Umbwilo 18 - Amazwi Yakwe Leza 2013

¹ Pacisila lyene ndola mungeli namuze akwika kufuma mwiyulu. Wene akweti maka akulu cuze, nga nu kuyengesa kwakwe ukwa lulumbi kukozya mu nsi yonsi.

² Wene apunda ni zwi likulu ati, “Watawa! Babiloni mukulu watawa! Ndakai wene wataya uwikalo wa mipasi yankota, nupya citotela cakupuzamo mipasi yonsi ikowele ni vyunyi vyonsi vikowele ni vyapatikwa.

³ Pano antu amu nko zyonsi yamwa waini wakwe mukali uwa mbunu ya uzelele. Yakateeka amu nsi yacita ulenzyo na aliwe, nga na aculuzi amu nsi yaya akama pamulandu wa lwiswa lwakwe ulutangasila.”

⁴ Nupya nuvwa izwi nalyuze kufuma mwiyulu likuti, “Fuminimo, mwe antu yane! Fuminimo munoli! Mutalinzile kukumako ku maifyo yakwe. Mutalinzile kukumako ku kuvunukwa kwakwe.

⁵ Pano uwingi wa maifyo yakwe yafika mwiyulu, Leza nawe wataiusya misango ya ukakasi wakwe.

⁶ Mucitilini vivyo kwene vino wamucitile. Muwezezyini maila yaili pali vyonsi vino wacisile. Zuzyini lwako lwakwe ni vyakumwa vikali maila yaili kuluta vyakumwa vino wamuteyanyizizye.

⁷ Mucuzyini nu kuleka anyunguluka cuze kulingana nu lulumbi nu wikazi wapapela uno umwisikulu waipile. Pano wene akutwalilila kuinena ati, ‘Ntenzi pano, ne namwene! Nemo insi mukamfwilwa, ntalatala ndosye!’

⁸ Pamulandu wakwe cii, vilumbelo, ndwala, ndosya, ni cipowe vilamuponela pa wanda onga. Nga yalamoca ku moto, pano Mwene Leza akumupingula, Leza uwa maka.”

⁹ Yakateeka amu nsi akumileko ku uzelele nu lwiswa lwakwe yalakuta nu kulilila musumba lino yalola cunsi kufuma ku cimbilimbili ca moto ulayoca.

¹⁰ Yene yalimilila patali, pamulandu wa kuya ni ntete zya kukumako ku kucula kwakweo. Yalavwanga yati, “Owee, we koofya we! Owee we kwipa we! We musumba ukulu cuze nupya uwamaka, Babiloni! Watuvunukwa muli aawa wenga sile!”

¹¹ Aculuzi amu nsi nao kwene yakulila nu kulosya, pamulandu naaliwe pano kusi umwi wino akukala vintu vyao nupya.

¹² Kusi umwi uwakukala zaabu, nanti siluva, nanti mawe amutengo ayengese, nanti mbela. Kusi umwi uwakukala nsalu zitiswe, nsalu ziyenzulukile na siliko ni nsalu ziyenzu, ni misango yonsi ya miti ya mununko usuma nga ni misango yonsi ya vintu ivyapangilwa ku mino ya nzovu, nga ni miti yamutengo na vyakwe safwali ni cela, ni iwe lya malibo,

¹³ na kinemono, na amono. Nu ubani, na mule, ni vya mununko usuma, nga na waini na mafuta, nu usu wa ngano ni ngano, ni ng'ombe ni mfwele, imfwalasi na maceleta, na azya, nga nu umi wa antu kwene.

¹⁴ Aculuzi nayo yamunena yati, “Vintu visuma vyonsi vino walondanga kukwata vyati vikuutuka, nu ukama pamwi nu kuyemba kwako vyasila, nupya utalatala uvilole!”

¹⁵ Aculuzi yano ali akama pa kucita uculuzi mu musumba uwa yalimilila katalamukila pamulandu wakuya ni ntete zya kukumako ku kucula kwakwe. Yene yalalila nu kulosya,

¹⁶ yalati, “Owee, we koofya we! Owee, we kwipa we, ku musumba ukulu! Wene wazwalanga nsalu zitiswe ni ziyenzulukile ni ziyenzu, nga nu kuiyemvya nu tuyembelo twakwe zaabu, na mawe amutengo ayengese, nga ni mbela!

¹⁷ Lyene wataponzya vyuma vyakwe vyonsi muli aawa wenga!” Intunguluzi zyonsi zya mato akulu na alendo, yakapita amu mato nga na antu yauze yonsi yano yakalonka pali yemba, yonsi kwene iimilila patali,

¹⁸ yapunda lino yalola cunsi cikufuma mu vimbilimbili vino vyamocanga, nga yavwanga yati, “Kutatala kwaya musumba ukulu nauze wa musumba uu ukulu!”

¹⁹ Yaiswela na masenga pa mitwe yao, yalila nu kulosya, yati, “Owee, we koofya we! Owee, we kwipa we ku musumba ukulu! Wene uli musumba ukulu uno onsi akwata mato akulu akapita pali yemba yalenzilwe kuya akama pa vyuma vyauko! Lyene wene waponzya vyonsi muli aawa wenga!”

²⁰ Zangini, mwe muno mwikala mwiyulu pamulandu wakononwa kwakwe! Zangini mwe antu yakwe Leza pamwi na atumwa na yakasema! Pano Leza watamuvunuka pali vino wamucitile!

²¹ Alino mungeli wa maka anyemula ciliwe cakusilapo cikulu cuze acisumbila muli yemba, avwanga ati, “Vii avino Babiloni musumba ukulu ulasumbwa pansi na maka, nupya wene utalatala uloleke.

²² Nyimbo zya mapango nga ni zya mazwi ya antu, na zyakwe yakalizya ya mitolilo na mapenga, zitalatala zyuvwike munuli nupya! Munuli mutalatala muzanwe fundi wa mulimo uli onsi nupya. Iwe lyakusila litalatala lyuvwike munuli nupya!

²³ Munuli mutalatala muloleke luswepo lwi lampi. Munuli mutalatala muvwike izwi lyakwe siwinga na nawinga. Aculuzi yako ayano yali na maka cuze mu nsi yonsi, nu mu malele yako amuno wasombanga antu yonsi amu nsi!”

²⁴ Babiloni wavunwikwe pamulandu wa wazi wakwe yakasema nu wa antu yakwe Leza, nga nu wa antu yonsi akomilwe muno nsi.