Umbwilo 16 - Amazwi Yakwe Leza 2013

¹ Nupya nuvwa izwi likulu kufuma mu Ng'anda ikulu yakwe Leza, likulanda ku angeli cinimbali liti, “Pitini mukapongolole ngeso cinimbali zya ukali wakwe Leza pa nsi!”

² Alino mungeli wakwe conga aya apongolwela vyamu lweso lwakwe pa nsi. Lyene vilonda vyakoofya nupya viwaye viloleka pali yao akweti cimanyililo ca cilyanyi na pali yao apefile unkolanya wakweco.

³ Nupya mungeli wakwe ciili nawe apongolwela vyamu lweso lwakwe muli yemba. Alino manzi yaya wa wazi wa muntu mufwe, nga ni ciumbwa consi ca muli yemba icifwa.

⁴ Lyene mungeli wakwe citatu apongolwela vyamu lweso lwakwe mu nguzi nu tufukoka twa manzi, nga manzi yasenuka yaya uwazi.

⁵ Alino nuvwa mungeli uwali na maka pa manzi avwanga ati, “Upinguzi uno wacita usi walufyengo, We Wamuzilo, we muno ulipo nupya waliko!

⁶ Yene yazwisizye uwazi wa antu yakwe Leza nga na yakasema. Caleka watuyapela uwazi kuti yamwe. Yene yapokelela kulingana ni milimo yao.”

⁷ Lyene nuvwa izwi likuti, “We Mwene Leza wa maka onsi! Upinguzi wako uwa cumi nupya usi walufyengo!”

⁸ Lyene mungeli uwalenga yani apongolwela vyamu lweso lwakwe api lanzi, nga ilanzi lizumiliziwa ukoca antu ku cikaililwa cikali cuze.

⁹ Antu yapya ni cikaililwa cikali cuze, nga yavwanga mazwi ya miponto kuli Leza wino uwakwata maka pa vilumbelo vii. Lelo yatazenzwike ku maifyo yao kuti yalumbanye Leza.

¹⁰ Lyene mungeli uwalenga yasano apongolwela vyamu lweso lwakwe pa cilimba ca wene ica cilyanyi. Alino kuya mfinzi mu wene wa cilyanyi, nga antu yalumanya indimi zyao pamulandu wa kuwaya,

¹¹ nga yavwanga mazwi ya miponto kuli Leza wa kwiyulu, pamulandu wa kuwaya kwa vilonda vyao. Lelo yatazenzwike nu kuleka miyele yao iipe.

¹² Lyene mungeli uwalenga mutanda apongolwela vyamu lweso lwakwe pa luzi lukulu Yufulate. Alino uluzi lupwa kuti luyule inzila yakuti yakateeka kufuma ku ufumondaka yapitemo.

¹³ Lyene ndola mipasi ikowele itatu yalolike wakwe yacula. Onga ufuma mu mulomo wa cizoka, umwi mu mulomo wa cilyanyi, nauze mu mulomo wakwe kasema waufi.

¹⁴ Yene ili mipasi yankota ino ikacita vinjelengwe. Yene ikaya kuli yakateeka yonsi mu nsi, kuti iyakonganike ku ulwi ulacitika pa Wanda wakwe Leza wa maka onsi.

¹⁵ “Uvwini! Nkwiza wa mwivi! Walongo awiyo wino akulola nu kucingilila vizwalo vyakwe pakuti atakapite tupu nu kuya ni nsonyi pa lwalala!”

¹⁶ Alino mipasi ikonganika yakateeka pa ncende ino mu Ciyebulai yakati Alamagedoni.

¹⁷ Nupya mungeli uwalenga cinimbali apongolwela vyamu lweso lwakwe mu lwelele. Izwi likulu lifuma mu cilimba ca wene mu Ng'anda ikulu yakwe Leza liti, “Cati cicitwa!”

¹⁸ Lyene kwali kumyansya kwa nkuwa, ciunda nu kupangalansya, nga ni cilundumusi cakofya. Kutatala kuya cilundumusi ca musango uu kufuma lino umuntu waumvilwe. Cene cili cipisye kuluta vyonsi!

¹⁹ Musumba ukulu wankanikana mu viputulwa vitatu, nga misumba ya mpanga zyonsi yononeka. Leza aiusya Babiloni mukulu nga amumwesya waini uwamu lwako lwa cipyu ca ukali wakwe.

²⁰ Vilila vyonsi vitakuloleka, ni myamba yonsi nayo itakuloleka.

²¹ Vitalawe vikulu cuze, ivinyome kulingana na makilo makumi yasano, navyo vifuma mwiyulu nu kuponela pa antu. Antu yaa yavwanzile mazwi ya miponto kuli Leza pamulandu wakuti cilumbelo cii cali cakofya cuze.