Umbwilo 8 - Amazwi Yakwe Leza 2013

Mwana wa mfwele walematula cimanyililo calenga cinimbali

¹ Lino Mwana wa mfwele walematwile cimanyililo calenga cinimbali, mwiyulu mwali cele kulingana na citika wakwe aawa wenga.

² Lyene ndola angeli cinimbali yano akaimilila nkolelo yakwe Leza, yapeelwa ntandala cinimbali.

³ Lyene mungeli namuze, aiiza aimilila nkolelo ya kavuwa, ala alemile iciinga cakwe zaabu. Alino yamupeela ubani wingi kuti aupeele pamwi na mapepo ya antu yakwe Leza yonsi aoce pa kavuwa kakwe zaabu kano kali nkolelo ya cilimba ca wene.

⁴ Ni cunsi ca ubani uno wapyanga cayanga mupela pamwi na mapepo ya antu yakwe Leza kufuma mu minwe ya mungeli wino waimi nkolelo yakwe Leza.

⁵ Alino mungeli atoola iciinga, azuzyamo umoto kufuma pa kavuwa, nga acisumbila pano nsi. Lyene kuya ciunda nu kupangalansya, kumyansya kwa nkuwa ni cilundumusi.

Angeli yalizya ntandala

⁶ Alino angeli cinimbali yano akweti ntandala cinimbali yaiteyanya pakuti yalizye.

⁷ Mungeli wakwe conga alizya ntandala yakwe. Alino kwiza imvula ya citalawe nu moto uminkana nu wazi, ipongoloka pano pansi. Lyene ciputulwa conga mu viputulwa vitatu vya nsi cipya, ni ciputulwa conga mu viputulwa vitatu vya miti, nga na mafwa ni sote lisi vyonsi vipya.

⁸ Alino mungeli wakwe ciili alizya ntandala yakwe. Cintu cimwi cino calolike wa mwamba ukulu cuze uno ukupya cisumbilwa muli yemba. Ciputulwa conga mu viputulwa vitatu vyakwe yemba cisenuka iciya uwazi.

⁹ Ciputulwa conga ca mu viputulwa vitatu vya viumbwa vyaumi ivya muli yemba naco cifwa, nga ni ciputulwa conga mu viputulwa vitatu vya mato akulu cononwa.

¹⁰ Alino mungeli wakwe citatu alizya ntandala yakwe. Lutanda lukulu cuze luno lwakanga kwati inyali nalo lupona kufuma mwiyulu, nga luponela pa ciputulwa conga mu viputulwa vitatu vya nguzi nu tufukoka twa manzi.

¹¹ Lutanda luu, izina lyaluko yakati, “Ukulula.” Ciputulwa conga mu viputulwa vitatu vya manzi caluzile na antu aingi yano amwileko manzi yaa yafwile pano manzi yasenwike yaya alule.

¹² Alino mungeli walenga yani alizya ntandala yakwe. Ciputulwa conga ca mu viputulwa vitatu vi lanzi, mwezi ni ntanda vyumwa, cakuti vyene viponzya ciputulwa conga mu viputulwa vitatu vya kuwala kwakwevyo. Lyene kutali luswepo mu ciputulwa conga ca viputulwa vitatu vya musanya nu usiku.

¹³ Lyene ndola, nga nuvwa lyang'anda, wino walelanga papela mu lwelele akuti, “Kalanda! Kalanda! Kalanda kuli yao yonsi akaikala mu nsi lino angeli yatatu asyala nayo yasya yalizye ntandala zyao.”