Tito 2 - Amazwi Yakwe Leza 2013

¹ Lelo wemo ulinzile kusambilizya antu vilingine nu usambilizyo uwa cumi.

² Wakonkomezya aikolo ukuti yalinzile kutekela mu melenganyo. Yene yalinzile kuya a mpomvu mu utailo, mu kutemwa nga nu mu kuposya kwao.

³ Mu musango uli onga kwene wakonkomezya anaci aikolo kuti mwata wao waya ndi vino anaci amuzilo yalinzile kuya. Yene yatalinzile kuya nu ukwakwa nanti kutekwa uzya nu ukolesi. Yene yalinzile kusambilizya visuma,

⁴ pakuti yasambilizya akazyana kutemwa yaiya na ana yao,

⁵ na kuti yaikanya, yaye asanguluke nupya aci asuma akuyela yaiya. Yene yalinzile kucita cii pakuti kutaya umuntu nanti wenga uwakulandila Ilandwe lyakwe Leza viipe.

⁶ Mu musango uli onga kwene wakonkomezya alumendo kuti yaikanya.

⁷ Wemwisikulu ulinzile kucita visuma kuti muli vyonsi uye cilangililo ku antu. Uye uwa cumi nga nu kusumbako mano mu usambilizyo wako.

⁸ Waomvya mazwi ya cumi yano atangaleta mulandu, pakuti anisi yako yangacitwa insonyi pa kuntavwanga ciipe pali sweswe.

⁹ Azya yalinzile kutontela asambazi yao nu kuyazanzya muli vyonsi. Yene yatalinzile kuya na kasa kunoyali.

¹⁰ Yene yatalinzile kwiya vintu vyao. Lelo mu cifulo cakwe cico, yene yalinzile kulangilila yauze ukuti lyonsi yaya asuma akutailwa, pakuti Leza Katuula witu apelwe mucinzi muli vyonsi vino yakucita.

¹¹ Pano Leza wasokolola cikuku cakwe ca kutuula antu onsi.

¹² Cikuku kwene cii cikatutungulula kuti twakana uwikazi usi wa upefi ni vilondwa vyamu nsi. Na kuti lyene twaikanya, twacita visuma nu kwikala umi uwa upefi muno nsi,

¹³ lino tucili tukulolela Wanda upolelelwe uno tukupaalila, lilyo lino lulumbi lwakwe Leza mukulu na Katuula witu Yesu Klistu lulaloleka.

¹⁴ Wene waipile umwisikulu pamulandu witu, kuti atukulule kufuma ku nkota zyonsi nu kutucita asanguluke nupya akwakwe wenga sile, nga nu kuleka kuti tuye nu muzonda wakucita visuma.

¹⁵ Sambilizya vintu vii nu kuomvya maka yako yonsi lino ukukomelezya nu kunenola yano akukuvwa. Utaleka umwi uwa munoyali akusuule.