatula uluswepo ukufuma ku mfinzi.

⁵ Alino Leza atemela uluswepo ati, “Umusanya” nga imfinzi nayo ati, “Usiku.” Nga kuya manguzi na katondo, uu wali uwanda wakutandika.

⁶ Leza avwanga ati, “Kakuye ulwelele lwa kupaatukanya amanzi mu vifulo viili ivipusane,” nga cicitika vivyo kwene.

⁷ Avino Leza wacisile ulwelele lwa kupaatukanya amanzi ya pisika lya lwelele na papela yaluko.

⁸ Nga Leza atemela ulwelele ati, “Iyulu.” Nga kuya manguzi na katondo, uu wali uwanda wakwe ciili.

⁹ Nupya Leza avwanga ati, “Amanzi ali pisika ya lwelele yakolongane pa cifulo conga kuti kuye musili,” nga cicitika vivyo kwene.

¹⁰ Alino Leza atemela musili ati, “Insi,” nga na manzi ali pa cifulo conga ati, “Yemba.” Lyene Leza alola ukuti camuzanzya.

¹¹ Nupya Leza avwanga ati, “Insi imezye vimelwa vya misango yonsi, ivikakwata impece ni vikaseeka iviseekwa umuli impece.” Nga cicitika vivyo kwene.

¹² Caleka insi imezya vimelwa vya misango yonsi ivikakwata impece. Lyene Leza alola ukuti camuzanzya.

¹³ Nga kuya manguzi na katondo, uu wali uwanda uwalenga yatatu.

¹⁴ Nupya Leza avwanga ati, “Kakuye vyakupeela uluswepo mwi yulu vyakupaatukanya musanya nu usiku nga ni vimanyililo vyakulenga kutandika kwa nsita, amanda ni myaka ni nsita zyamu myaka.

¹⁵ Kavyawala mwi yulu nu kupeela uluswepo pa nsi.” Nga cicitika vivyo kwene.

¹⁶ Avino Leza waumvile vyakupeela uluswepo viili ivikulu, ilanzi lyawala musanya nga nu mwezi wawala usiku. Nga aumba ni ntanda kwene.

¹⁷ Aviika mwi yulu kuti vyapeela uluswepo pa nsi,

¹⁸ nu kuti vyawala, conga musanya ni cuze usiku, nga nu kupaatukanya uluswepo ni mfinzi. Lyene Leza alola ukuti camuzanzya.

¹⁹ Nga kuya manguzi na katondo, uu wali uwanda wakwe cini.

²⁰ Nupya Leza avwanga ati, “Mu manzi kamuye viumbwa vya umi vya misango ni misango musenyantumba.” Nga ni vyunyi vyapapuka mu lwelele.

²¹ Avino Leza waumvile viumbwa vikulu vyamuli yemba, ni misango yonsi ya viumbwa vya umi vyamu manzi, nga ni misango yonsi ya vyunyi. Lyene Leza alola ukuti camuzanzya.

²² Nga Leza apolelela viumbwa nga avwanga ati, “Vyalanini, musandane muzule maziya. Ni vyunyi navyo visandane panonsi.”

²³ Nga kuya manguzi na katondo, uu wali uwanda uwalenga yasano.

²⁴ Nupya Leza avwanga ati, “Umu nsi muye viumbwa vya misango yonsi, iviteekwa, ivikasela nga ni nyama zya mpanga, cila ciumbwa nu musango wakweco.” Nga cicitika vivyo kwene.

²⁵ Acino Leza aumba inyama zya mpanga cila nyama nu musango wakweyo, iviteekwa nu musango wakwevyo, nga ni viumbwa vyonsi ivikasela nu musango wakwevyo. Lyene Leza alola ukuti camuzanzya.

²⁶ Nupya Leza avwanga ati, “Katuumbe umuntu mu cata citu, aye wakwe sweswe. Wene alaangalila inswi, ni vyunyi ivikapapuka, iviteekwa ni nyama zya mpanga, nga ni vikasela vyonsi.”

²⁷ Avino Leza waumvile umuntu mu cata cakwe. Leza wayaumvile umonsi nu mwanaci.

²⁸ Nga Leza ayapolelela, ayanena ati, “Muvyalane muvule mulimbe insi yonsi nu kuyangalila. Namupeela uwangalizi pa nswi, ivyunyi ivikapapuka ni nyama zyonsi zyamu nsi.”

²⁹ Nupya Leza avwanga ati, “Lolini, namupeela vimelwa vya misango yonsi, ivikakwata impece ni vikaseeka iviseekwa umuli impece kuti mwalya.

³⁰ Lelo ku nyama zyonsi zyamu mpanga nga ni vyunyi vyonsi ivikapapuka, visela vyonsi, viumbwa vyonsi vyaumi, natimpeela mulemvwe na mafwa kuti vyalya. Nga cicitika vivyo kwene.”

³¹ Lyene Leza alola vyonsi vino waumvile ukuti ivisuma wakwe cimwi. Nga kuya manguzi na katondo, uu wali uwanda uwalenga mutanda.