Umbwilo 1 - Amazwi Yakwe Leza 2013

¹ Mu lupapulo luu mwalembwa vicitwa vino Yesu Klistu waumbwile. Leza wamupile umbwilo pakuti alange aomvi yakwe vintu ivili nu kucitika zuwa. Klistu watumile mungeli wakwe ni landwe lya kuumbula kuli Yoane muomvi wakwe.

² Yoane nawe walondolwile vyonsi vino waweni. Nupya akupeela umboni pi landwe ilyafumile kuli Leza na pali vyonsi vino Yesu Klistu wamunenyile.

³ Walongo umuntu wiyo akawelenga lupapulo luu, walongo umuntu wino akauvwa ku mazwi yaa ausemo nu kuyela vino vyalembwa mu lupapulo luu! Pano insita yatipalama lino vintu vii vyonsi vilacitika.

Yoane watuma ulau ku mauvi cinimbali

⁴ Ne Yoane nalemba kalata ku mauvi cinimbali amu muputule wa mpanga ya Asiya. Cikuku nu mutende viye namwe kufuma kuli Leza, wino alipo, wino uwalipo, wino aliza. Cikuku nu mutende viye namwe kufuma ku mipasi cinimbali ili ku nkolelo ya cilimba cakwe Leza.

⁵ Cikuku nu mutende viye namwe kufuma kuli Yesu Klistu kambone uwakutailwa, uwali wankolelo kuzyukuka kufuma ku mfwa, nupya wene ali kateeka wakwe yakateeka yonsi amu nsi. Wene watutemwa nupya waipile kuti atukulule ku maifyo itu

⁶ nupya watucita kuya yakateeka na yasimapepo mu kutumikila Leza Isi wakwe. Lulumbi na maka vipelwe kuli Yesu Klistu manda pe! Ameni.

⁷ Lolini, wene akwiza mu makumbi! Antu yonsi yalamulola, pamwi na yao kwene amutosile mu mbazo. Antu yonsi pano nsi yalalosya pamulandu na aliwe. Vii avino cilaya.

⁸ “Nene Alufa na Omega, kuli kuti, uwakutandika nupya uwakusyalikizya,” vii avino Mwene Leza wa maka yonsi walanda. Wene alipo, wino uwaliko, nupya wino aliiza.

Yoane walola Klistu mu cilolwa

⁹ Nene Yoane mwina winu, nupya mulondezi wakwe Yesu. Nkakuma pamwi namwe mu wene wakwe Leza nu kuposya mu macuzi. Nemo nasumvilwe pa cilila ca Patimosi pamulandu wa kukosola mazwi yakwe Leza nga ni cumi cino Yesu waumbwile.

¹⁰ Pa wanda wa Mwene Mupasi Wamuzilo aikila panondi nga nuvwa izwi likulu, lino ilyuvwikike kwati lya ntandala, ala likulanda ku cisila cane.

¹¹ Lyene liti “Lemba vino walola nu kutuma lupapulo ku mauvi amu misumba cinimbali, ku Efeso, ku Similina, ku Pegamu, ku Tiatila, ku Sadisi, ku Filadefia, nu ku Lodesiya.”

¹² Naselewike kuti ndole wino uwavwanganga kunondi, nga ndola ivyakutekapo inyali cinimbali vyakwe Zaabu,

¹³ lyene pakasi ka vyakutekapo inyali cinimbali pali wino walolike wa mwana wa muntu, ala azwite umwingila uwafisile na pa ngazo zyakwe, nupya wazwite cimusipi cakwe zaabu pa cifuwa.

¹⁴ Inyele zyakwe zyali zitiswe wakwe pamba, nanti wa mula. Manso yakwe yalolekanga wa cimbilimbili ca moto.

¹⁵ Ingazo zyakwe zyayengesanga wa cela ciyengese cino yengulula nupya cino cazifiwa. Izwi lyakwe lyuvwikike wa ciunda ca cipoma.

¹⁶ Wene walemile intanda cinimbali mwi kasa lyakwe lilunji, nga mu mulomo wakwe mufuma lupanga lukali koili. Nu usyu wakwe wali suyengese wi lanzi lyafika mutwe papela.

¹⁷ Lino namulola, nani mpona pansi pipi na pa ngazo zyakwe wa muntu mufwe. Nawe anjikila ikasa lyakwe lilunji nga avwanga ati, “Utoopa! Nene uwakutandika nupya uwakusyalikizya.

¹⁸ Nene mumi! Nafwile, lelo ndakai indi nu umi manda pe. Nakwata mfungulo zya mfwa ni zya kuzimo.

¹⁹ Lyene lemba vintu vino walola, ivintu vikucitika ndakai ni vilacitika.

²⁰ Kuu kuli kulondolola kwa nkama ya ntanda cinimbali zino walola mwi kasa lyane lilunji, nga ni vyakutekapo inyali cinimbali vyakwe zaabu. Ntanda cinimbali ali ntunguluzi zya mauvi cinimbali, nga ni vyakutekapo inyali cinimbali amauvi cinimbali.”