Umbwilo 2 - Amazwi Yakwe Leza 2013

¹ “Lemba ku ntunguluzi yakwi uvi ku Efeso uti, “Lii ilandwe kufuma kuli wino alemile ntanda cinimbali mwi kasa lyakwe lilunji nupya wene akapita pakasi ka vyakutekapo inyali cinimbali.

² Namanya vino ukacita. Namanya kuomba kuno waombisye nga nu kuteeka umwenzo. Namanya ukuti wemo utangazumilizya yakaifya nga nupya wemo wezizye yao akati yene atumwa lino yasivyo. Lelo wayezya wazana ukuti yene antumpu.

³ Wemo ukateeka umwenzo nupya wacuziwe pamulandu wane, nupya utanenwike.

⁴ Lelo nkuilizyanya pali cii, cakuti utantemwa ndi vino wantemilwe inkolelo.

⁵ Elenganya pa kupona kuno wapona. Zenzuka nu kucita vino wacisile nkolelo. Ndi utazenzwike, ndiza kunuli nu kufumya cakutekapo nyali mu ncende yakweco.

⁶ Lelo usuma wako uwakuti wemo wapata vicitwa vino aina Nikolaita yakacita vino nani kwene napata.

⁷ “Akweti amatwi yakuuvwa, auvwe cino Mupasi Wamuzilo akulanda ku mauvi! “Yao alacimvya ndayapeela nsambu yakulya vizao vya ku muti uno ukapeela umi, uwaya ku Paladaise yakwe Leza mwiyulu.”

Ilandwe kwi uvi lyaku Similina

⁸ “Lemba ku ntunguluzi yakwi uvi ku Similina uti, “Lii ilandwe kufuma kuli wino uwakutandika nupya uwakusyalikizya. Wene wafwile nupya ali nu umi.

⁹ Namanya intazi zyako. Namanya ukuti wewe mupina. Lelo mu cumi wewe mukama! Namanya vilandwa viipe vino yakutumpwila yao akailanda ukuti Ayuda nalino yasi Ayuda. Yene yali mwi umba lyakwe yao yakwe Ciwa.

¹⁰ Utuvwa intete pali vino wasya ucule. Uvwa! Muli nu kweziwa na Ciwa lino wene alalenga kuti yamwi amunomuli yayalilwe mu ng'anda yaminyololo. Na macuzi yako yalasila mu manda ikumi. Uye uwakutailwa mpaka ni mfwa, nani ndakupeela cilambu cangala icili umi wape.

¹¹ “Akweti amatwi yakuuvwa, auvwe cino Mupasi Wamuzilo akulanda ku mauvi! “Yao alacimvya yatalafwa imfwa yakwe ciili.”

Ilandwe kwi uvi lyaku Pegamu

¹² “Lemba ku ntunguluzi yakwi uvi ku Pegamu uti, “Lii ilandwe kufuma kuli wino uwakwata lupanga lukali koili.

¹³ Namanya kuno ukaikala akuno Ciwa wika cilimba cakwe ca wene. Mwemo mwaya akutailwa kunondi, nupya mutatala mwata kutaila nu mu nsita kwene ino Antipa kambone wane uwakutailwa wakomilwe kumwinu kuko kuno Ciwa akaikala.

¹⁴ Lelo nkuilizyanya pa vintu vimwi vinono. Munomuli mwaya yamwi akayela usambilizyo wakwe Balamu, wino uwasambilizye Balaki ivya kutungulula aina Izlaeli mu kwifya apa kuyaongola kuti yalya ivyakulya ivyapeelwanga ku tuluwi, nga na kuti yalongozya.

¹⁵ Mu musango uli onga munomuli mukweti antu yamwi yano yakayela usambilizyo wa ina Nikolaita.

¹⁶ Acino ndakai zenzukini. Ndi mutazenzwike, ndiza zuwa kunomuli nu kulwisya antu yao ku lupanga luno lukafuma mu mulomo wane.

¹⁷ “Akweti amatwi yakuuvwa, auvwe cino Mupasi Wamuzilo akulanda ku mauvi! “Yao alacimvya ndayapeela mana uwafiswa. Nupya cila wenga uwa munoyali ndamupeela iwe litiswe pano palembwa izina lipya, ililamanyikwa kuli aliwe asi kuli wensi.

Ilandwe kwi uvi lyaku Tiatila

¹⁸ “Lemba ku ntunguluzi yakwi uvi lyaku Tiatila uti, “Lii ilandwe kufuma ku Mwana wakwe Leza, wino amanso yakwe yakaloleka wa cimbilimbili ca moto, nga ni ngazo zyakwe nazyo zikayengesa wa cela cino cazifiwa.

¹⁹ Namanya vino ukacita, nga nu kutemwa kwako, na vino waya uwakutailwa. Namanya kutumikila kwako, na vino ukateeka umwenzo. Namanya ukuti ndakai ukucita ivisuma kuluta vino wacisile pa kutandika.

²⁰ Lelo nkuilizyanya pali cii cakuti ukazumilizya Yezebele mwanaci wino akailanda umwisikulu ukuti wene inkombe yakwe Leza. Wene akaomvya usambilizyo wakwe pa kuponzya aomvi yane kuti yalongozya nu kulya vyakulya vyapeelwa ku tuluwi.

²¹ Namupeela kasita kuti azenzuke, lelo wene asyalonda kufuma ku ulongozyo wakwe.

²² Acino nemo ndamusumba umu ndwala pamwi na yao acisile ulongozyo nawe, yalacula cuze. Ndi yatazenzwike kuli vyonsi vya ukakasi vino yacisile nawe lyene ndacita cino nalanda.

²³ Nupya ndakoma ana yakwe onsi, nga lyene mauvi yonsi yalamanya ukuti nemo namanya amelenganyo nu kulonda kwa muntu wensi. Ndapela cilambu kuli cila muntu uwa munomuli kulingana ni milimo yakwe.

²⁴ “Lelo yamwi asyala munomuli amu Tiatila yatayela usambilizyo uu uwipe, mwemo mutasambilila vino yauze yakati, ‘Nkama zikulu zyakwe Ciwa.’ Nkumunena ukuti ntalika cisendo nacuze panomuli.

²⁵ Lelo kufika lino ndiza, mulinzile kulemelela na maka kuli vino mwasambilila.

²⁶ Yao alacimvya, nu kutwalilila kucita vino nkalonda kufika nu ku mpelelekezyo, ndayapeela utesi pa nko zyonsi uno Tata wampela.

²⁷ Yalateeka inko ni nsonzo ya cela, nu kuzivungola wa ntendo ku maka ali yonga na yano nemo napokelile kufuma kuli Tata.

²⁸ Nupya ndayapeela namukokola.

²⁹ “Akweti amatwi yakuuvwa, auvwe cino Mupasi Wamuzilo akulanda ku mauvi!”